Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 44

Jesu Anonyaraja Zibepo mu Jombe

Jesu Anonyaraja Zibepo mu Jombe

MATEU 8:18, 23-27 MARCO 4:35-41 LUKA 8:22-25

  • JESU ANONYARAJA ZIBEPO MU JOMBE RO GARIREYA

Jesu watakatira ecishanda zve waremba maningi. Zuva parinovira, Jesu anobvunja vajiji vake kuti vabude mu Kafarnaume eciti: “Ngatiambuke mwombera.”—Marco 4:35.

Ngo kumabvazuva ko Jombe ro Garireya, kuno mutundhu wo vaGerasa. Ndau iyi inozivikavo ngo kuti Dhekapori. Madhorobha o kudhekapori, ainga cine ro mutambo wo ciGiriki, pikija vaJudha vazinji veciwanikemovo.

Jesu anovoneka ngo vandhu paanobuda mu Kafarnaume ngokuti ngarava jimweni jaiambukavo ngo mujombe mondhomo. (Marco 4:36) Asi mumango uwu aucairebepi maningi. Jombe ro Garireya igandhwa ro kumwa icina munyu. Kureba kwaro kunokhwedera kuita 21 o makirometro no 12 o kupambhama kwaro. Asi rakajika.

Pikija Jesu wainga akakwana, zvinozika kuti waremba ngo mushando wake. Waro ngarava painotanga kufamba, iyena anovata pa mucago pa mberi po ngarava (pa dhambra).

Vapostori vamweni vaikwanisa ushoni kubvutha ngarava, asi hwendo uhu hunozovanesa maningi. Kuno matundhu akatendeneja Jombe ro Garireya, zve kumwa yo panyezuru mu jombe iri, inojiya. Nguva jimweni, mbhepo inotondhora inobva ngo mumatundhu umu, ikasongana no kumwa inojiya yo mujombe, izvi zvinobara mavimbi amweni acikaiti. Ngo kukasika rotanga zihucu-hucu. Mavimbi ari kutaka ngarava, zve “vainga voda kundondomera.” (Luka 8:23) Pikija zvakadaro Jesu ari kundovata.

Vecieja mazano ese ovaiziva pa ngozi jakadari, vabvuthi vo ngarava vanoperehwa ngo zano ro kucijikira ngarava. Ngokuti zvainga zvasiana kamare. Ngo kuthya kufa, vanomusa Jesu veciti: “Tenji, tiponesenyi; topera.” (Mateu 8:25) Vajiji vaithya kufira mujombe.

Jesu paanomuka anobvunja vajiji vake kuti: “Munothya ngenyi, vandhu vokutenda padoko?” (Mateu 8:26) Ngo kudaro, Jesu wobvunja mbhepo no Jombe kuti: “Nyararai, thivai!” (Marco 4:39) Zibepo riya ronyarara zve Jombe rogajana. (Marko na Ruka vanobhuya ngo ciitiko cinoshamaisa ici. Cokutanga, vanogogomejera kuti Jesu anonyaraja mavimbi ngo njira inoshamaisa, perepo vonanga ngo kutama gonda rakavanga ko vajiji vake.)

Rangariranyi mazwire ari kuita vajiji vake! Ivona vabva kuvona jombe rakanyangajwa zvokuti izanyi muzovona. Asi wari ranyarara. Vakabathwa ngo kuthya kucikaiti. Vanotanga kukhwenana veciti: “Ndiani uu, kuti mbhepo no jombe bzinomupurukira?” Perepo voguma ushoni ku mwombera umweni wo jombe. (Marco 4:41–5:1) Zvingaita kuti ngarava jimweni jakafundha, kakuhwirirazve kumavirira ko jombe.

Azvidakajisi here kuziva kuti Mwana wa Mwari anokwanisa kuvonerera simba ro magariro o kunja? Nyika yese painozova munyara make kamare, mu utongi hwake, vandhu vese vanozorarama no rugarisiko, ngo kuti akucazovi no ngozi jinoitika jega.