Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 38

Johani Anoda kuti Azwe ndi Jesu kuti Iyena ndi Mesia

Johani Anoda kuti Azwe ndi Jesu kuti Iyena ndi Mesia

MATEU 11:2-15 LUKA 7:18-30

  • JOHANI MUBHABHATIJI WOBVUNJISA NGO BASA RA JESU

  • JESU WOSIMBA JOHANI

Zvoita gore Johani Mubhabhatiji ari mukadheya. Pikija zvakadaro, iyena anozwa mabasa anoshamaisa a Jesu. Muri kukwanisa kuvona kuti Johani anozwa kudini paanozwa ngo vajiji vake kuti Jesu wamusa mwana wo noni ku Naimi. Asi Johani ari kuda kuzwa ndi Jesu pacake revo yo zvese izvi. Ngo kudaro wodainjisa vajiji vake vaviri kuti vaende kobvunjisa Jesu kuti: “Ndimwi, kani, wiya anozozari, nokuti tovetera umweni?”—Luka 7:19.

Mubvunjo uwu uri kuda kurevenyi? Johani i mundhu wakajipira pa kunamata, ndiyena wakabhabatija Jesu, mu makore maviri apera. Iyena wakavona mujimu wa Mwari wecibzuka panyezuru pa Jesu, zve wakazwa izwi ra Mwari recinanga kuti uwu ndi mwana wangu. Atina mathangwe o kurangarira kuti rutendo hwa Johani huri kuderera. No kwainga kuti ngo zvainga zveciitika, Jesu aacaizosimbepi Johani inga zvaari kuitari. Manji kudari Johani acikakani-kani, waro ngenyi wakatuma vandhu kobvunjisa Jesu mubvunjo uwu?

Kangaije Johani ari kuda basi kuti Jesu pacake anange ega kuti iyena ndi Mesia. Izvo zvaizovangisa Johani wakasuruvara mu kadheya. Zvinovoneka inga kuti mubvunjo wa Johani unoda kuziva zvimweni. Iyena anoziva zviporofita zvo Bhaibheri zvinonanga kuti Muzojiwa wa Mwari anozova muponesi. Asi joita mweji munganani Jesu naapera kubhabhatijwa, zve Johani acindori mu kadheya. Ngo kudaro Johani anojibvunjisa kuti dengani kunozoviya mundhu umweni, tingati anozoviya kuzogara pa cinyau ca Jesu, anozokwanirisa zvese zvainga zvakanangwa zvaizoithwa ndi Mesia.

Kunja ko kubvunja vajiji va Johani kuti ‘hina, inini ndini Wiya waizoviya,’ Jesu wopekeja cikhombiso kuti anobesehwa ndi Mwari ngo kurapa vandhu vakawanda vainga no ndhendha jakawanda. Ngo kudaro iyena wobvunja vajiji va Johani kuti: “Endanyi, mobvunja Johani bzo muri kuvona no kuzwa. Mapofu ovona, bzigono bzofamba, vomapere vanoceneswa, vaphungei vozwa, vokufa vanomuka, vamasikini vobvunjwa masoko akanaka.”—Mateu 11:4, 5.

Mubvunjo wa Johani ungavonesazve kuti iyena ari kuvetera kuti Jesu aite zvizinji kupinda zvaari kuita wari kangaije kutomuponesa mu kadheya. Asi Jesu ari kuda kunanga kuti Johani aadikani kuveterazve zvishamaiso zvinopinda zvaari kuitaro.

Vajiji va Johani pavanopinda, Jesu wakasara ecijekesera mbungano kuti Johani asipi muporofeti basi. Iyena i “ndhumwa” ya Jehovha inga zvinonanga ciporofita ca Malakia 3:1. Iyena ndi muporofitavo Eria anonangwaya pana Malakia 3:23, 24. Jesu wakadurujira kuti: ‘Bzokadi ndinomubvunja kuti pakati po vakabahwa ngo vanakaji, apazivi kubudirira ariwese anopinda Johani Mubhabhatijii. Kaveta mudoko mu Umambo hwo mugore anopinda [kana mukuru kupinda] yena.’—Mateu 11:11.

Jesu ngo kunanga kwake kuti mudoko mu Umambo hwo mugore mukuru kupinda Johani, iyena anovonesa kuti Johani aazovi mu Umambo hwo mugore. Pikija hake akanasirira gwanja kuitira Jesu, Johani anofa Kristu acito afunungura gwanja ro kwenda kudenga. (Vaheberi 10:19, 20) Ngo kudaro Johani i muporofeti wakagondeka wa Mwari zve anozorarama pasi pano pasi po utongi hwo Umambo hwa Mwari.