Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 84

Kuva Mujiji wa Jesu Ibasa Guru

Kuva Mujiji wa Jesu Ibasa Guru

LUKA 14:25-35

  • ZVINODIWA KUTI UVE MUJIJI

Jesu wakapa cijijo cinosisira maningi paainga eciha pamuzi po mutungamiriri wo vaFarisi. Perepo Jesu anoenderera mberi no hwendo hwake mbhera ku Jerusarema. Zve mbungano yo vandhu inoendavo nae. Ngenyi? Ndizvona kuti kuva mujiji zvaizovaita kuti vacungirire zvakawanda. Kureva kuti vainga vecida kamare kuva vajiji vake pikija zvakadaro here?

Pavainga pa hwendo, Jesu anobhuya zviro kangaije zvaikahamaja vazinji, eciti: “Ariwese anoza kondiri acingarambi rudo ka baba, mai, mukaji, vana, hama no uhomi, aakwanisi kuita mujiji wangu.” (Luka 14:26) Asi Jesu waida kurevenyi?

Jesu aaripi kureva kuti vese vanomutevera vanodikana kunyenya ukama hwavo, asi ari kureva kuti ivona, vanodikana kuda maningi Jesu kupinda madire avanoita ukama hwavo. Avadikani kuva inga mwanarume wo mu muezaniso wo zvokuha zvomadeko, wakaramba mukoka unosisira maningi ngo pamusoro po kuti wainga apera kucadha. (Luka 14:20) Bhaibheri rinonanga kuti Jakobe, majicekuru o vaJudha, ‘aacaidepi’ Lia asi waida Rakeri, kana kuti, wakadisisa maningi Rakeri kupinda Lia, yaya wa Rakeri.—Genesi 29:31.

Kunja kwa izvi, Jesu anonanga kuti mujiji anodikana kunyenya “uhomi” hwake kamare. Izvi zvinoreva kuti mujiji wokadi-kadi anodikana kuda Jesu kupinda madire aanoita upenyu hwake, wojipira pikija kutofa kudeya zvecidiwa. Zviri pambhene kuti kuva mujiji wa Kristu ibasa guru. Zvinodikana kunasa kurangarijisisa kakuzvitaja ngo njira kwayo kamare.

Kuva mujiji zvinobatanija kuhwisana no zvineso no kuteverehwa, ngo kuti Jesu anoti: “Ndiani acingathwari ciphambano [‘danda ro kutambujikira,’ Shanduro yeNyika Itsva], wonditevera, aakwanisi kuita mujiji wangu.” (Luka 14:27) Mujiji wokadi-kadi wa Jesu anodikana kutendera kutambujwa inga zvaakaithwa iyena. Jesu wakagumira pa kunanga kuti anozofira mu nyara jo vavengi vake.

Ngo kudaro vaya vari kuenda na Jesu, vanodikana kunasa kurangarira ushoni ngo pamusoro po revo yo kuva mujiji wa Kristu. Jesu anogogomejera fundo iri ecishandisa muezaniso unoti: “Ngowapi wenyu, akada kuvaka rusingo, acingaambi kugara pasi kuti averenge mare, dangani inokwanana kupeja rusingo? Bzicazoitika kuti, sure ko kudira maambo ahwo, wokonehwa kuhupeja.” (Luka 14:28, 29) Ngo kudaro, vacito vakava vajiji va Jesu, vayani vanoenda nae mbhera ku Jerusarema vanodikana kuva vakanasa kutema civaringo cakavanga co kukwanirisa basa ravo. Jesu anodurujira fundo iri ecishandisa muezaniso umweni.

Iyena anoti: “Ngowapi mambo anoenda korhwa na mambo umweni, acingaambi kugara pasi, kuda kuvona kuti dangani anokwanisa korhwa ngo gumi ro bziuru bzo masoca, na mambo umweni anoza kwaari no makumaviri o bziuru bzo masoca?  Kudari acikakoni korhwana, mambo umweni aciri ndhambo, anotuma ndhumwa, kokumbira maitiro o kuzwanana.” Kuti agogomejere fundo guru, Jesu anoti: “Ngokudaro, ariwese komuri acingaregeri upfumi hwake hwese, aakwanisi kuita mujiji wangu.”—Luka 14:31-33.

Jesu aaripi kubvunja basi mbungano iri kumutevererari mu citaka. Vese vanojija ngo pamusoro pa Kristu vanodikana kusunga kuita zvaanonanga. Izvi zvinoreva kuti vanodikana kuva vanotendera kuruza zvese zvavanazvo, kubatanijavo no upenyu hwavo, kudari vakada kuva vajiji va Jesu. Zve vanodikana kuzvirangarijisisa no kuzviitira mukumbiro.

Perepo Jesu anobhuya ngo pamusoro po zvaakambobhuya pa Hurukuro yake yo Padundhu, paakananga kuti vajiji vake vaiita inga “munyu wo nyika.” (Mateu 5:13) Kangaije iyena waida kunanga kuti, kudari inga munyu kamare unoitisa kuti zviro zvitame kuvora, vajiji vake vanoitisavo kuti vandhu vatame kukhuvazika kumujimu, zve vanovajivirira kuti varambe vano mugariro wakanaka nguva jese. Waro mushando wake pawainga wecikwedera ku magumo iyena anoti: “Munyu ngwauxoni. Kaveta ukaruza muho, unozorungwa ngo cinyi?” (Luka 14:34) Vapurutani vake vanozviziva kuti munyu wainga mu ndharaundhemo nguva jimweni wainga wakasvipa, wakazara ngo bukuta, zve ukapera simba rawo aucashandizve.

Ngo kudaro Jesu anotatija kuti pikija vajiji vake vo kare avadikani kurembesa cisungo cavo. Izvi zvikambhera ngo kuitika, ivona vanozova vacina mutengo, votojana no munyu wapera simba rawo. Ngo kudaro nyika yaizovaseka. Cinozonyanya kushata maningi ngo cokuva vandhu vacikasisiri pamberi pa Mwari. Jesu anogogomejera zvingaitisa kuti izvi zvitame kuitika eciti: “Ano njeve, ngaazwe!”—Luka 14:35.