Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 29

Mundhu Angaita Mabasa Aushoni ngo Musabudu Here?

Mundhu Angaita Mabasa Aushoni ngo Musabudu Here?

JOHANI 5:1-16

  • JESU ANOCUMAIRA MU JUDHEYA

  • ANORAPA MUNDHU ANOHWAJA PA GANDHWA

Jesu wakakwanisa kuita zvakawanda maningi paaita mushando wake mu Garireya. Asi ngo kunanga kuti, “ndinodikana kutokotesa masoko akanaka o Umambo hwa Mwari mu nyika yese,” Jesu aacairangarira Garireya basi. Ngokudaro, anoenda kocumaira “mu masinagoga ese o Judeya.” (Luka 4:43, 44) Izvo zvinoita ngokuti caacirimo zve dhiri ro Jerusarema raaphedo kuti riitwe.

Tikaezanisa no zvatinoverenga ngo mushando wa Jesu mu Garireya, mavhangeri aabhuyi zvizinji ngo pamusoro po mushando wake ku Judheya. Pikija kuti vandhu vazinji mu Judheya avadakariri masoko ake, Jesu aaregeri kucumaira ngo simba kuri kwese kwaanoenda.

Ngokukasika, Jesu anoenda Jesusarema, ku dhorobha guru ro Judheya, ku Phasika yo mu gore ro 31 N.V.Y. Phedo no Gedhe ro Mabvuta, panowanika gandhwa guru rinodanijwa kuti Bhezatha. Vazinji vanohwaja, mapofu no vakaremara vanoenda pa gandhwa iri. Vanoenderenyi? Ngokuti vanotenda kuti vandhu vanorapika ngo kunghwina mu gandhwemo poinobvunduhwa kumwa yaro.

Wari i Musabudu, zve Jesu anovona mwanarume ari pa gandhwa iri, waano 38 o makore acihwaja. Jesu anomubvunjisa kudari: “Unoda kurapwa?” Iyena anodavira kuti: “Tenji, andina mundhu anondibumija mu mwimbo, apo kumwa yecibvunduhwa. Mukuvo wo ndinoda kusedera inini, umweni anotungamira kunghwina.”—Johani 5:6, 7.

Jesu anobhuya ciro cinokahamaja mwanarume uu no ariwese ari ngo phedopo. Anonanga kuti: “Mukai, utore bonde rako ufambe.” (Johani 5:8) Mwanarumewo anoita zvaabvunjwaro kamare. Anorapika ngo kukasika, wotora bonde rake zve wototangadi kufamba!

Kusiyapo kudakara ngo mushamaiso waitikari, vaJudha vanovona mwanarume uu zve votanga kumupsakira ndava vaciti: “Nyamasi, i sabudu: autendehwi kuthwara bonde.” Mwanarume uu anovadavira kuti: “Wiya wakandirapa wakandibvunja kuti: ‘Torai bonde rako, ufambe.’” (Johani 5:10, 11) VaJudha ava vari kushora mundhu anorapa waro ngo Musabudu.

Ivona vanoda kuziva kuti, “Ndiani wakakubvunja: ‘Torai bonde rako, ufambe’?” Ngenyi vanobvunjisa mwanarume uu kudaro? Ngokuti Jesu anonga “area pa gungano,” zve mwanarume warapwari aarizivi zina ra Jesu. (Johani 5:12, 13) Asi mwanarume uu anozosonganazve na Jesu. Pamukuvo unotevera, anosongana na Jesu mu themberi woziva kuti ndiyena wakamurapa pa gandhwa riya.

Nyakaurapwa uu anovona vaJudha vakamubvunjisaya kuti wavangisa kudini. Wovabvunja kuti ndakarapwa ndi Jesu. VaJudha vanoenda kuna Jesu. Kureva kuti vari kuda kuziva kuti anokwanisisa kudini kuita zviro zvinoshamaisa zvakadari here? Andizvopi. Vanoenda komupsakira ndava ngo kuita kwake zviro zvaushoni ngo Musabudu. Zve vanototanga kumuteverera!