Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 55

Masoko a Jesu Anonyangaja Vakawanda

Masoko a Jesu Anonyangaja Vakawanda

JOHANI 6:48-71

  • KUHA MUVIRI WA JESU NO KUMWA NGAZI YAKE

  • VAZINJI VANOKHUGUNYIKA VOSIYA KUMUTEVERA

Jesu ari kujijisa ngo pamusoro po kuva kwake mukate wokadi-kadi unobva mugore, mu sinagoga yo Kafarnaume. Zvinovoneka kuti iyena wainga ecienderera mberi ecibhuya masoko aakabvunjaya vandhu vokubva kumabvazuva ko Jombe ro Garireya, vakaha weya mukate no hove jakanasirihwaya ndi Jesu.

Jesu anoenderera mberi aciti: “Majibaba enyu akaha ‘mana’ mu bani ro bzipare, ofa.” Mukusiyana, iyena anoti: “Ndini mukate wo kupona unoderuka mugore: kudari mundhu akaha mukate uu, anozorarama kucingaperi; kuperapo mukate wo ndinozomupa inini, ndi wona muviri wangu, kuti vandhu vese vararame.”—Johani 6:48-51.

Mu mazuva o Phasika yo mu gore ro 30 N.V.Y., Jesu wakabvunja Nikodemo kuti Mwari wakadisa maningi nyika, wotuma Mwanake inga Muponesi wayo. Jesu wari ari kukohomejera dikano yo kuha muviri wake ngo kugonda muripo waanozoita. Iri ndirona rega gwanja ro kuwana upenyu hucikaperi.

Asi, vandhu avatenderani no zvinonangari Jesu. Ivona vanobvunjisa kuti: “Anotipa kudini muviri wake kuti tihe?” (Johani 6:52) Jesu anoda kuti vazwisise kuti ari kubhuya ngo njira yo kuezanisira. Masoko ake anotevera anozozvijekesa ushoni.

“Mukatama kuha muviri wo Mwana wo mundhu, no kutama kumwa ngazi yake, amuzovi no uhomi mukati menyu. Ndiani anoha muviri wangu no kumwa ngazi yangu, anova no uhomi hucingaperi. . . . Ngokuti muviri wangu, kuha kwokadi-kadi; ngazi yangu kumwa yokadikadi. Ndiani anoha muviri wangu no kumwa ngazi yangu, anogara mondiri; ininivo mwaari.”—Johani 6:53-56.

VaJudha vari kuzwa izvi vanonyangajwa maningi ndizvona. Ivona vanongarira kuti Jesu ari kuvabvunja kuti vahe muviri wo mundhu kana kuti vaphwanye mutemo wa Mwari wo kuera ngazi. (Genesi 9:4; VaLevi 17:10, 11) Asi Jesu aaripi kunangadi kuha muviri kana kumwa ngazi. Iyena ari kunanga kuti vese vanoda kuva no uhomi hucingaperi vanodikana kugonda muripo waanozoita ngo kupira muviri wake wo mundhu wakakwana no kupopomejwa ko ngazi yake. Asi vajiji vake vazinji avaizwisisi jijiso iyi. Vamweni vanoti: “Mazwi aya anoremesesa! Ndiani anokwanisa kumapurukira?”—Johani 6:60.

Ngokuti Jesu anoziva kuti vajiji vake vamweni vari kun’gun’guta, anobvunjida kudari: “Ibzi bzinomukhugunya kani? Munozodini, kudari mukavona Mwana wo mundhu ecikhwira kuenda ku ndau yaaigara kare? . . . Mazwi o ndakamubvunja ngha mwiha no uhomi. Kaveta pakati penyu varipo vacikatendi.” Ngo kunanga kwake kudaro, vajiji vazinji vanopinda voregera kumutevera.—Johani 6:61-64.

Ngokudaro, Jesu anobvujisa vapostori vake 12 kudari: “Imwimwivo munodavo kupinda, kani?” Pedhru anodavira eciti: “Tingazoenda kwaani, Tenji? Imwimwi muno mazwi o uhomi hucingaperi. Itisuvo tinotenda no kubziziva kuti imwimwi muri Wakacena wa Mwari.” (Johani 6:67-69) Izvi zvinokhombija kugondeka kwakakura maningi. Ngokuti Pedhru no vapostori vamweni vanogara vakagondeka pikija kuti avaripi kuzwisisa zviri kujijisa Jesu pa shwiro iyi.

Pikija Jesu anodakajihwa ngo mupinguro wa Pedhru, iyena anoti: “Inini andizivi kumusana muri gumi na vaviri? Kaveta umwe wenyu ndi sathana [kana munyepi].” (Johani 6:70) Jesu ari kubhuya ngo pamusoro pa Judha Iskariote. Kangaije Jesu wainga wazvivona kuti Judha ari kutanga kuva no cido cakashata.

Kusiyapo izvo, Jesu anodakara maningi ngo kuziva kuti Pedhru no vapostori vamweni avazivi kumusiya zve vari kuita basa rinoponesa upenyu pamwepo nae.