Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 49

Jesu Anocumaira mu Garireya no Kuroveja Vapostori

Jesu Anocumaira mu Garireya no Kuroveja Vapostori

MATEU 9:35–10:15 MARCO 6:6-11 LUKA 9:1-5

  • JESU ANOTENDERERAZVE MU GARIREYA

  • ANOTUMA VAPOSTORI KOCUMAIRA

Jesu woita makore maviri akabatikana pa kucumaira. Wari waamukuvo wokuti asiye kucumaira wozorora here? Andizvopi. Jesu anoengejera kucumaira kwake ngo kufamba-famba “mu mutundhu no mizi yese [yo Garireya], ecijijisa mu masinagoga. Waitokotesa Vangeri ro Umambo, wairapa ndhenda no ndhwaji jese.” (Mateu 9:35) Zvaanovona zvinomukhohwesa kuti anodikana kuengejera basa ro kucumaira. Waro anozozviitisa kudini?

Jesu paanoita hwendo, anovona vandhu vanoda besero no kuembejehwa kumujimu. Ivona vakaezana no mabvuta acina muhavisi, ngokuti avacaitajwa ushoni zve vaipepesheka. Jesu anovazwira pena, wobvunja vajiji vake kudari: “Munda mukuru, kaveta vabati vaxoma. Kumbiranyi muno wo munda kuti atumire vabati ku munda wake.”—Mateu 9:37, 38.

Jesu anozviziva zvinozovabesera. Iyena anodanija vapostori 12, wovakasha vaviri vaviri, voita zvikwata zvitandhatu zvo vacumairi. Perepo wovapa ndhungamiriro iji: “Mucateveja njira jo vonyikanja, no kunghwina mu maguta o vaSamaria. Ambanyi kuenda kuno mabvuta akapsejeka o Nyumba yo vaIsraeli. Pomunopinda ndipona, tokotesanyi kuti Umambo hwo mugore huri phedo.”—Mateu 10: 5-7.

Umambo hwovanodari kocumaira ngo hwakanangwaya ndi Jesu pa mukumbiro wo kuezanisira. ‘Umambo huri phedo’ ngo njira yokuti Mambo wakasanwa ndi Mwari, Jesu Kristu, wapera kugajwa. Waro zvicinyi zvinokhombija kuti vajiji vake  ndi vaimiriri vo Umambo? Jesu anovapa simba ro kurapa vanohwaja no kutomusa vakafa, zve ivona avadikani kupagarisi ciricese. Waro vanozowanisa kudini zvinodiwa zvavo, zvakadari inga cokuha co njiku no njiku?

Jesu anobvunja vajiji vake kuti vatame kujinasiririra zviro zvo kunyama povanoenda kocumaira. Avadikani kutora goridhi, sirivha no utare mu maborosa avo. Avana dikano yo kutora mbuva kuitira hwendo no kutora nguvo kana makhwada o kuzocinja. Ngenyi avadikani? Jesu anovathembesa kuti “mubati wo basa anotojanira kuha.” (Mateu 10:10) Vajiji vanozowana vandhu vanodakarira vanovabesera ngo kuvapa zviro zvovacikadikani kutama. Jesu anoti: “Mukanghwina mu muzi uriwese, garanyimo mbhera ngo kupinda kwenyu.”—Marco 6:10.

Jesu anopazve ndhungamiriro ngo matangihwo anoitwa mabhuyo ngo pamusoro po masoko o Umambo no veno vomuzi, eciti: “Pakunghwina mu nyumba, icungamijenyi. Kudari nyumba yondhoyo ikanakira, runyararo hwenyu ngahuende koiri. Kudari icingafaneri, runyararo hwenyu ngahuhwirire komuri. Kudaro ariwese anotama kumuaxira no kuzwa mazwi enyu, pakubuda mu nyumbemo dangani mu mutundhumo, phumbujanyi bukuta ro mu soka jenyu.”—Mateu 10:12-14.

Zvinoitika kuti dhorobha rese kana ndharaundha yese yotoramba masoko avo. Waro zvicinyi zvinozoitika? Jesu anonanga kuti mutundhuwo unozotongwa zvakakura maningi. Iyena anoti: “Bzokadi ndinomubvunja kuti: Mu njiku yo kutongwa, nyika jo Sodoma no Gomora jinozowana matongero akareruka kupinda mutundhu wondhowo.”—Mateu 10:15.