Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 82

Mushando wa Jesu ku Pereya

Mushando wa Jesu ku Pereya

LUKA 13:22–14:6

  • ZVINODA KUVANGISIRA KUTI TINGHWINE NGO PA MUSUVO WAKAMANIKA

  • JESU ANODIKANA KUFIRA KU JERUSAREMA

Paainga ku Judheya no ku Jerusarema, Jesu wakajijisa no kurapa vandhu. Wari iyena woambuka Murambo wa Jorodhani kuti ajijise mu dhorobha ngo dhorobha ku Pereya. Asi anohwirira ku Jerusarema ngo kukasika.

Jesu paanonga ari ku Pereya, mwanarume umweni anomubvunjisa kuti: ‘Tenji! vanoponeswa vashomani, kani?’ Kangaije mwanarume uwu anoziva makanijano akambova no vatungamiriri vo zviara ngo pamusoro po kuponeswa ko vandhu vakawanda kana kuti vanganani basi. Kunja ko kubhuya ngo pamusoro po mutengo wo vandhu vanozoponeswa, iyena anocinja shwiroyo wobhuya ngo pamusoro po zvinodiwa kuti mundhu aponeswe, eciti: “Vangiriranyi, munghwine ngo pa musuvo wakamanika.” Ndizvonadi kamare kuti zvinoda kuvangisira kuti tiponeswe. Ngenyi? Jesu anodurujira eciti: “Ndinomubvunja inini kuti vazinji vanozopsanga kunghwina, avazobzikwanisi.”—Luka 13:23, 24.

Jesu anoita mufananijo unovonesa kuti kuvangisira kunosisira maningi, paanoti: “Kunozoti muno wo nyumba womuka, wofunga musuvo, imwimwi, ngo kunja, munozoamba kuguguja musuvo, moti: ‘Tenji! Tizaurirenyi.’ . . . Yena anozoti: ‘Ndinomubvunjabze kuti andimuzivi ngo kwapi ko munobva. Ibvanyi kondiri imwimwi mwese vaiti vo uxaixi!’”—Luka 13:25-27.

Izvi zvinoezanisihwa no matambujikire anoita mundhu anonga anonoka, kangaije ngo kuti waviya pa nguva yaanoda, woguma musuvo wafungwa wotodihwa makhiya. Iyena waidikana kuguma nguva iciripo pikija nguveyo icikamudakajisi. Ndizvona zvakaitika no vazinji vaizodeno vakabesehwa ngo jijiso ja Jesu. Vakakonehwa kushandisa mukana wavainga nawo wo kutora kunamata kokadi-kadi koita basa rinosisira mu upenyu hwavo. Jehovha wakatumira Jesu kuti aponese vandhu ava, asi vazinji vavo vakamuramba. Jesu anonanga kuti ivona ‘vanozocema no kugeda-geda meno’ pavanozokhandihwa kunja. Pikija zvakadaro, vandhu vo “kumabvazuva no kumavirira, ka njikazi no ka kusi,” vandhu vo majinja ese, vanozogara “mu mabuso o Umambo hwa Mwari.”—Luka 13:28, 29.

Jesu anodurujira kuti: “Vokupejisira vamweni [vakadari inga vaciripi vaJudha no vaJudha vakabzinyirihwa] vanozoita vokutungamira, vokutungamira [kureva vatungamiriri vo zviara vanojikuja ngo kuva mubarihwana wa Abhirahama] vozoita vokupejisira.” (Luka 13:30) VaJudha vaciripi kubonga zvavari kuitihwa ndi Jesu vanozozwi ngo “vokupejisira,” mu njira yo kuti avazonghwini mu Umambo hwa Mwari kamare.

Ngo kudaro vaFarisi vamweni vanoenda ka Jesu vomungwaja veciti: “Budai! Ibvai pano, ngokuti Herode [Antipa] anoda kukuuraya.” Kangaije Herodhi wakatanga no masoko aya ngo kuda kuthyisijira Jesu kuti atize mundharaundhemo. Zvingaita kuti Herodhi wainga ecithya kubatanijwa pa kuuraya muporofeti umweni, inga zvakaitikaya na Johani Mubhabhatiji. Asi Jesu anobvunja vaFarisi kuti;  “Endanyi kobvunja muhwe uwo kuti inini ndinombhirimbija mabjoka, ndinorapa nyamasi na mangwana; mu njiku yocitatu ndinozopeja.” (Luka 13:31, 32) Jesu wakadaninja Herodhi kuti “muhwe,” kangaije wainga ecirangarira ngo pamusoro po mambzengere anoita muhwe. Asi Jesu aazombosiizve basa rake ngo ndava ya Herodhi, nee apana anokwanisa kumuita kuti arisiye. Jesu anokwanirisa basa raakapuwa ndi Baba vake, mukuzwirana no urongwa hwa Mwari kuciripi hwo mundhu.

Jesu woenderera mberi no hwendo hwake ecipinda ku Jerusarema ngo kuti iyena anoti azvitendehwi “kuti muporofeti afe kunja ko Jerusalema.” (Luka 13:33) Manji ngenyi Jesu anonanga kudaro, kasike apana ciporofita cakambonanga kuti Mesia anodikana kufira mu dhorobha iri? Ngo kuti Jerusarema ndirona cine rakona, kwaigara Sinedhrio, banje guru ro ciJudha raiumbhwa ngo vandhu vanokwana kuita 71, zve ndikona kwaitongehwa vandhu vaipumbhwa kuti maporofeti o kunyepa. Ndikonazve kwaiitihwa mupiro wo zvinyama. Ngo kudaro anozwisisa kuti azvicaitendehwepi kuti afire kundau imweni.

Jesu anocumba eciti: “Jerusalema, Jerusalema! Unouraya vaporofeti, wokhandira mapuwe vaya vakatumwa kouri! Mukuvo mungana wondakada kuunganija vana vako, inga huku inounganija bzitio pasi po mapapiro, kaveta amuzivi kubzitendera! Waro muzi wenyu unozosiiwa.” (Luka 13:34, 35) Jinja rinoramba Mwana wa Mwari zve rinozotambujwa ngo muviyo wazvo.

Jesu acito aguma ku Jerusarema, mutungamiriri wo vaFarisi anomukoka kuti aviye kuzohira pamuzi pake ngo Musabudu. Varendo vamweni vanozvuka majiso kuti vavone zvinoda kuita Jesu ngo pamusoro po mwanarume umweni wainga ano ndhundhu (ndhendha yo kuungana kumwa yakawandisisa mu muviri, maningi-ningi mu murenje no musoka). Jesu wobvunjisa vaFarisi no maduka o Mutemo kuti: “Bzinotendehwa, kani, kurapa Musabudu?”—Luka 14:3.

Apana anodavira. Ngo kudaro Jesu anorapa mwanarume uwu perepo wobvunjisa kuti: “Ndiani wenyu ano mwana wake, nokuti n’ombe bzikawira mu dima, aabzibudisi, here, ngari yondhoyo mu Sabudu?” (Luka 14:5) Vakasarazve vakati khangara, ngo pamusoro po mavonero anoshwiro a Jesu.