Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 51

Kuurawa ko Mundhu pa Kuceukijwa ko Njiku yo Kubahwa

Kuurawa ko Mundhu pa Kuceukijwa ko Njiku yo Kubahwa

MATEU 14:1-12 MARCO 6:14-29 LUKA 9:7-9

  • HERODHI ANOITA KUTI JOHANI MUBHABHATIJI AGUHWE MUSORO

Vajiji va Jesu povanoita mushando wavo mu Garireya, Johani mubhabhatiji, wakaitaya kuti Jesu azivike, aana rusujunuko hwo kuzviitavo. Oita makore maviri naari mu jeri.

Johani wainga akananga pambhene kuti Mambo Herodhi Antipa wakaita zvakashata ngo kutora Herodhia mukaji wa Firipi, munukunake Herodhi kuti ave mukaji wake. Herodhi wakarambana no mukaji wake wokutanga kuitira kuti arovore Herodhia. Mukuzwirana no Mutemo wa Mosi, waanonanga Herodhi kuti ari kuutevera, mucadho uu ngo wouhure zve autendehwi. Ngo kuhwajihwa ngo zvakanangari Johani, Herodhi wakamudira mujeri, kangaije ngo kuvangijihwa ndi Herodhia.

Herodhi aacizivi caangaitira Johani, ngokuti vandhu ‘vanomuvona inga muporofeti.’ (Mateu 14:5) Asi Herodhia aakanakani. Iyena ano “uxungu ndiyena,” zve anoda kuti aurawe. (Marco 6:19) Zve wari wazouwana mukana wo kuzviita.

Pa mukuvo mushomani icito yaguma Phasika yo gore ro 32 N.V.Y., Herodhi anonasirira mabuso makuru o kuceukija njiku yo kubahwa kwake. Vakuru-kuru vo muutongi hwa Herodhi, vakuru vo cikwata co masoca, no vandhu vamweni vanoreremejwa vo Gariteya, varipovo pa mabuso aya. Paanoitwa mabuso aya, Saromee, mwana wokaji wa Herodhia waakabara na Firipi, anotamba kuitira kuvaraija vakokwa. Vanarume ava vanodakajihwa maningi ngo matambiro aanoita.

Herodhi acidakajihwa maningi ngo musikana uu, anomubvunja kuti: “Ndikumbirei bzo unoda, ndinozokupa.” Iyena anomupikira eciti: “Bzese bzo unozondikumbira ndinozokupa, pikija bindikati ro umambo hwangu.” Saromee acito adavira, anoenda kobvunjisa make kuti “ndokumbira cinyi?”—Marco 6:22-24.

Mukana uu waipsakwa maningi ndi Herodhia. Ngo kukasika, anodavira kuti kumbirai “musoro wa Johani Mubapatizi.” Saromee anohwirira ngo kukasika kuna Herodhi no cikumbiro cake, wonanga kuti: “Ndinoda kuti mundipe wari, mu ndiro, musoro wa Johani Mubapatizi.”—Marco 6:24, 25.

Herodhi anohwajihwa maningi ngo cikumbiro ici, asi vakokwa vazvizwa aciitira mbhiko Saromee. Iyena anopseruka maningi ngo kutama kuita zvaapika, pikija kuti zvinotobatanija kuuraya mundhu acina ndava. Ngokudaro, Herodhi anotuma murindi kuti auraye Johani. Murindi anoviya ngo kukasika no musoro wa Johani uri mundiro. Iyena anoupekeja Saromee, woendavo koupekeja make.

Vajiji va Johani povanozwa zvaitikari, vanoviya votora mutembo wake voenda kouviga. Perepo vosumuriravo Jesu zvaitikari.

Herodhi anozothya maningi paanozozwa kuti Jesu ari kurapa vandhu no kugogomera madhimoni. Anojibvunjisa kuti si dangani Jesu, mundhu ari kuitari izvi, ndi Johani Mubhabhatiji, wari “wakamuka ko vakafa.” (Luka 9:7) Ngokudaro, Herodhi anova no cidaka-daka co kuvona Jesu. Asi aadi komuzwa acicumaira. Anoda kovona kuti Jesu ndiena Johani kana kuti haiwa.