Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 47

Cimusikane Cinoraramazve!

Cimusikane Cinoraramazve!

Jairosi wakavona kuti mwanakaji waisvasvamaya ngazi waraphwa ndi Jesu. Jairosi waithemba kuti Jesu anobeseravo mwanake, pikija ecirangarira kuti mwana wake wokaji wafa. (Mateu 9:18) Cimusikane ici cingabeserekazve here?

Jesu paainga ecibhuya no mwanakaji waarapaya, vanarume vamweni vanoguma vecibva kumuzi ka Jairosi veciti: “Mwana wako watamika. Munonesa ngenyi Mujijisi?”—Marco 5:35.

Masoko anohwaja zvakadini! Mwanarume uwu anonasa kureremejwa pa mutundhupo. Wari apana caanokwanisazve kuita. Mwana wake wokaji umwe basi wafa. Asi Jesu wapera kuzwa zvavaibhuya, wosota Jairosi, womubvunja akatodakara hake eciti: “Ucathya. Vangirirai kutenda basi.”—Marco 5:36.

Perepo Jesu anoperekeja Jairosi mbhera kumuzi kwake. Pavanoguma kondhono, wokhanda vese vakasuruvara maningi. Vandhu vari kucema, vari kujitakira pasi, vamweni vari kucumba. Jesu anonghwina munyumba wobudisa magama amweni anokahamaja, eciti: “Musikane aazivi kufa. Wakavata.” (Marco 5:39) Pavanozwa kudaro vandhu vomuseka ngo kuti vanoziva kuti musikane wafa. Asi ecishandisa simba raakapuwa ndi Mwari, Jesu anokhombija kuti zvinokwanisika kuti mundhu araramezve, inga zvinoithwa mundhu wakavata.

Jesu wokumbira kuti vandhu vese vabude mumbemo, vosara dungwa ra Pedhru, Jakobe, Johani no vabari vanyamufa. Iyena anotora vashanu ava mbhera kwainga kwakarajikwa mutembo. Womubata ngo nyara, wonanga kuti: “‘Talita kumi’, kunoti: ‘Musikane, ndinokubvunja, mukai.’” (Marco 5:41) Ciriporipoco anomuka wotanga kufamba. Muri kuvona mudakaro wakava na Jairosi no mukaji wake here? Kuti akhombije kuti ari kuraramazve kamare, Jesu anokumbira kuti vamupekeje cokuha.

Zviitiko zvakapera Jesu waikumbira kuti vandhu vaairapa vatame kuzvibvunja vamweni. Pa ciitiko ici anobvunjazve vabari vo musikane kuti vatame kufamba vecizvinanga. Asi zvecivoneka kuti vakazara ngo mudakaro mukuru, vabari vomusikane no vandhu vamweni, vanozvindhandhanisa “mu nyika yese.” (Mateu 9:26) Kudari imwimwi mukavona mundhu wamunoda anonga afa womuswazve, maizokwanisa kuzvinyarara here? Ici ciitiko cocipiri cinobhuya ngo pamusoro po kumuswa kwaiithwa ndi Jesu cakatahwa mu Bhaibheri.