Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 100

Muezaniso wo Gumi ro Mamina

Muezaniso wo Gumi ro Mamina

LUKA 19:11-28

  • MUEZANISO WA JESU WO GUMI RO MAMINA

Jesu no vajiji vake vaciri pa hwendo kwenda ku Jerusarema. Asi zvingaita kuti wari vaciri pamuzi pa Zakeu no vajiji vake. Vajiji vake vanorangarira kuti “Umambo hwa Mwari” hwoda kutanga kutonga, Jesu ari Mambo wakona. (Luka 19:11) Zvecivoneka kuti avaripi kuzwisisa shwiro iyi avaripivo kuzwisira kuti Jesu anodikana kuti afe. Ngo kudaro, Jesu anovaitira muezaniso kuti avabesere kuvona kuti Umambo unozogajwa kumbejiyo.

Iyena anoti: “Mundhu mukhupuki wakaenda ku nyika yo ndhambo koaxira umambo no kuvia.” (Luka 19:12) Hwendo hwakadari hwaizotora nguva. Zviri pambhene kuti Jesu ndiyena “mundhu mukhupuki” anoenda ku “nyika yo ndhambo,” kuda kureva kudenga, kuna Baba vake vanozomupekeja simba ro kutonga.

Acito apinda, “mundhu mukhupuki” anodaninja gumi ro vashandi vake wopekeja mina imwe yo sirivha kuna umwe nga umwe wavo, eciti: “Barisiranyi mbhera ngo kuvia kwangu.” (Luka 19:13) Mina imwe yo sirivha imare yakawanda. Murimi waidikana kushanda mweji jinodarika mutatu kuti apocere mutengo uwu.

Kangaije vajiji vanozwa inga kuti ndivona vari kunangihwa inga gumi ro vashandi pa muezaniso uwu ngo kuti Jesu wakambovaezanisazve no vashandi pa kukotora. (Mateu 9:35-38) Ndizvona kuti Jesu aazivi kuvakoka kuti vaite basa ro kukotora mbeu kamare. Asi iyena wainangira basa ro kukotora vajiji vaizoumba Umambo hwa Mwari. Vajiji vanoshandisa uzivi hwavo hwese no zvese zvavanazvo kuti vaengejere vandhu vanozogara utaka hwo Umambo.

Jesu anojijisazve cinyi mu muezaniso uwu? Iyena anoti vandhu vo munyika yo mukhupuki wiya “vaimunyenya [kunyenya mukhupuki], ngokudaro vakatuma ndhumwa javo, sure kwake, veciti: ‘Atidi kuti mundhu uu aite mambo wedu.’” (Luka 19:14) Vajiji vanozviziva kuti vaJudha avatendi kuti Jesu ndi Mesia, vamweni vanotoda kumuuraya. Nee Jesu paakafa no kwenda kudenga, vaJudha vakatatija kamare kuti vanozonda Jesu ngo kuteverera vajiji vake. Zvinonasa kuvoneka kuti avadi kuti Jesu ave mambo.—Johani 19:15, 16; Maitiro o Vapostori 4:13-18; 5:40.

Gumi ro vashandi rinoshandisa kudini mamina ayani mbhera ‘mundhu mukhupuki aashire umambo no kuvia’? Jesu anoti: “Naapera kuaxira umambo, wakahwirira, wodana varanda vaya vaainga akaxongeja mare, kuti azive mubariro wo ariwese. Wokutanga wakavia, woti: ‘Tenji! mare yenyu yakabudisa gumi rimweni.’ yena wakamubvunja kuti: ‘Ndibzona kamare, muranda wauxoni. Ngokuti wakagondeka ngo bzidodoko, axirai utongi hwo gumi ro maguta.’ Wocipiri wakaguma, woti: ‘Tenji! mare yenyu yakabaravo xanu.’ Yena wakamubvunjavo: ‘Axiraivo iwewe utongi hwo maguta maxanu.’”—Luka 19:15-19.

Kudari vajiji vakazwisisa kuti ivona vari kuezaniswa no vashandi vanoshandisa uzivi hwavo no zviro zvavanazvo kuti vaite vajiji, vangakhohwa kuti Jesu anozodakara no kupfupa kushanda kwavo ngo simba. Asi vajiji ava avazivi kuezana, zve avana mukana jakaezana nee avana uzivi hwakaezana. Kaveta Jesu wiya ‘anozoashira umambo,’ anozozviziva zvese izvi zve anozokomborera kuvangisira kwavo ngo mwoyo wese pa kuita vajiji.—Mateu 28:19, 20.

Jesu anopejesa muezaniso wake ngo kubhuya ngo pamusoro po mushandi wakaita zvakasiana eciti: “Wakaguma [mushandi] umweni, woti: ‘Tenji! ngaii mare yenyu yo ndainga ndakasungira mu muceka. Ndaimuthya ngokuti muri mundhu wokucunga mwoyo: munotorera co mucingazivi kupa no kukotora co mucikazivi kupandira.’ Yena wakamupingura kuti: ‘Muranda wakaxata! Ndinokusunga ngo mazwi ako ambhwine. Waibziziva kuti ndiri mundhu wokucunga mwoyo: ndinotora  co ndicikazivi kupa, ndinokotora co ndicikazivi kupandira. Ngenyi auzivi kuviga mare ku nyumba yo vabarisiri, kuti, pakuvia kwangu, ndiaxire kuviihwa kwangu?’ Pondhopo wakabvunja vaya vaingepo kuti: ‘Mutorerei mareyo, ipanyi wiya ano gumi.’”—Luka 19:20-24.

Zvecivoneka kuti mushandi uwu wakareja-reja basa ro kuengejera upfumi hwo umambo hwa tenji wake, iyena anoruza mina yake. Vapostori vari kuvetera kuti Jesu atonge mu Umambo hwa Mwari. Kubva mu masoko aabhuya ngo pamusoro po mushandi wo kupejisira, kangaije wari vozwisisa kuti kudari vakatama kuvangisira avazowani ndau mu Umambo.

Masoko a Jesu anovangisa vajiji vakagondeka kuti vaengejerezve maningi. Iyena anopejesa eciti: “Ndiani ano ciro, anozopuwa; ndiani acina, anozotorehwa no caanaco.” Iyena anoengejera kuti vavengi vake, vacikadiweya kuti ‘aashire Umambo,’ vanozourawa. Perepo Jesu anobata gwanja wopinda ku Jerusarema, kwaari kwendaya.—Luka 19:26-28.