Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 37

Jesu Anomusa Mwana wo Noni

Jesu Anomusa Mwana wo Noni

LUKA 7:11-17

  • KUMUSA MUNDHU MUDHOROBHA RO NAIMI

Pakundopeja kurapa muranda wo mukuru wo masoca, Jesu wakaenda ku Naimi, dhorobha riri pa mumango wo 30 o makirometro kwenda ngo divi ro mande ja njikazi ko dhoroba ro Kafarnaume. Iyena aaripi ega. Ano vajiji vake no vandhu vakawanda maningi vanoendavo nae. Koda kuita usiku pavanonga voda kuguma ku Naimi. Vokhanda mutungwa wo vandhu vecienda koviga mutembo. I mutembo wo jaha rimweni uri kwenda kovigwa kunja ko dhorobha.

Mai vakona vaiita ngo kujitakira pasi ngo kuhwajihwa kupinda vese. Ivona inoni, waro mwana wavo umwe basi wafazve. Mwamunake paakafa, mwana uwu ngo waimutondhoja mwoyo. Ndiyena wavaithemba kuti waizovabatavo nyara. Muri kuvona here matajire avaimuita? Wari wafavo mwanewo. Waro waakubungaijavo naani? Ndiani anozomubesera?

Jesu paanovona mwanakaji uwu, mwoyo wake wokoca citiyo ngo kuvona kucamwa ka mai va nyakufa. Ngo njira inopekeja vetero no usizi, Jesu anomubvunja kuti: “Ucarira.” Ngo kudaro Jesu anokhwedera, mbhera wobata makha aithwarihwa mutembo. (Luka 7:13, 14) Zvinoitari Jesu zvokahamaja vandhu vese zvo kuti vanoima. Zvingaita kuti vazinji vanojibvunjisa kuti: ‘Zvinoda kurevenyi izvo? Ari kuda kuitenyi?’

Tingati kudini kuno vabva na Jesu vaingaya vakamuvona ecirapa mu njira inoshamisa vandhu vaihwaja maningi? Vandhu vaizviziva kuti kareko kwaimbomuswa vandhu vakafa. Kureva kuti Jesu anoitavo zvondhozvo? (1 Majimambo 17:17-23; 2 Majimambo 4:32-37) Iyena anoti: “Mujaha, ndinoti kouri, mukai!” (Luka 7:14) Mujaha wakamuka, wotanga kuvereketa. Jesu womupekeja make zve vari kutokaruka ndizvona, asi vakadakara maningi, ngo kuti avaripizve vega.

Vandhu pavanovona mujaha ano upenyu, vanokuja Jehovha Mupi wo Upenyu. Vamweni vanoti: “Wabuda pakati pedu muporofeti mukuru.  Mwari waza kovona vandhu vake.” (Luka 7:16) Ciitiko ici acizivi kunonoka kuzara munyikemo. Zvingaita kuti masoko aya akagumavo ku Nazareta, dhorobha ra Jesu, riri pa mumango wo 10 ro makirometro. Nee ku Judheya inowanika ngo kumuterero ko dhorobha rino ro Naimi vakazvizwavo.

Johani Mubhabhatiji acindori mukadheya zve ari kuda kuzwa mabasa ari kuita Jesu. Vajiji va Johani vanomuverengera mushamaiso iji. Anozwa kudini Johani?