Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 30

Ukama hwa Jesu na Babake

Ukama hwa Jesu na Babake

JOHANI 5:17-47

  • MWARI NDI BABA WA JESU

  • RUMUKO HWAKAPIKIHWA

VaJudha vamweni povanopumbha Jesu kuti waphwanya Sabudu ngo kurapa mundhu, iyena anodavira kudari: “Baba wangu vanobata basa njiku jese. Na ininivo ndinobatavo.”—Johani 5:17.

Zvinoitari Jesu azvirambijwi ngo mutemo wa Mwari wo Sabudu. Iyena anotevejera mabasa aushoni a Mwari ngo kucumaira no kujijisa. Ngokudaro, Jesu anoenderera mberi aciita zvaushoni dhiya jese. Asi madaviriro aanoita vandhu vanomupumbha anoita kuti vanyangajwe maningi kupinda zvovainga, zve vanopsaka kuuraya Jesu. Ngenyi vanoita kudaro?

Kusiyapo basi kuva no mavonero aciripi iona okuti Jesu ari kuphwanya Sabudu ngo kurapa vandhu, ivona vanohwajihwa maningi ngo kunanga kwake kuti iyena i Mwana wa Mwari. Vanozvivona kuti ari kutuka ngo kunanga kuti Babake ndi Mwari, inga Jesu ari kunanga kuti wakaezana na Jehovha. Asi Jesu aatobvunduki ndizvona zve anovabvunja ngo pamusoro po ukama hwake na Mwari. Anonanga kuti: “Baba vanodisa Mwana no kumutatija bzese bzo vanoita.”—Johani 5:20.

Baba ndi Mupi wo Upenyu, zve vakazvikhombija ngo kupekeja vandhu simba rokuti vamuse vakafa. Jesu anoenderera mberi aciti: “Kudari inga Baba vanomusa vakafa no kuvapa uhomi, ngo maitiro ondhoo Mwana anopavo uhomi avo vaanoda.” (Johani 5:21) Magama anosisira aya anopa vetero yo kumbeji. Pikija wari uno, Mwana ari kumusa vakafa ngo njira yo kumujimu. Ngozvinoitisa kuti Jesu anange kudari: “Ndiani anopurukira izwi rangu no kutenda wiya wakandituma, anova no uhomi hucingaperi, aazotongehwi nyatwa; ngokuti anobva mu rufu kuenda mu uhomi.”—Johani 5:24.

Apana pakatahwa kuti Jesu anonga amusa mundhu mbhera pa mukuvo uu, asi anobvunja vanomupumbha kuti vandhu vanozomuswadi ko vakafa. Jesu anoti: “Inozoguma ngari yokuti vaya vari mu makuva vanozozwa izwi rake. Pondhopo . . . vanozomuka.”—Johani 5:28, 29.

Pikija hazvo kuti Jesu anoita basa rinosisira maningi, anojekesa kuti anojidira pasi pa Mwari, ngo kunanga kuti, “inini andikwanisi kuita ciro candega. . . . Andipsangi kuda kwangu, kaveta kuda kwa wiya wakandituma.” (Johani 5:30) Asi Jesu anosanangura kusisira ko basa rake mu cidisiso ca Mwari. Iyena aazivi kumbonanga shwiro iyi pambeji po vandhu vakawanda. Asi vanomupumbha vano ucapupu hwakawanda kupinda zvaanonangari. Jesu anovaceuja kudari: “Imwimwi makatuma vandhu venyu kuna Johani [Mubhabhatiji], naye wakaita ufakazi hwo bzokadi.”—Johani 5:33.

Zvingaita kuti vapumbhi va Jesu vakatonasa kuzvizwa pa makore maviri akapera, kuti Johani vakabvunja vatungamiriri vo zviara zvo ciJudha ngo pamusoro pa Wiya anozoviya sure kwake—anozivikanwa kuva “Muporofeti” na “Kristu.” (Johani 1:20-25) Aciceuja vanomupumbha ngo kureremeja ko vaiita Johani, ari kuwanikari mujeri, Jesu anovabvunja kuti “imwimwi ngo mukuvo mudoko makadakara ngo ruveneko hwake.” (Johani 5:35) Ngokudaro, Jesu anopa ucapupu hwakakurisisa maningi kupindha hwa Johani Mubhabhatiji.

“Mabasa o vakandipa Baba kuti ndimaite, ndomaita [kubatanija no kurapa kwaabvari kuita], ndiwona anondiitira ufakazi hwokuti Baba vakandituma.” Kusiapo izvo, Jesu anoti: “Babavo vakandituma ndivona vanondiitira ufakazi.” (Johani 5:36, 37) Inga muezaniso, Mwari wakaita ufakazi kana ucapupu hwa Jesu pa kubhabhatijwa kwake.—Mateu 3:17.

Kunasa kunanga, vapumbhi va Jesu avana thangwe rokuti vamurambe. Matahwa ovanonangaro kuti vanomapsakisisa, anoita ucapupu ngo pamusoro pake. Jesu anopejisira ngo kunanga kudari: “Mukatenda Mosi maizotendavo inini; ngokuti Mosi wakatara ngo njio yangu. Kaveta mukatama kutenda Matahwa ake, munozotendesa kudini mazwi angu?”—Johani 5:46, 47.