Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 23

Jesu Anoita Mabasa Makuru mu Kafarnaume

Jesu Anoita Mabasa Makuru mu Kafarnaume

MATEU 8:14-17 MARCO 1:21-34 LUKA 4:31-41

  • JESU ANOGOGOMERA DHIMONI

  • VAMBIYA VA PEDHRU VANORAPWA

Jesu wakoka vajiji varongomuna—Pedhru, Andereya, Jakobo na Johani—kuti vave vatandi vo vandhu. Wari maa Musabudu, zve vese vanoenda ku sinagoga yo ku Kafarnaume. Jesu anojijisa mu sinagoga, zve vandhu vanokahamarazve ngo majijisiro ake. Iyena anozviita inga mundhu anotendehwa ngo mutemo, mukusiana no zvinoitwa ngo vatari.

Musabudu iri, pana mwanarume ano dhimoni. Naari mu sinagogemo, anomima ngo izwi guru eciti: “Unenyi kotiri, Jesu muNazareta? Waza kotipeja, kani? Ndinoziva kuti uri ani: Wokucena wa Mwari.” Jesu anovereketera dhimoni rinotungamirirari mwanarume uu, eciti: “Nyararai. Budai mu mundhu uu.”—Marco 1:24, 25.

Ngo izvowaro, dhimoni riya rinomuburukutisa recimima ngo izwi guru. Asi dhimoni iri rinobuda pa mundhu uu “ricikazivi kumuitira bzakaxata.” (Luka 4:35) Vandhu vakamutendeneja mu sinagogemo vanokahamara maningi ndizvona! Ivona vanobvunjisana veciti: “Cinyi ico? Nga aya majijisiro mapsa ano mutengo. Yena anotonga no mabjoka omupurukira.” (Marco 1:27) Masoko ngo pamusoro po ciitiko co kushamaisa ici anozara mu Garireya mwese. Izvi zvinotikahamarisa here? Haiwa.

Jesu no vajiji vake vanobuda mu sinagoga voenda kumuzi ka Simoni Pedhru. Povanogumeyo, vambiya va Pedhru vanonga vacihwaja maningi ngo fobiri. Vanokumbira Jesu kuti avabesere. Jesu anoenda kovari, wovabata ngo nyara no kuvamusa. Ivona vanorapika ngo kukasika zve votanga kushandira Jesu no vajiji vake, kangaije ngo kuvabikira zvokuha.

Zuva no roda kubira, vandhu vo kumativi ese vanoviisa kumuzi ka Pedhru vatenda vavo. Zvinovoneka kuti vandhu vese vo mudhorobhemo vanozara ngo kukasika pamuzi pa Pedhru. Ngenyi? Ngokuti vanoda kurapwa. Zvokadi kamare, ‘vese vainga no vatenda vo mufumbo wese wo ndhenda, vaivia kuna yena. Yena ecivacanjikira nyara zve anovarapa.’ (Luka 4:40) Inga zvakaphorofitwa, Jesu anovarapa azvinenyi kuti ndhendha yavo yakakurisa kudini. (Isaia 53:4) Iyena anotosujunura vakagahwa ngo madhimoni. Pojinobuda mujimu jakashata iji, jinomima jeciti: “Iwewe uri Mwana wa Mwari!” (Luka 4:41) Asi Jesu anomavereketera zve aamatenderi kuti anangezve ciro. Iwona anozviziva kuti Jesu ndi Kristu, zve Jesu aadi kumavona acicengejera kuti ari kushandira Mwari wokadi-kadi.