Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 21

Mu Sinagoga yo Nazareta

Mu Sinagoga yo Nazareta

LUKA 4:16-31

  • JESU ANOVERENGA MUPHUKUTU WA ISAIA

  • VANDHU VO NAZARETA VANOPSAKA KUURAYA JESU

Apana kukana-kana kuti vandhu mu Nazareta vari kudakara maningi. Zvoda kuita gore Jesu acito abhabhatijwa ndi Johani, zve wainga muvezi mu dhorobha iri. Asi wari anozivika kuva mundhu anoita mabasa ano simba. Vagari vemo vano cidaka-daka co kumuvona aciita amweni o mabasa ano simba pakati pavo.

Cidaka-daka cavo cinoengejereka maningi Jesu paanoenda ku sinagoga, mu kuzwirana no cirovejeso cavo. Kunamata kunoitwemo kunobatanija kuita mukumbiro no kuverenga mabhuku a Mosi, inga zvinoitwa “mu masinagoga masabudu ese.” (Maitiro o Vapostori 15:21) Kusiapo izvo, kunoverengwa mativi o uphorofita hwa Isaia. Jesu paanomuka kuenda koverenga, zvinoita inga kuti anoziva vakawanda vaindosonganira nae mu sinagoga iyi ko makore akatikuti. Iyena anopuwa muphukutu wa Isaia. Zve anowana divi rinobhuya ngo pamusoro po Wakazojwa ngo mujimu wa Jehovha, zve masoko ao nyamasi uno anowanika pa Isaia 61:1, 2.

Jesu anoverenga ngo pamusoro pokuti Wokuzojwa uu anozocumairisa kudini ruponeso hwo vasungwi, kufununguhwa ko meso o mapofu no kuviya ko gore rinotendehwa ndi Jehovha. Jesu anopekeja muphukutu ku mushandi wo musinagoga, wogara pasi. Vandhu vese vanomusotesesa. Perepo anotanga kuvereketa, kangaije pa mukuvo wakareba, zve masoko ake anobataja magama anosisira maningi, okuti: “Nyamasi atevejwa matahwa aya omaperari kuzwa.”—Luka 4:21.

Vandhu vanokahamara “ngo mazwi” anodakajisa “aaivabvunja,” vobvunjisana ngocavo kuti, asipi “yena uu mwana wa Josefa?” Asi Jesu aciziva kuti vanoda kuvona mabasa ano simba akaezana no ovaizwa, iyena anoti: “Munozondibvunja kudari: ‘Murapi, jirape wega. Bzese bzo takazwa kuti wakabziita mu Kafarnaume, bziitevo mu nyika yako ino.’” (Luka 4:22, 23) Kangaije vainga zvigarisano zva Jesu vairangarira kuti anodikana kutanga kurapa mudhorobha rake, kuti atange kubesera vandhu vo mondhomo. Ngokudaro, kangaije vairangarira kuti Jesu wavarerusa.

Jesu aciziva murangariro wavo, anonanga zviitiko zvimweni zvo mu ndhorondho yo vaIziraeri. Anonanga kuti mu Iziraeri mainga no noni mu njiku ja Erija, asi aazivi kutumihwa kuti aende kojiri. Asi wakatumihwa kuenda ku noni iciripi mu Iziraeri yo ku Sarefaa, dhorobha riri phedo no Sidhoni, kwaakaitira mushamaiso wo kuponesa vandhu pa njara. (1 Majimambo 17:8-16) Zve mu njiku ja Erisha, mu Iziraeri mainga no vandhu vakawanda vano mapere, asi muphorofita uu wakarapa mu Asiria Naamani basi.—2 Majimambo 5:1, 8-14.

Vandhu vo mudhorobha rakabarihwa Jesu vanoitenyi povanovona kuti ndhorondho jaari kunangari ajiripi kuvabesera zve jiri kudira pambhene makaro no kutama kwavo gonda? Vari mu sinagoga vanonyangajwa, vomuka, zve vokhwekhwereja Jesu kuenda nae kunja ko dhorobha. Vanomutora kuenda pa mbhiripiri po dundhu rakavakihwa dhorobha ro Nazareta, zve vanoeja kumukhandira pasi paro. Asi Jesu anopokonyoka wotiza acizivi kukhuvazika. Jesu anoenda ku Kafarnaume, ngo kupharamande ra njikazi ko mbhiripiri yo Jombe ro Garireya.