Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 58

Jesu Anowanja Pau zve Anongwaja ngo Pamusoro po Mbijo

Jesu Anowanja Pau zve Anongwaja ngo Pamusoro po Mbijo

MATEU 15:32–16:12 MARCO 8:1-21

  • JESU ANOPA ZVOKUHA 4.000 ZVO VANDHU

  • ANONGWAJA NGO PAMUSORO PO MBIJO YO VAFARISI

Vandhu vakawanda maningi vaienda kuna Jesu ku ndharaundha yo Dhekapori, ngo kudivi ro kumabvazuva ko Jombe ro Garireya. Ivona vanoviya kuti vamuzwe zvaanonanga no kurapwa ndiena, zve vanoviya no zvitengu zvo zvokuha.

Asi pa mukuvo unotevera, Jesu anobvunja vajiji vake kudari: “Ndino unyaxa no vandhu ava; vapeja njiku ndhatu vecinditevera, avana bzokuha. Ndikavapindisa kanyi kwavo vacakaha, vanozowa mu gwanja; vamweni vavo vakabva ndhambo.” Vajiji vanomubvunjisa kudari: “Ndiani anokwanisa kuvagutisa ngo mukate pa bani ro bzipare rino?”—Marco 8:2-4.

Jesu anobvunjisa kuti: “Muno mukate mungana?” Vajiji vanoti: “Munomwe no bzihove padoko.” (Mateu 15:34) Perepo anobvunja vajiji vake kuti vagare pasi. Jesu anotora mukate kana pau no hove, woita mukumbiro kuna Mwari, wozvipekeja vajiji vake kuti vakovanise. Zvinoshamaisa ngo zvokuti vese vanoha, voguta. Zvimambhakata zvinosara zvinozaja zvitengu zvinomwe zvakakura, pikija kuti zvahiwa ngo 4.000 zvo vanarume, ticikaverengi vanakaji no vanamudoko.

Jesu naapera kupindisa vandhu, anopakira ngarava no vajiji vake kuenda ku Magadhani, kunowanika kumavirira ko mbiripiri yo Jombe ro Garireya. Kondhoyo, vaFarisi no vamweni vo cikwata co vaSadhuki vanoeja Jesu, ngo kumukumbira kuti aite citatijo cinobva kumatenga.

Aciziva cinangwa cavo, Jesu anoti: “Co madeko munoti: kunoeja uxoni, ngokuti gore rakapsukirira. Co mangwanani munoti: ‘Nyamasi nvura inona,’ ngokuti gore rakapsipa. Munoziva kuvona mu gore, kaveta amukwanisi kuziva bzivoniso bzo mukuvo uu.” (Mateu 16:2, 3) Tevere Jesu anobvunja vaFarisi no vaSadhuki kuti akuna citatijo comuzopuwa kuciripi citatijo ca Jona.

Jesu no vajiji vake vanobata ngarava voenda Bhetsaidha, kunowanika kupharamande ra njikazi ko jombe. Povanonga vari muhwendo, vajiji vanorangarira kuti vakanganwa kutora pau jinokwana. Vatora pau imwe basi. Acirangarira paakabhuya no vaFarisi no vaSadhuki vanobesera Herodhi, Jesu anongwaja kudari: “Basopanyi mbijo yo vaFarisi no mbijo ya Herodi.” Vajiji vanoshaisha kurangarira kuti ngo kunanga kwake mbijo, ari kunanga kukanganwa kovaita kutora pau. Andizvopi zvovanorangarijaro, zve Jesu anoti: “Ngenyi muri kurangarira kuti amuna mukate?”—Marco 8:15-17.

Jesu wabva kupekeja zvokuha ku zviuru zvo vandhu sasambi. Ngokudaro, vajiji vanodikana kuziva kuti Jesu aaripi kukaya-kaya ngo kutamika ko pau. Iyena anobvunjisa kudari: “Amucereceji, kani: makabojera bzitengu bzingana bzo matimbu, ngari yo ndakakovanisira bziuru bzixanu bzo vandhu, mukate muxanu?” Ivona vanodavira kuti: “Gumi na bziviri.” Jesu anoenderera mberi aciti: “No ngari yo ndakagurira  mukate munomwe bziuru bzirongomuna bzo vandhu, makabojera bzitengu bzingana bzakazara bzo matimbu?” Ivona vanopingura kuti: “Bzinomwe.”—Marco 8:18-20.

Jesu anobvunjisa kudari: “Amubzizivi kuti andizivi kunanga mukate, ngari yo ndananga kuti: ‘Basopanyi uxoni no mbijo yo vaFarisi no yo vaSaduki?’”—Mateu 16:11.

Pakupejisira, vajiji vanozozvizwisisa. Mbijo inoshandiswa kuitira kuvirisa zviro no kukukumuja pau. Apawari Jesu ari kushandisa mbijo inga citatijo co uvori kana ushati. Jesu ari kubvunja vajiji vake kuti vabhasope “mujijisiro wo vaFarisi no vaSaduki,” unoviisa muviyo jakashata.—Mateu 16:12.