Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 41

Jesu Anoita Mushamaiso ngo Simba Raani?

Jesu Anoita Mushamaiso ngo Simba Raani?

MATEU 12:22-32 MARCO 3:19-30 LUKA 8:1-3

  • JESU ANOTANGA HWENDO HWAKE HWOCIPIRI HWO KUCUMAERA

  • ANOGOGOMERA MADHIMONI ZVE ANONGWAJA NGO NDAVA YO CISHAISHI CICIKAREGEREHWI

Paanondopeja kubhuya pamuzi wa Simoni mufarisi wiya ngo pamusoro po kuregerera, Jesu anotanga hwendo umweni hwo kucumaera mu Garireya mese. I gore rocipiri ro mushando wake, zve aaripi kufamba ega. Vajiji vake 12 vanomuperekeja, kubatanija no vanakaji vamweni “vainga vakajingihwa mabjoka no kurapwa ndhenda.” (Luka 8:2) Pa vanakaji vamweni vakona vainga Maria Madharena, Suzana, na Jhuana waingaya akarovohwa ndi Mambo Herodhi Antipa.

Vandhu vazinji pavaijija ngo pamusoro pa Jesu, makanijano ngo pamusoro po zviito zvake aiengejekavo maningi. Izvi zvinonasa kujeka, mwanarume umweni ano dhimoni, acikavoni zve acikavereketi, paanoendeswa kuna Jesu perepo woraphwa. Wari mwanarume uwu aacinazve dhimoni, zve ari kuvona no kufamba. Vandhu vari kukahamara veciti: “Asipi yena uu, mwana wa Davidi, kani?”—Mateu 12:23.

Mbungano yainga yakaungana pamuzi painga na Jesu, yainga yakakura maningi zvokuti iyena no vajiji vake avakwanisi kuha. Asipi vese vaizvibata kuti ndiyena “mwana wa Davidi” wainga akagondeswa. Vatari vamweni no vaFarisi vanoviya ku Jerusarema, asi avaviyi kuzojijiswa ndi Jesu nee avaviyi kuzomubesa. Ivona vanobvunja vandhu kuti iyena “wakabatwa ndi Belezebu,” iyena ari kushandira “mutungamiriri wo mabjoka.” (Marco 3:22) Pavanozwa marehwa-rehwa awo, ukama hwa Jesu hunoviya kuzomubata kuti vamubvisepo. Ngenyi?

Mbhera wari hama ja Jesu ajidaviri kuti iyena i Mwana wa Mwari. (Johani 7:5) Jesu ari kuita inga ari kubara joweyowe, woita inga wasiana na Jesu wavakakuraya nae ku Nazareta. Voguma  pa mbhejiso yo kuti ciripo cawanana na Jesu, veciti: “Yena anopenga.”—Marco 3:21.

Jesu waipengadi here? Jesu wainga apera kurapa mundhu wainga akafukwa ngo dhimoni, asi wari wokwanisa kuvona no kuvereketa. Apana anozviphikiza. Ngo kudaro vatari no vaFarisi, voeja kupsipisa undhu hwa Jesu, ngo kumunyepera kuti: “Yena anombhirimbija mabjoka ngo zina ra Belezebu, mambo wo masathana.”—Mateu 12:24.

Zvecivoneka kuti Jesu anoziva zviri kurangarihwa ngo vatari no vaFarisi, iyena anoti: “Umambo huriwese hunoparajana ngocahwo, hunozopera. Guta nokuti ukama hunoparajana ngocahwo ahuzocijikiri.”—Mateu 12:25, 26.

Zvaanonanga Jesu zvinonesa kuphikiza. vaFarisi vanoziva kuti vaJudha vamweni vanogogomera madhimoni. (Maitiro o Vapostori 19:13) Ngo kudaro Jesu wakati: “lnini ndikambhirimbija mabjoka ngo simba ra Belezebu, vana venyu vanomambhirimbija ngo simba ra ani?” Ngo magama amweni, zvavari kunyeperari Jesu, ndivona vanotozviita kamare. Anoenderera mberi eciti: “Kaveta inini ndikambhirimbija mabjoka ngo simba ro mujimu wa Mwari, bzinoti Umambo hwa Mwari hwaguma komuri.”—Mateu 12:27, 28.

Kuitira kujekesa kuti anosimba rinonyisa Sathana paanogogomera madhimoni, Jesu anoti: “Anganghwinisa kudini mundhu mu nyumba yo umweni ano simba, womubira bzake, acikazi kumusunga? Akazoita kudaro, anozokwanisa kuba mu nyumba yake. Wiya aciripi na inini, ndiyena mukorore wangu. Nokuti ndiani acingaunganiji na inini, anoparaja.” (Mateu 12:29, 30) Zvokadi vatari no vaFarisi vari kuzonda Jesu, zvecitovonesa kuti vari kushandira Sathana. Vofundhurusa vandhu vainga vakazenengera Mwana wa Mwari, ano besero ra Jehovha.

Jesu anoshora vandhu va Sathana eciti: “Vandhu vanozokungurihwa bzakaxata bzese, no bzokutuka Mwari bzo vanozoita. Kaveta ndiani anotuka Mujimu Mucena, narini aazokungurihwi; anozotongehwa ndava yo uxaixi ucingaperi.” (Marco 3:28, 29) Rangariranyi zvozvanoreva kuno vandhu vanonangaya kuti Jesu anogogomera madhimoni ngo simba ra Sathana kasike i simba ro mujimu wa Mwari!