Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 93

Mwana wo Mundhu Anozovoneswa

Mwana wo Mundhu Anozovoneswa

LUKA 17:20-37

  • UMAMBO HURI PAKATI PAVO

  • ZVICINJI ZVINOZOITIKA JESU PAANOZOVONESWA?

Jesu aciri mu Samaria kana mu Garireya. Wari vaFarisi vanomubvunjisa ngo pamusoro po kuguma ko Umambo, hwovanovetera kuti hunozova hunoshamaisa zve kunozoitwa mutango-mutango hukaguma. Asi, Jesu anoti: ‘Umambo hwa Mwari ahuzonghwini ngo pa mbhene. Avazonangi kuti: “Huri apa,” nokuti: “Huri iyo,” ngokuti umambo hwa Mwari huri pakati penyu.’—Luka 17:20, 21.

Vamweni vangaguma pa mbhejiso yokuti Jesu ari kunanga kuti Umambo huri kutonga mu mwoyo mo vashandiri va Mwari. Izvowaro azvingaiti ngokuti Umambo ahuripi mu mwoyo mo vaFarisi vaari kubhuyari navo. Asi, huri pakati pavo ngokuti Jesu, Mambo wakasanwa ndi Mwari ari pakati pavopo kamare.—Mateu 21:5.

Zvingaita kuti vaFarisi vacito vapinda, Jesu anobvunjazve vajiji vake masoko amweni ngo pamusoro po kuviya ko Umambo. Ecibhuya ngo kuvepo kwake mu simba ro Umambo, Jesu anotanga kungwaja vajiji vake kudari: “Inozoguma ngari yo munozoda kuvona njiku imwe basi yo Mwana wo mundhu, kaveta amuzoivoni.” (Luka 17:22) Jesu ari kukhombija kuti Mwana wo mundhu anozotonga mu Umambo kumbejiyo. Icito yaguma dhiya iyi, vajiji vamweni vanozoipsaka vacithimwa-thimwa, asi vanozoenderera mberi vacivetera mbhera ugume mukuvo wakagajwa ndi Mwari kuti aviye Mwana wo mundhu.

Jesu anoenderera mberi aciti: “Munozobvunjwa kuti: ‘Ari apa,’ nokuti: ‘Ari iyo.’ Mucaenda. Mucavatevera. Ngokuti kudari inga kurabza kunomonikira kubva ku mbhiri yo gore mbhera ku mbhiri imweni, ndibzona bzaanozoitavo Mwana wo mundhu, mu njiku yake.” (Luka 17:23, 24) Waro vajiji va Jesu vanozojiviririka kudini pa kutevera majimesia o kunyepa? Jesu anonanga kuti kuviya ka Mesia wokadi-kadi kunozoita inga kurazva kunovoneka ku mativi ese. Civoniso co kuvepo kwake mu simba ro Umambo cinozovoneka pambhene ngo vese vanonasa kusotesesa.

Perepo Jesu anokuezanisa no zviitiko zvokare kuitira kuvonesa mugariro unozova no vandhu mukati mo mukuvo uri kuviyari, eciti: “Bzese bzakaitika mu njiku ja Noa, ndibzona bzinozoitika mu njiku jo Mwana wo mundhu . . . Ndibzona bzakaitika mu njiku ja Loti: Vaiha no kumwira, vaitenga no kutengesa, vaisima no kuvaka nyumba; kaveta ngo mukuvo wa Loti waakabuda mu Sodoma, ku denga kwakana muriro no enxofre, bzopeja vandhu vese. Ngo bzinozoitika mu njiku yo kujivonesa ko Mwana wo mundhu.”—Luka 17:26-30.

Jesu aaripi kunanga kuti vandhu vo munjiku ja Nowa no ja Roti vakaparajwa ngokuti vaiita zviro zvinoitwavo ngo vamweni zvakadari inga kuha, kumwa, kutenga, kutengesa, kusima no kuvaka.  Nowa, Roti no mbhuri javo vaiitavo zviro zvimweni pa zviro izvi. Asi vandhu vamweni vaiita zviro izvi vacikapsaki kuziva zvinoda Mwari zve avacairangarira kuti nguva yavaperera. Ngokudaro, Jesu ari kungwaja vajiji vake kuti vapsake kuziva zvinoda Mwari zve vanase kubatikana pa kuzviita. Ngo kuita kudaro, ari kuvakhombija zvovanodikana kuita kuti vazopokonyoke Mwari akazoviisa kuparajwa kumbejiyo.

Vajiji vanodikana kuramba kuva vanophingaijwa ngo zviro zviri mu nyika yakavatendeneja, kana kuti zviro zvo “sure.” Jesu anoti: “Njikuyo, ndiani anozogara pa denga, no bziro bzake bziri mu nyumba, acaderuka kuti abzitore. Ari ku munda, acahwirira sure. Ceukijanyi mukaji wa Loti.” (Luka 17:31, 32) Iyena wakaita cituka co munyu.

Ecienderera mberi acidurujira ngo pamusoro po mugariro unozovepo Mwana wo mundhu akazotonga inga Mambo, Jesu anobvunja vajiji vake kudari: “Usikuhwo, vandhu vaviri vanozovata pa bonde rimwero: umwe anozotohwa wosara umweni.” (Luka 17:34) Ngokudaro, vamweni vanowana ruponeso, asi vamweni vanozosiiwa, voruza upenyu hwavo.

Vajiji vanobvunjisa kuti: “Tenji! Bzinozoitikirepi ibzo?” Jesu anodavira kudari: “Pano nyama yakafa, ndipona panozoungana magunguvo,” kana kuti mamushiri. (Luka 17:37) Vajiji vanozovona zviri ndhambo inga mamushiri. Vajiji ava vanozoungana kuna Kristu, Mwana wo mundhu. Pa mukuvo wo kumbeji uu, Jesu anopekeja vajiji vake cokwadi cinoponesa kuna vaya vano gonda.