Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 46

Kuraphwa ngo Kubata Nguvo ya Jesu

Kuraphwa ngo Kubata Nguvo ya Jesu

MATEU 9:18-22 MARCO 5:21-34 LUKA 8:40-48

  • MWANAKAJI WAKARAPHWA NGO KUBATA NGUVO YA JESU

Masoko ngo pamusoro po kuviya kwa Jesu mu ndharaundha yo Dhekapori anondhandhanika ku vaJudha vaigara ngo mumbhiripiri mo Jombe ro Garireya. Zvingathuka zvaita kuti vazinji vainga vazwa kuti Jesu wakanyaraja dutu no mavimbi pa zibepo rainga rabva kuitika. Vamweni vainga vazwa kuti Jesu wakagogomera madhimoni ainga akafuka vanarume vaviri. Ngo kudaro, “mutungwa wo vandhu” vakaungana ngo mu muserengende mo jombe, kangaije kumutundhu wo ku Kafarnaume, kuti vaashire Jesu. (Marco 5:21) Paanobzuka, vandhu vari kuvetera no cidaka-daka cese.

Umwe ari kuthimwa-thimwa ngo kuda kuvona Jesu ndi Jairosi, umwe wo mutungamiriri wo sinagoga, kangaije ro mu Kafarnaume. Iyena wogwadama panyasi pa Jesu wodeketera kakawanda maningi, eciti: “Mwana wangu wokaji ari kufa. Vianyi komucanjikira nyara, kuti aponeswe, ararame.” (Marco 5:23) Cicinyi caanoita Jesu ku cikumbiro co mwoyo wese ici cinoithwa ndi Jairosi kuti abesehwe ngo mwanake umwe basi? Iyena anomakore 12 basi o kubahwa zve anodiwa maningi ndi babake.—Luka 8:42.

Paainga ecienda kumuzi kwa Jairosi, Jesu wakasongana no mugariro umweni waizwisa urombo. Vandhu vazinji vainga veciperekeja Jesu vari kunyaukihwa ngo kuda kuvona Jesu eciita mushamaiso umweni. Asi mwanakaji umweni ari kukaya-kaya ngo pamusoro po ndhendha yaimutambuja maningi.

Mwanakaji muJudha uwu, wainga no cineso co kusvasvama ngazi ko makore 12. Iyena wakapsaka madhokodheya o mushovo wese zve wakashandisa mare yake yese kuti dangani zvinoita nane, asi apana caakakwanisa. Zve ndhendha yake ‘yaitonyanyisa.’—Marco 5:26.

Zvinozika kuti kunja ko kumurembesa basi, ndhendha iyi yaimupseruja. Kanzinji ndhendha iyi ainanghwi maningi pakazara vandhu. Cimwenizve nga ici, Mutemo wa Mosi waireva kuti kusvasvama ngazi kwaiitisa kuti mwanakaji avoneke inga wakasvipiswa pa mukuvo wondhowo. Mundhu waimupsasa kana kupsasa nguvo yakakhatika ngo ngazi, iyena waidikana kusamba zve waivoniwa inga mundhu wakasvipiswa mbhera kuite usiku.—VaLevi 15:25-27.

Mwanakaji uwu ‘Naazwa ngo zva Jesu,’ wari wotanga kumupsaka. Ngo pamusoro po kusvipiswa kwake, iyena anofamba ngo pakati po vandhu vazinji kuti vandhu vazinji vatame kuzvibata. Anonanga kudari ngo mumwoyo: “Ndikamupsasa, pikija rupiko hwo bzokusimira bzake, ndinozovanga.” Paanopsasa rupiko hwo nguvo ya Jesu mwanakaji uwu anozwa kuti ‘wakarapika ndhenda yake.’—Marco 5:27-29.

Ngo kudaro Jesu wobvunjisa kuti: “Ndiani wandipsasa?” Munorangarira kuti mwanakaji uwu anozwa kudini paanozwa mubvunjo uwu? Pedhru wobvunja Jesu inga ari kumushora eciti: ‘Mbungano yo vandhu ngo iri kumupsinya no kumupsasa.’ Waro ngenyi Jesu wabvunjisa kuti, “Ndiani wandipsasa?” Jesu wodurujira kuti: “Aripo wandipsasa, ngokuti ndazwa kubuda simba kondiri.” (Luka 8:45, 46) Kurapa kwaitari Jesu kwaita kuti simba rake ribude.

Mwanakaji uwu paanovona kuti Jesu wazvibata, mwanakaji wogwadama pamberi pa Jesu ecindhya-ndhya ngo kuthya. Iyena wonanga zvese ngo pamusoro po ndhendha yake pamberi po vandhu vese zve wonanga kuti yatopera. Jesu womunyaraja ngo kupfava mwoyo eciti: “Mwana, kutenda kwako kwakuponesa. Endai ngo kunyarara. Rapikai ndhenda yako.”—Marco 5:34.

Ngo kudaro zviri pambhene kuti wiyani wakasanwa ndi Mwari kuti atonge pasi pano, i mundhu ano rudo zve anozwira unyasha, zvo kuti kunja ko kukaya-kaya ngo pamusoro po vandhu iyena ano simba ro kuvabesera.