Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 57

Jesu Anorapa Musikana Umwe na Nyamandondo

Jesu Anorapa Musikana Umwe na Nyamandondo

MATEU 15:21-31 MARCO 7:24-37

  • JESU ANORAPA MWANA WOKAJI WO MWANAKAJI WO FENISIA

  • ANORAPAZVE MWANARUME ANO MANDONDO ZVE MBEVEVE

Jesu naapera kuvereketera vaFarisi ngondava yo zvirovejeso zvavo zvo kujikuja, anopinda no vajiji vake. Iyena anoita hwendo hwo makirometro mazinji kuenda ku pharamande ra njikazi, ku ndharaundha jo Tiro no Sidhoni, mu Fenisia.

Jesu anowana nyumba yo kugara asi aadi kuti vandhu vazive kuti ngo paari. Pikija zvakadaro, iyena anondowanika. Mwanakaji umweni wo Cigiriki, wakabarihwa mu ndharaundha iyi anowana Jesu, wotanga kumudekeretera eciti: “Tenji, Mwana wa Davidi, ndiitirenyi unyaxa. Mwana wangu wokaji ari kuneseka ngo bjoka.”—Mateu 15:22; Marco 7:26.

Pasure po cimukuvo, vajiji vanokumbira Jesu vaciti: “Mudavirei bzaanoda, ngokuti anotitevera ecindomima.” Jesu anodurujira thangwe rinomuitisa kuti atame kupurukira zvinonangari mwanakaji uu, eciti: “Andizivi kutumwa kuciripi ku mabvuta akapsejeka o nyumba yo vaIsraeli.” Asi mwanakaji uu aarembi. Iyena anokhwederera Jesu, wogwadama pambeji pake, acideketera kuti: “Ndibesenyi, Tenji”!—Mateu 15:23-25.

Kangaije Jesu acida kueja gonda rake, anoshandisa mavereketero anoitwa ngo vaJudha kuitira kushora majinja amweni, eciti: ‘Abzinakiri kutora mutate wo vana, kuukhandira bziimbhwa.’ (Mateu 15:26) Ngo kunanga kuti zviimbhwa, Jesu anokhombija kuti anozwira pena vaciripi vaJudha. Mumeso mwake no izwi rake ro kuzwira pena zvinokhombijavo kudaroko.

Kusiyapo kuva wakanyangajwa, mwanakaji uu anozwisisa zvinonangari Jesu ngo pamusoro po kushora kunoita vaJudha, wonanga ngo kuzvidodokesa kudari: “Ndibzona Tenji. Kaveta [bziimbhwa] bzinohavo mbhakata panohira vatenji vabzo.” Jesu anoziva kunaka ko mugariro wo mwoyo wake, wonanga kudari: “Mwanakaji, kutenda kwako kukuru kamare. Ngaziitike kudari ngo kuda kwako.” (Mateu 15:27, 28) Zve zvinoitikadi, pikija kuti musikanewo aaripi pondhopo. Mwanakajiu paanohwirira kanyi, anokhanda mwana wake wokaji wakavatova pa bonde, warapika kamare, ngokuti dhimoni “rainga rabuda.”—Marco 7:30.

Jesu no vajiji vake vanobva ku ndharaundha yo Fenisia, vodarika nyikeyo kuenda ku Murambo wa Jordhani. Kangaije vanodarika Murambo uu ngo divi ririrese ro kanjikazi ko Jombe ro Garireya, vonghwina mu ndharaundha yo Dhekapori. Kondhoyo, vanopinda ngo padundhu, asi mbungano inovawana. Vandhu vanoviisa kuna Jesu zvigono, vakakhuvazika, mapofu no mbeveve. Vatenda ava vanogajikwa phedo no soka ja Jesu, zve iyena anovarapa. Vandhu vanoshamaisika ndizvona, vokuja Mwari wo Iziraeri.

Jesu anorapa mwanarume umweni ano mandondo zve anoneseka pa kuvereketa ngo njira yakasiyana no marapiro aanoita vamweni. Rangariranyi kuti mundhu uu anodikana kujizwa kudini pakati po vandhu vakawa vakadari. Kangaije Jesu anovona kuthya kwaanako, wobuda nae pakazarari vandhu. Povanova vega, Jesu anomubvunja zvaanoda kumuita. Iyena anodira zvikunwe mu njeve jake zve pasure po kupfira mata, anopsasa rurimi hwake. Perepo, Jesu anosota mugore, wonanga gama ro Cihebheru rinoreva kuti “Zaukai.” Ngokuita kwake kudaro, anozwazve no kuvereketa. Jesu aadi kuti zvaaitari zvitokoteswe, ngokuti anoda kuti vandhu vamutende no vakacijikira pa zvovanovona vega no kuzwa.—Marco 7:32-36.

Simba rinoshandisa Jesu pa kurapa kwakadari rinopsasa maningi vanozvivona, zvoita kuti ‘vakahamare kukuru.’ Ivona vanoti: “Wakaita bzakanaka bzese; anoita kuti vanyamandondo vazwe, mbeveve jiverekete.”—Marco 7:37.