Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 64

Kusisira ko Kuregerera

Kusisira ko Kuregerera

MATEU 18:21-35

  • TINODIKANA KUREGERERA RUNOMWE HERE?

  • MUFANANIJO WO MURANDA ACINA UNYASHA

Pedhru wapera kuzwa mbhangiro ya Jesu ngo pamusoro po matongehwe anoitwa zvineso pakati po hama jashatiranaro. Asi, zvinovoneka inga kuti Pedhru ari kuda kuziva kuti zvinodikana kuitwa rungana kamare.

Iyena anobvunjisa kudari: “Tenji, kuti hama yangu ikandixaira, ndoikungurira rungana? Mbhera runomwe, kani?” Vatungamiriri vo zviara vanojijisa kuti mundhu anodikana kuregerehwa runomwe. Ngokudaro, Pedhru anovona kuti kwaizova kukova maningi kudari akaregerera hama “runomwe.”—Mateu 18:21.

Asi, murangariro wo kuverenga mutengo wamashaishihwa, auzwirani no jijiso ja Jesu. Ngokudaro, anokamisa Pedhru aciti: “Andinangi kuti runomwe, kaveta mbhera makumanomwe o runomwe.” (Mateu 18:22) Ngo magama amweni, zvinoreva kuti tinodikana kuregerera kwenda no kwenda. Apadikani kuva no mutengo wakatemehwa wokuti Pedhru anodikana kuregerera hama mbhera pa mutengo wakati.

Perepo, Jesu anobvunja Pedhru no vamweni mufananijo unotatija ndikano yo kuva anoregerera. Anoita mufananijo wo muranda anokonehwa kutevejera unyasha hwa tenji wake. Mambo anoda kuti varanda vake vapagari magava ovanao nae. Muranda umwe wakatora zigava ro mutengo wo 10.000 zvo matarenta [60.000.000 o madhenario] aakamufiari. Aacainga no manera o kupagari ndiona zigava iri. Mambo uu anobvunja muranda kuti, iyena no mukaji pomwe no vana vake, vanodikana kutengeswa kuitira kupagari zigava iri. Ngo kunanga kwake kudaro, muranda uu anogwadama pa soka ja tenji wake, wodeketera kudari: “Tenji ndipenyi mukuvo. Ndinozomuhwirijira bzese.”—Mateu 18:26.

Mambo uu anozwira pena no unyasha muranda wake, womuregerera zigava rakakura rakadari. Mambo uu paanondopera kuita kudaro, muranda endhowo anoenda kopsaka muranda doni wake wakamufiari 100 ro madhenario. Iyena anomubata mu musipa, wotanga kumupsinyira pasi eciti: “Ripai  gava rangu.” Asi muranda doni anogwadama pa soka jake, acideketera kuti: “Ndipei mukuvo, ndinozokuhwirijira gava rako.” (Mateu 18:28, 29) Asi, muranda wakaregerehwaya ndi mambo wake, aatevejeri tenji wake. Iyena anoedesa mu kadheya muranda doni wake uu mbhera apere kupagari, pikija kuti wakafiari zvishoma maningi.

Waro Jesu anonanga kuti varanda vamweni povanovona ciito co kutama unyasha ici, vanobvunja tenji. Iyena ngo kunyangajwa anomudanijisa womubvunja kudari: “Muranda wakaxata. Ndakukungurira magava ako ese ngokuti wandiririra. Iwewevo aucaidikanepi kuitira unyaxa mudoni wako, inga inini ndakuitiravo unyaxa?” Ngo kunyangajwa mambo uu, anoendesa mukadheya muranda wo kutama unyasha mbhera apeje kupagari zvese zvaakafiari. Jesu anopejisa eciti: “Ndibzona bzondhobzo bzo vanozoitavo komuri Baba wangu vo mugore, kudari umwe wenyu anotama kukungurira hama yake ngo mwoyo wese.”—Mateu 18:32-35.

Cijijo co kuregerera ici cinosisira maningi. Mwari wakatiregerera gava rakakura maningi ro cishaishi. Cishaishi ciricese cotinoitihwa ngo hama jedu jo ciKristu i cidoko, tikacienazisa no cishaishi cotakaregerehwa. Zve Jehovha aatiregereri kamwe basi asi mazana o hwendo. Atingaregererivo ruzinji hama jedu, pikija kuti tinayo hedu razau? Inga zvakajijisa Jesu pa Hurukuro yo pa Dundhu, Mwari anozotiregerera “uxaixi hwedu, inga itisuvo tinokunguriravo vanotixaixira.”—Mateu 6:12.