Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 63

Mazano a Jesu ngo Pamusoro po Kukhugunya no Kushaisha

Mazano a Jesu ngo Pamusoro po Kukhugunya no Kushaisha

MATEU 18:6-20 MARCO 9:38-50 LUKA 9:49, 50

  • MAZANO NGO PAMUSORO PO KUKHUGUNYA

  • KUDARI HAMA IKASHAISHA

Jesu wabva kubesera vateveri vake kuti vanodikana kuva no murangariro wapi. Vanodikana kujivona inga vana mudoko, vanojidodokesa zve avana nduma. Vajiji vanodikana ‘kuashira vana vadoko ngo ndava yo’ zina ra Jesu. Vakaita kudaro, vari kutomuashiravo.—Mateu 18:5.

Vapostori vabva kuvereketesana ngo ndava yokuti ndiani mukuru pakati pavo, ngokudaro, zvingaita kuti vanorangarira kuti Jesu ari kuvavereketera ndizvona. Wari, mupostori Johani anobhuya ngo pamusoro po ciro cabva kuitika, eciti: “Tavona mundhu ecimbhirimbija mabjoka ngo zina renyu; tomurambisa, ngokuti asi wo dungwa redu.”—Luka 9:49.

Kunanga kuti Johani anorangarira kuti vapostori basi ngo vano simba ro kurapa kana kugogomera madhimoni here? Kudari ndizvona, muJudha uu anozokwanisisa kudini kugogomera mujimu jakashata? Zvinovoneka kuti Johani ari kuvona kuti mwanarumewo aadikani kuita mabasa ano simba ngokuti aaripi kuperekeja Jesu no vapostori.

Zvinokahamaja Johani ngo zvokuti Jesu anoti: “Mucamurambisa; ngokuti apana mundhu anoita muxamaiso mu zina rangu, wondirevera bzakaxata. Ndiani acingarhwisani na itisu, ari divi redu. Ndiani anomupa komeci imwe yo kumwa ngokuti muri vaKristu, ndinomubvunja bzakadi kuti aazoruzi mupocero wake.”—Marco 9:39-41.

Ngokudaro, mwanarumewo aadikani kufamba na Kristu kuitira kuti anangwe kuti ari kudivi ra Jesu. Ungano yo ciKristu icada kuumbwa. Ngokutama kwake kufamba na Jesu, azvirevi kuti iyena i muvengi kana kuti ari kumusijira kunamata ko kunyepa. Zvinovoneka kuti mwanarume uu anotenda zina ra Jesu, zve zvinonangari Jesu zvinokhombija kuti aazoruzi mupfupo wake.

Ngo divi rimweni, zvaizoshata maningi kudari mwanarume uwo akakhugunyika ngondava yo zviito no magama o vapostori. Jesu anoti: “Ndiani anoxaixisa cimwe co bzivana ibzi bzinotenda, bzaifanera kumusungira gwiyo mu musipa no kumukhandira mu jombe.” (Marco 9:42) Perepo, Jesu anobvunja vateveri vake kuti vanodikana kubvisa ciricese cinosisira maningi, cakadari inga nyara, murenje kana jiso, kudari cecivaitisa kuti vashaishe. Zviri nane kutama kuva no ciro cinodiwa, cakadari inga izvi, kakunghwina mu Umambo hwa Mwari kuciripi kugara naco, wozoenda mu Gehena (Muterero wo Hinomi). Kangaije vapostori vakauvona muterero uu phedo no Jerusarema, kwaisvejehwa rishu. Ngokudaro, vakazwisisa kuti muterero uu unoimirira kuparajwa ko mbhera narini.

Jesu anovangwaja kudari: “Basopanyi, mucanyenya umwe wo bzivana ibzi. Ndinomubvunja bzokadi kuti ngirozi javo jiri pa nyasi pa Baba vo mugore nguva jese.” “Bzivana ibzi” zvinosisira zvakadini kuna Babake? Jesu anobhuya ngo pamusoro po mundhu ano 100 ro mabvuta asi rosvejeka  rimwe rao. Mundhu uu anosiya 99 woenda kopsaka rimwe riya, zve anodakara maningi paanoriwana kupinda kudakara kwaanoita ngo 99 akasaraya. Jesu anoengejera kudari: “Kuda ka Baba wangu vo mugore kokuti citame kupsejeka na cimwe co bzivana ibzi.”—Mateu 18:10, 14.

Kangaije acirangarira kuvereketesana ko vapostori vake ngo pamusoro pokuti ndiani anozova mukuru, Jesu anoti kovari: “Ivanyi no munyu mukati menyu. Raramanyi ngo kunyarara ngocenyu.” (Marco 9:50) Munyu unoita kuti zvokuha zvinake. Munyu wo kuezanisira unoita kuti zvireruke kutendera zvinonanga vamweni zve unobesera kuti pave no runyararo, hucikatenderi kuti pawanike kuvereketesana.—VaKolosi 4:6.

Mukuvo umweni kunobuda zvineso, zve Jesu anonanga kuti zvineso izvi zvinotongeswa kudini. Iyena anoti: “Hama yako ikakuxaixira, ipangirei mu uviri hwenyu. Kuti ikakuzwira, waponesa hama yako.” Zvicinyi zvinozoitika kudari ikatama kuzwira? Jesu anoti: “Torai dombo rimwe, dangani maviri kuti ndava yese izotongwa ngo mazwi o matombo maviri dangani matatu.” Kudari zvikatama kutonga shwiroyo, vanodikana kubhuya no ‘ungano,’ kana kuti, vakuru vakagajwa vo ungano, vanokwanisa kutema civaringo. Zvicinyi zvinozoitika kudari hameyo ikatama kuzwira vakuru? Jesu anoti: “Unozoivona inga munyikanja nokuti muxaixi,” zvinoti vashabisi, vacikashamwanijani weya no vaJudha.—Mateu 18:15-17.

Vavonereri vo ungano vanodikana kubatisisa Soko ra Mwari. Kudari vakavona kuti mushaishi ano ndava zve anodikana kupangihwa, kutongwa kwake ‘kunozosungwa mugore.’ Asi povanovona kuti aana ndava, kutongwa kwake ‘kunozosujunuhwa mugore.’ Ndhungamiriro iji jinozobesera maningi panozoumbwa ungano yo ciKristu. Ngo pamusoro po kutonga shwiro jakadari, Jesu anoti: “Panosongana vaviri, dangani vatatu, mu zina rangu, ndiripovo inini pakati pavo.”—Mateu 18:18-20.