Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 40

Cijijo co kuregerera

Cijijo co kuregerera

LUKA 7:36-50

  • MWANAKAJI MUSHAISHI WOZOJA MAFUTA MU MAKUMBO A JESU

  • KUREGERERA KUNOFANANIJWA NO GAVA

Vandhu vanoashira ngo njira jakasiana-siana ku zviro zvinojijiswa ndi Jesu no zvaanoita, zvecifira ngo mushovo wo mwoyo wavo. Izvi zvinonasa kujekeswa pamuzi umweni ku Garireya. MuFarisi umweni waidaninjwa kuti Simoni, wokoka Jesu kuti aviye kuzoha vese, kangaije kuti anase kuziva ushoni mundhu ari kuitari mabasa anoshamaisa. Jesu anoziva kuti uwu ungava mukana wo kucumaera vanonga variyo. Ngo kudaro, wotendera mukoka uwu. Iyena wainga akambotenderazve kuha no vashabisi zve no vashaishi pa mukuvo umweni.

Asi Jesu aaripi kuashihwa ngo mwoyo wese inga maashirihwe anoithwa vandhu vakokwa. Mu zvitaka zvinobukuta zvo ku Parestina, mundhu waifamba akasimira magwada, murenje jake jaipsa ngo zuva zve jaizara ngo bukuta. Ngo kudaro vainga no cirovejeso co kusuka murenje jo mundhu anoguma, ngo kumwa yakatondhoro perepo vomuashira ngo kumupsombza. Asi Jesu aaitihwi zvese izvi. Vaingazve no cirovejeso co kuzoja mafuta bvuji ro mundhu wakokwa kuti vakhombijire kuashira kwavo varendo, asi avazivi kuzviitiravo Jesu. Waro kuashihwa kwake kuri kwapi?

Wari voda kuha, vakokwa vakagara kumeza. Pavanonga veciha mwanakaji umweni acizivi kukokwa wonghwina mu cifise-fise. Mwanakaji uwu “wakazivika inga muxaixi.” (Luka 7:37) Vandhu vese vacizivi kukwana i vashaishi, asi mwanakaji uwu ano mararamire akashata, kangaije basa rake ngo ro kuhura basi. Zvingaita kuti iyena wakazwa zvajijiswa ndi Jesu, kubatanija no mukoka wakaita Jesu wokuti: “Izanyi kondiri mwese makaremba, munoremehwa kukuru. Inini ndinozomuzoroja.” (Mateu 11:28, 29) Zvingaita kuti masoko a Jesu no mabasa ake zvakaita kuti mwanakaji uwu amupsake.

Iyena wakaguma ngo sure kwa Jesu pa meza zve wogwadama ngo kumurenge jake. Musoji jake jecisvakatika panyezuru po mureje ja Jesu, zve anojipukuta ngo bvuji rake. Mwanakaji wopsombza soka jake ngo kupfava kwese perepo wojizoja mafuta anonuhira aaviisa. Simoni wozvisota ecizvishora zve worangarira kudari ngo mu mwoyo make: “Mundhu uu, naainga muporofeti, waizobziziva kuti ndiani mwanakaji anomupsasari no maponero ake akaxata.”—Luka 7:39.

Eciziva zviri kurangarira Simoni, Jesu wonanga kuti: “Simoni, ndino ciro condinoda kukubvunja.” Iyena wodavira kuti: “Nanganyi, mujijisi!” Jesu woenderera mberi eciti: “Muxongesi umwe wainga no vandhu vaviri vaiva no magava o mare nayena. Umwe wakaxonga mazana maxanu o mare, umweni bofana basi. Ngo kutama kwavo mare yo kumuhwirijira, vakaregerehwa. Ngo wapi wavo anozodisisa muxongesi?” Eciita inga acikadi Simoni anoti: “Inini ndinorangarira kuti uwo wakaregerehwa bzizinji.”—Luka 7:40-43.

Jesu wotenderana nae, zve wobvunja Simoni kuti: “Unovona mwanakaji uu? Ndanghwina mu nyumba yako, auzivi kundipa kumwa yo kusamba soka; kaveta yena wandisambija soka ngo musoji no kujipukuta ngo bvuji. Auzivi kundimpsompsa, kaveta yena cingobzo ndanghwina muno, aazorori ngo kumpsompsa soka jangu. Auzivi kundizoja musoro ngo mafuta, kaveta yena wandizoja soka ngo mafuta okunuhira.” Jesu wazvibata kuti mwanakaji uwu wakhauya maningi kamare ngo mugariro wake wakashata. Ngo kudaro iyena wakapejisa eciti: “Bzixaixi bzake bzakawanda bzakungurihwa, ngokuti wadisisa. Kaveta wiya anokungurihwa padoko, anodisa padoko.”—Luka 7:44-47.

Jesu aaripi kuinikira mufambiro wakashata. Iyena ari kuvonesa kuti usizi hunoitisa kuti iyena azwire unyasha vayani vanoita cishaishi cakakura, asi vokhombija kukhauya kamare voenda mbhera ka Kristu kopsaka kutondhojwa. Mwanakaji uwu anotondhojwadi kamare paanozwa Jesu ecinanga kuti: “Bzixaixi bzako bzakungurihwa. . . . Kutenda kwako ngo kwakuponesa. Pindai no kunyarara.”—Luka 7:48, 50.