Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 36

Rutendo Hwakakura hwo Mukuru wo Masoca

Rutendo Hwakakura hwo Mukuru wo Masoca

MATEU 8:5-13 LUKA 7:1-10

  • MURANDA WO MUKURU WO MASOCA ANORAPHWA

  • VANO RUTENDO VANOZOKOMBOREHWA

Pasure po Hurukuro yo pa Dundhu, Jesu anoenda ku dhorobha ro Kafarnaume. Naagumeyo vakuru vanganani vo ciJudha vomukhwederera. Ivona vakatumwa ngo mundhu aciripi muJudha, wainga mukuru wo masoca o ciRoma.

Mukuru wo masoca uwu wainga ano muranda waaida maningi. Asi wari muranda wake ari kuhwaja zvokuti woda kufa. Pikija atori wo majinja, mukuru wo masoca ari kupsaka besero ra Jesu. VaJudha vanobvunja Jesu kuti muranda wo mwanarume uwu “wakavata kanyi ngo ndhenda yo kukhokhodara muviri, anohwajisisa.” (Mateu 8:6) Vakuru vo ciJudha vonanga kuti mukuru wo masoca uwu anofanehwa kupuwa besero zve vanodurujira kuti: “[Iyena] anodisisa vandhu vedu” zve wakavaka sinagoga yedu.—Luka 7:4, 5.

Waro Jesu no vakuru vo ciJudha vanoenda kumuzi ko mukuru wo masoca. Pavanonga vecikhwedera phedo no pamuziwo, mukuru wo masoca wotuma shamwari jake kuti jivatandamije, zve jivabvunje kuti: “Tenji, mucajinesa, ngokuti andifaneri kuti munghwine pa muzi pangu; ininivo andifaneri kuguma panyasi penyu.” (Luka 7:6,7) Kujidodokesa kwakadini ko mundhu wainga aroveja kutuma! Izvo zvinovonesa kuti mundhu uwu wakasiana maningi no vaRoma vaishupha maningi varanda.—Mateu 8:9.

Pacina kukana-kana, mukuru wo masoca uwu anoziva kuti vaJudha avaiti ushamwari no vaciripi vaJudha. (Maitiro o Vapostori 10:28) Kangaije izvi ngo zvinoitisa kuti mukuru wo masoca atume shamwari jake kuti jibvunje Jesu kuti: “Nanganyi izwi rimwe, muranda wangu anozopona.”—Luka 7:7.

Jesu anokahamara ngo kuzwa izvi zve anoti: “Mu Israeli, andizivi kuwana kutenda kwakakura inga uku.” (Luka 7:9) Shamwari jo mukuru wo masoca pajaihwirira kumuzi, jozwa kuti muranda wiya waihwajaya maningi, wari watamba.

Pasure po kurapa uku, Jesu anoshandisa mukana uwu kuti agondese kuti vaciripi vaJudha vakambhera ngo kuva no rutendo vanozokomborehwa. Iyena anoti: “Vazinji vanozoza, vecibva kumabvazuva no kumavirira, koha na Abrahama, Isaki na Jakobe mu Umambo hwo mugore.” Tingati kudini no vaJudha vacina rutendo? Jesu wonanga kuti ava “vanozokhandihwa kunja, kuno cidima; kondhoyo vanozorira no kugedesa-gedesa meno.”—Mateu 8:11, 12.

Ngo kudaro vaJudha vocibarihwe vacikatendi mukana unotanga kupuwa ivona, wo kuva divi ro Umambo pamwepo na Kristu vanozorambiwa. Asi vomajinja, tingati, vanozotendehwa kucamira meza yake mu “Umambo hwo mugore.”