Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 83

Mwari Anokoka Vandhu vo Mushovonyi ku Mabiko Ake?

Mwari Anokoka Vandhu vo Mushovonyi ku Mabiko Ake?

LUKA 14:7-24

  • CIJIJO CO KUJIDODOKESA

  • VAKOKWI VANOPSAKA MATHANGWE O KUTI VATAME KWENDA

Jesu aciri mumba mo muFarisi, zve wapera kurapa mundhu waingaya no ndhundhu. Jesu anovona kuti varendo vamweni vari kukheta kadera, jinonduma, ngo kudaro anoshandisa mukana uwu kuti ape cijijo ngo pamusoro po kujidodokesa.

Jesu anoti: “Ukadanijwa ngo mundhu ku mucado, ucagara pa cigaro cokutanga. Ngokuti kungazowanika mundhu mukuru kupinda iwewe wakadanijwavo ku mucado, kuperapo muno wo nyumba wakakudanija iwewe na yena, woza kokubvunja kuti: ‘Ipai cigaro ici mundhu uu.’ Iwewe wozoenda, no nyowa, kogara pa cigaro cokupejisira.”—Luka 14:8, 9.

Perepo Jesu anoti: “Ukadanijwa, endai kogara pa cigaro cokupejisira; kuti wiya wakakudanija, akazoza, akubvunje kuti: ‘Xamwari! khwederai pambeji!’ Ngokudaro unozoreremejwa ngo vakokwi vese.” Izvi zvinobatanija zvizinji kupinda kuva no maitiro akanaka basi. Jesu anodurujira kuti: “Anojikuja anozododokeswa, ndiani anojidodokesa anozokujwa.” (Luka 14:10, 11) Ngo kudaro iyena anovangisa vapurutani vake kuti vave vanojidodokesa.

Perepo Jesu wo jijisa cijijo cimweni ku vaFarisi vamukokaya. Iyena anobhuya ngo pamusoro po kupekeja cokuha cinomutengo mukuru pamberi pa Mwari eciti: “Ukada kuita cirariro, ucadana xamwari jako, nokuti hama jako, nokuti majibabako no vocigarirano vakhupuki. Ngokuti ivona vangazokudanavo kuti vakuhwirijire. Wecida kuita cirariro, danijai vamasikini, vanothobinya, bzirema no mapofu. Unozopocehwa ndivona, ngokuti avana co kukuhwirijira.”—Luka 14:12-14.

Azvizivi kushata kukoka ukama no shamwari pomwe no vopacigarisano kuti vaviye kuzoha, nee Jesu aaripi kunanga kuti izvi zvakashata. Asi anogogomejera fundo ro kuti kupekeja vatami zvokuha, vakadari inga varombo, zvigono no mapofu, zvingaviisa makomborero akakura. Jesu anobvunja wamukokaya kuti: “Unozohwirijihwa [wecidakara] pa kumuka ko vanasi.” Murendo umweni wakatenderana nazvo eciti: “Ano mucena wiya anoha mukate ku Umambo hwo mugore.” (Luka 14:15) Iyena anozwisisa kuti aya aizova makomborero. Asi asipi vese vanozvivona kudaro, inga zvatinovona pa muezaniso wa Jesu unotevera.

Iyena anoti: “Mundhu umwe wakaita cirariro cikuru, wodanija vazinji. . . . Wakatuma muranda kozivisa vakokwi kuti: ‘Vianyi! Ngokuti bzese bzapera kunasirika.’ Vese, pamwepo, vakaamba kuramba. Wokutanga wakati: ‘Ndakatenga munda, wari bzinodikana kuti ndiende kouvona. Ndinokumbira kuti mundiregerere.’ Umweni wakati: ‘Ndakatenga madjoka [kana kuti kanga] shanu jo n’ombe jo kurima. Bzinodikana kuti ndiende komaeja. Ndinokumbira kuti mundiregerere’. Umwenibze wakati: ‘Ndakarovora. Andikwanisi kuza.’”—Luka 14:16-20.

Aya aacaingepi mathangwe kwawo. Kazinji, mundhu anopopora n’ombe acito atenga, waro kudeya apera kutenga acada kukasikirenyizve! Mundhu wocitatu aaripi kunasirira kuti acadhe. Iyena wakapera kucadha kare, izvo azvicaidikanepi kumuphinga kuti atame kwenda ku mukoka unosisira uwu. Paanozwa zvimathangwe izvi, tenji anonyangajwa maningi no muranda wake.

Iyena anoti: “Kasikai kuenda ku maruvanje no ku makwanja o mutundhu uvie pano no vamasikini, bzirema, mapofu no vanothobinya.” Muranda woenda kovadaninja, asi pamuzi pacinondau. Ngo kudaro tenji anoti: “Endai ku makwanja no mbhararano, uvavangirije kunghwina mu nyumba kuti izare. Bzokadi ndinomubvunja kuti: Na umwe wo vandhu vainga vakakokwa, anozoravira cirariro cangu.”—Luka 14:21-24.

Magama a Jesu anonasa kufananijira ushoni zvakaita Jehovha Mwari paakatuma Kristu kuti akoke vandhu vanozotora rutivi pa Umambo hwo  mugore. Maningi-ningi vatungamiriri vo zviara zvo ciJudha ndivona vakatanga kukokwa. Vazinji vavo vakaramba mukoka pa mushando wa Jesu. Asi vamweni vaizokokwavo. Zviri pambhene kuti Jesu wainga ecinanga kuti kumbejiyo kwaizoithwa mukoka wocipiri kuitira vaJudha vanojidodokesa no majinja amweni. Perepo panozova no mukoka wocitatu no uri wokupejisira ku vandhu vaivoniwa ngo vaJudha inga vacikasisiri pa mberi pa Mwari.—Maitiro o Vapostori 10:28-48.

Pacina kukana-kana, zvinonanga Jesu zvinozwirana kamare no masoko a umwe wo murendo wakananga kuti: “Ano mucena wiya anoha mukate ku Umambo hwo mugore.”