Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 52

Kuhisa Mbungano ngo Mukate no Hove Nganani

Kuhisa Mbungano ngo Mukate no Hove Nganani

MATEU 14:13-21 MARCO 6:30-44 LUKA 9:10-17 JOHANI 6:1-13

  • JESU ANOHISA ZVIURU 5 ZVO VANDHU

12 ro vapostori vakadakara maningi ngo kucumaera mu Garireya mwese zve ivona vakavia vobvunja Jesu “bzese bzovainga vakaita no kujijisa.” Ivona vainga vakaremba. Asi, avana no nguva kuti vahe ngokuti vandhu vazinji vaiviya vamweni vecipinda. Ngokudaro Jesu anoti: “Vianyi mega pa ndau icina vandhu, muzorore padoko.”—Marco 6:30, 31.

Ivona vanonghwina mu ngarava, kangaije phedo no Kafarnaume zve vanoenda ku ndau yakafishika padoko ngo kumabvazuva ko Murambo wa Jorodhani ngo divi rimweni ro Bhetsaidha. Asi, vandhu vazinji, vanovavona vacibuda zve vamweni vanozvizwavo zvondhozvo. Vese vanogogoma ngo mubhiripiri mo murambo zve vanotanga kugumeyo.

Jesu paanobzuka mu ngarava, anovona mbungano zve anoizwira unyasha, ngokuti vaiita inga mabvuta acina muhavisi. Ngokudaro iyena anotanga “kuvajijisa bziro bzizinji” ngo pamusoro po Umambo. (Marco 6:34) Iyena anotorapavo “vese vaida kurapwa.” (Luka 9:11) No pakhirira mukuvo anotikuti, vajiji vake vanomubvunja kudari: “Pano pa bani. Nguva yakhirira. Pindisai vandhu vaende mu guta kotenga bzokuha.”—Mateu 14:15.

Jesu anopingura kuti: “Abzidikani kuti vapinde. Vapenyi bzokuha imwimwi.” (Mateu 14:16) Pikija Jesu waiziva zvaaida kuita, iyena anoeja Firipi ngo mubvunjo uu: “Tinozotengera kwapi mukate yokuti ava vahe?” Firipi waikuziva, ngokuti iyena wairaramira phedo no Bhetesaidha. Asi, kootenga mukate azvicaizobesera ciro. Painga no zviuru 5 zvo vandhu. Zve no kwainga kuverenga vanakaji no vana, civerengo ici caizopethwa kaviri! Firipi anodavira kudari: “Mazana maviri o mare aakwani kuvatengera vandhu vese mikate, yokuti vahe padoko.”—Johani 6:5-7..

Kangaije kuitira kuvonesa kuti azvicaizokwanisika kuhisa vese, Andereya anoti: “Ari pano mufana ana mukate muxanu no hove mbiri. Kaveta mbzinyi ibzi ku vandhu vakawanda kudari?”—Johani 6:9.

Phasika yainga yapera, mu gore ro 32 N.V.Y., zve ndhonve iri kupfikitira. Jesu anokumbira vajiji vake kuti vaite kuti vandhu vese vaite zvikwata zvo 50 no zvo 100. Iyena anobata mukate mushanu jiya no hove zve wobongesera kuna Mwari. Perapo anogura mukati no hove jiya. Jesu anozvipa vajiji vake kuti vakovanise vandhu. Zvinoshamaisa ngo zvokuti, vandhu vese vanoha zve vanoguta!

No zvapera, Jesu anobvunja vajiji vake kuti: “Bojeranyi matimbu asararo, kuti ritame kupsejeka na rimwe.” (Johani 6:12) Ivona vanokwanisa kuzaja zvitengu zvinokwana 12!