Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 90

“Kumuka ko Vakafa no Uhomi”

“Kumuka ko Vakafa no Uhomi”

JOHANI 11:17-37

  • JESU ANOGUMA PASURE PO KUFA KA RAZARO

  • “KUMUKA KO VAKAFA NO UHOMI”

Ecibva ku Pereya, Jesu anoguma Bhetania, mutundhu unowanika kumabvazuva ko Jerusarema pa mumango wo makirometro matatu. Maria na Marta vari pa ciriro co kufa ka Razaro, hama yavo. Vandhu vakawanda vanoviya kovaembejera.

Mundhu umweni anobvunja Marta kuti Jesu ari kukhwedera, zve iyena anokasika kuenda kosongana nae. Kangaije Marta anobvunja Jesu zvaairangarira no munukunake pa njiku murongomuna japera, eciti: “Tenji, no mainga muri pano, hama yangu aicadepi kufa!” Asi, izvi azvirevi kuti aana vetero. Marta anoti: “Ndinoziva kuti bzese bzomunokumbira kuna Mwari, anozomupa.” (Johani 11:21, 22) Iyena anovona kuti Jesu anondokwanisa kubesera hama yake.

Jesu anoti: “Hama yako inozomuka ku vakafa.” Marta anoguma pa mbhejiso yokuti ari kunangira rumuko hunozoitika kumbejiyo pasi pano, vetero yaingavo na Abhirahama no vamweni. Zve anonanga kutenda kwaanako kuti zvinozoitikadi kamare, eciti: “Ndinobziziva bzokadi kuti anozomuka mu nguva yo kumuka ko vese, mu njiku yokupejisira.”—Johani 11:23, 24.

Kunanga kuti Jesu anoita ciricese cinotondhoja pa ciitiko ici here? Iyena anoceuja Marta kuti Mwari wakamupa simba ro kunyisa rufu, eciti: “Ndiani anonditenda, pikija naakafa, anozopona. Ngokuti ndiani anopona no kunditenda, aazofi mbhera narini.”—Johani 11:25, 26.

Jesu aaripi kunanga kuti vajiji vake vari kupona wari avazofi. Nee iyena anozofa, inga zvaakabvuja vapostori vake. (Mateu 16:21; 17:22, 23) Jesu ari kukohomejera kuti vanomugonda vanozova no upenyu hucikaperi. Vazinji vanozowana upenyu uhu povanozomuswa. Asi, vakagondeka vanozopona pa kupera ko nyika ino, ivona avazofi. Azvinenyi kuti vanozowanisa kudini upenyu uhu, vese vanomugonda vanothemba kuti rufu ahuzovipo mbhera narini.

Kureva kuti Jesu anonangari kuti “ndini kumuka ko vakafa no uhomi,” anokwanisa kubesera Razaro, waaperari kufa? Jesu anobvunjisa Marta kuti, “unobzitenda ibzi?” Marta anodavira kudari: “Hina, Tenji . . . inini ndinotenda kuti muri Kristu, Mwana wa Mwari wakaza pasi pano.” Acigonda kuti Jesu anokwanisa kuita ciricese ngo dhiya iyi kamare, Marta anoenda kanyi ngo kukasika, wobvunja munukunake pamutivi kuti: “Mujijisi ari pano anokudanija.” (Johani 11:25-28) Paanozwa izvo, Maria anobuda pamuzi zve ngokusika anotevehwa ngo vandhu vamweni vacirangarira kuti ari kuenda ku guva ra Razaro.

Kusiyapo izvo, Maria anoenda kuna Jesu, wopfukama phedo no soka jake ecirira, zve anotatijavo mazwiro akakhombijwa ndi yayake, eciti: “Tenji, nomainga muripo pano, hama yangu aicaidepi kufa.” Ngo kuvona Maria acirira no mbungano, Jesu anohwajihwa mumwoyo, wogomera zve wototanga kubuda musoji. Izvi zvinopsasa maningi vanozvivona. Vamweni vanobvunjisa kudari: ‘Jesu aacaikwanisepi kuita kuti atame kufa, yena wakafunungura majiso o bofu?’—Johani 11:32, 37.