Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 61

Jesu Anorapa Mujaha Ano Dhimoni

Jesu Anorapa Mujaha Ano Dhimoni

MATEU 17:14-20 MARCO 9:14-29 LUKA 9:37-43

  • ZVINODA GONDA RAKAVANGA KUITIRA KURAPA MUJAHA ANO DHIMONI

Jesu, Pedhru, Jakobo na Johani povanobzuka pa dundhu, vanowanana no mbungano huru yo vandhu. Asi pano cakashata. Vatari vakatendeneja vajiji, vacivereketesana navo. Vandhu vanodakara ngo kuvona Jesu, vogogoma kuenda komucungamija. Iyena anobvunjisa kudari: “Munovereketesana cinyi naivona?”—Marco 9:16.

Mwanarume umweni wo mu mbungano anogwadama pamberi pa Jesu, womudurujira kudari: “Mujijisi, ndaza no mwana wangu pano; ano bjoka ro mbeveve. Paanobatwa ngo bjoka, rinomuwisa pasi; yena anobudisa furo, anogedesagedesa meno, wotatarika. Ndakumbira vajiji venyu kuti varimbirimbije, kaveta avazivi kurikwanisa.”—Marco 9:17, 18.

Zvinovoneka kuti vatari vari kushora vajiji ngo kukonehwa kwavo kurapa mujaha uu, kangaije vari kuseka ngo kuvangisira kovaita. Kusiyapo kudavira baba vo mwana, vacina wari vetero, Jesu anobvunja mbungano kudari: “Yowe! Vandhu vacingatendi no vakaxata. Ndinozomukwanisa mbhera rini? Ndinozomusengerera mbhera njiku yenyi?” Masoko akavanga aya anonasa kushanda ku vatari vari wari kunesa vajiji, Jesu acipo. Tevere Jesu anobvunja baba vo mwana kuti: “Izanyi nayena kondiri.”—Mateu 17:17.

Mujaha uu paanokhwedera kuna Jesu, dhimoni raanaro rinomuwisa pasi, romuita kuti aburukute-burukute. Iyena anogara acindoburukuta no kubuda mafuro mukanwa. Jesu anobvunjisa babake kudari: “Bzakabvira rini ibzi?” Babakona vanoti: “Kubvira pa hwanaudoko hwake. Ruzinji bjoka rakamuwisa pa muriro no mu kumwa, ngokuda kumuuraya.” Zve vanodeketerera Jesu kuti: “Kudari mecikwanisa ciro ciricese, tiitirei unyaxa mutibese.”—Marco 9:21, 22.

 Baba ava avacina vetero ngokuti vajiji va Jesu vakonehwa kumubesera. Asi Jesu acidavira cikumbiro ici co kutama vetero, anovavangisa eciti: “Mecikwanisa? Bzese bzinokwanisika ku mundhu anotenda.” Baba ava vanomima ngo kukasika veciti: “Ndinotenda! Kaveta ndibesei kuxoma kutenda kwangu”!—Marco 9:23, 24.

Jesu anovona mbungano yecigogoma kuza kwaari. Iyena anovereketera dhimoni iri pamberi po vese aciti: “Bjoka romandondo no umbeveve, ndinokutonga ndini, ibvai mu mwana uu, ucanghwinabze mukati make!” Dhimoni iri porinobuda, rinoita kuti mujaha uu akhuwe no kuburukuta-burukuta. Tevere mujaha uu anovata pasi acikacakanuki. Vandhu vazinji povanovona izvi, vanonanga kuti “wafa.” (Marco 9:25, 26) Asi Jesu paanobata nyara yake, iyena anomuka zve ‘anorapika mukuvo wondhowo.’ (Mateu 17:18) Zvinozwisisika kuti vandhu vanokahamara maningi ngo zviri kuitari Jesu.

Pa mukuvo wakapera, Jesu paakatuma vajiji kocumaira, ivona vakakwanisa kugogomera madhimoni. Ngokudaro, wari kangaije povanonga vari mu imwe nyuma, vajiji vanobvunjisa kuti, “Ngenyi itisu atizivi kukwanisa kurimbhirimbija?” Jesu anodurujira kuti vakonehwa kurigogomera ngondava yo kutama kwavo gonda, eciti: “Mufumbo uu wo mabjoka aumbhirimbijwi kuciripi ngo mukumbiro.” (Marco 9:28, 29) Gonda rakavanga pamwe no kukumbira Mwari kuti ape simba zvaidiwa maningi kuti vagogomere dhimoni rino simba.

Jesu anopejisa ngo kunanga kudari: “Bzokadi ndinobvunja kuti mukava no kutenda kudoko kudari inga mbhumba yo ‘mostarda,’ maizobvunja dunthu iri kuti: Ibvai apa, uende iyo, irona raizoenda. Apana co maizotama kukwanisa.” (Mateu 17:20) Gonda iri rina simba maningi kamare.

Zviphingo no zvineso zvotinowanana nazvo mu kushandira Jehovha zvingavoneka kuti azvicijikiriki zve azvibvisiki inga dundhu. Asi, kudari tikasakurira gonda, tinozokwanisa kunyisa zviphingo no zvineso zvakaezana no dundhu.