Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 24

Jesu Anoengejera Mushando Wake mu Garireya

Jesu Anoengejera Mushando Wake mu Garireya

MATEU 4:23-25 MARCO 1:35-39 LUKA 4:42, 43

  • JESU ANOTENDERERA MU GARIREYA NO VAJIJI VAKE VARONGOMUNA

  • KUCUMAIRA NO MABASA A JESU ZVINOZIVIKANWA MWESE

Jesu no vajiji vake varongomuna vakavirihwa vakabatikana maningi mu Kafarnaume. Hwaausiku, vandhu vanotora vatenda vavo kuenda navo kuna Jesu kuti varapwe. Iyena aazivi kuwana mukuvo wakawanda wokuva ari ega.

Co mangwana fumi, kucakasvipa, Jesu anomuka wopsaka ndau yo kuva ega. Paanoiwana anoita mukumbiro kuna Babake naari ega. Asi aaiti mukuvo wakakura ari ega. Povanovona kuti Jesu aapo, ‘Simoni anoenda komupsanga pamwepo no vadoni vake.’ Kangaije Pedhru ngaanotungamirira pa kupsaka ngokuti Jesu wainga pamuzi pake.—Marco 1:36; Luka 4:38.

Povanomuwana Jesu, Pedhru anoti: “Vese vari kukupsanga.” (Marco 1:37) Zvinozwisisika kuti vandhu vo Kafarnaume avadi kuti Jesu apinde. Ivona vanodakara maningi ngo zvaita Jesu, ngokudaro vanoeja kumujivirira kuti “acadovasia.” (Luka 4:42) Waro Jesu wakaviya koita mushamaiso panyika pano jakadari inga jo kurapa here? Zve anozoita basa rake mu ndharaundha iyi basi here? Jesu anonangenyi ngo pamusoro pazvo?

Jesu anodavira vajiji vake kudari: “Ngatende ku divi rimweni ku mithundu yo cigarirano, kuti nditokoteseyovo Vangeri, ngokuti ndazira bzondhobzo.” Zvokadi makare, Jesu anotobvunja vandhu vanoda weya kuti atame kupinda kudari: “Ndinodikana kutokotesa masoko akanaka o Umambo hwa Mwari mu nyika yese; ngokuti ngo bzo ndakatumihwa.”—Marco 1:38; Luka 4:43.

Ndizvonadi, thangwe guru rakaitisa kuti Jesu aviye panyika pano ngo ro kucumaira ngo pamusoro po Umambo hwa Mwari. Umambo uhu ngo hunozocenesa zina ra Babake no kupeja zvineso zvese zvo vandhu mbhera narini. Ngo kuita mushamaiso, Jesu anokhombija kuti wakatumwadi ndi Mwari kamare. Mu mazana o makore akapera, Mosi wakaitavo mabasa makuru kuitira kukhombija kuti wainga wakatumwadi ndi Mwari.—Exodo 4:1-9, 30, 31.

Ngokudaro, Jesu no vajiji vake varongomuna vanobuda mu Kafarnaume kuti vaende kocumaira mu madhorobha amweni. Vajiji varongomuna ava ndi Pedhru no hama yake Andereya pamwepo na Johani no hama yake Jakobo. Pa sumana yakapera, vakakokwa ndi Jesu kuti vafambe nae mu basa rake.

Kutenderera kunoita Jesu acicumaira no vajiji vake varongomuna kunobudirira ushoni. Nduma yake inoguma ku mativi ese. “Kutokota kwake kwakaguma mu Síria mwese,” mu gumi ro madhorobha anodanijwa kuti Dhekapori, mbhera mwombera kumweni ko Murambo Jordhani. (Mateu 4:24, 25) Mbungano huru yo vandhu vo mundau ijo, pamwepo no vokubva Judheya, vanotevera Jesu no vajiji vake. Vandhu vazinji vanoviisa vatenda kuti varapwe. Jesu anovarapa no kugogomera mujimu jakashata ku vandhu vano madhimoni.