Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 85

Kudakara Panokhauya Mundhu

Kudakara Panokhauya Mundhu

LUKA 15:1-10

  • MUEZANISO WO BVUTA NO MUKURUZADO WAKARASIKA

  • NGIROZI JINODAKARA KUDENGA

Mu mushando wa Jesu, iyena wakagogomejera ku kujidodokesa kunosisira maningi. (Luka 14:8-11) Iyena ari kupsaka vanarume no vanakaji vanoda kushandira Mwari mu kujidodokesa. Pakati po vandhu ava, vamweni vangatozivika inga vashaishi.

VaFarisi no vatari, vanovona kuti vandhu, vavanovonari inga vacikasisiri, vari kudakarira Jesu no masoko ake. Ivona vanoti: “Mundhu uu anoaxira vaxaixi, eciha naivona.” (Luka 15:2) VaFarisi no vatari vaijivona inga vanosisira maningi zve vanorerusa vandhu vakaderera inga bukuta ro musoka javo. Vecitatija kurerusa vandhu ava, vatungamiriri vo zviara vanovashandisira gama ro ciHebhero rokuti ‛am ha·’aʹrets, kana kuti “vandhu vo nyika.”

Asi Jesu anotaja vese no nderemejo, kunaka mwoyo no unyasha. Vandhu vazinji vokujidodokesa kubatanija vayani vanozivikaya inga vashaishi, vakazara ngo cido co kuzwa Jesu. Jesu anozwa kudini paanoshohwa ngo pamusoro po kubesera vandhu vanojidodokesa ava?

Tinokwanisa kuvona mazwiro ake paanoita muezaniso unoshamaisa maningi, wakatojana no waakamboita mu Kafarnaume. (Mateu 18:12-14) Mu mufananijo wa Jesu, vaFarisi vanoimirira vandhu vakanaka vatori muphandu ra Mwari. Asi vanojidodokesa vanoimirira vayani vakapauka vorasika, inga manangire anoita Jesu.

Iyena anoti: “Ngowapi wenyu, kudari ano zana ro mabvuta, ropsejeka rimwe rao, acingaregeri mu bani mabvuta makumapfumbamwe na mapfumbamwe, kuti aende kopsanga rapsejekaro, mbhera ngo kuriwana? Naariwana, anoripingata pa mapfuji, naakadakara. Kuperapo, akaguma pa muzi, anodana xamwari no vocigarirano, wovabvunja kuti: ‘Dakaranyi na inini, ngokuti rawanika bvuta rangu rainga rakarasika.’”—Luka 15:3-6.

Jesu anoshandisa kudini muezaniso uwu? Iyena anoti: “Ndinomubvunja kuti: Mugore munozova no kudakara ngo ndava yo muxaixi umwe anotenderuka, kupinda varungami makumapfumbamwe na vapfumbamwe vacingapsaki kutenderuka.”—Luka 15:7.

Masoko a Jesu ngo pamusoro po kukhauya, ainyangajisa vaFarisi. Ivona vanojivona inga vakarurama; vacikadikani kukhauya. Vamweni vavo pavakashora Jesu, ngo pamusoro po kuha no vashabisi no vashaishi pa makore maviri akapera, iyena wakati: “Andizi kuvia kodanija vakarurama, kaveta vaxaixi.” (Marco 2:15-17) Zvecivoneka kuti vaFarisi vokujikuja avazvivoni kuti vanodikana kukhauya, avavoni mudakaro wavangaviisa kudenga.  Asi mushaishi paanokhauya, kudenga kunova no mudakaro.

Jesu anoita muezaniso umweni unogogomejera kuti mushaishi paanokhauya, kudenga kunova no mudakaro mukuru. Iyena anobhuya ngo zvinoitika pamuzi eciti: “Ngowapi mwanakaji ano gumi ro makuruzado o siriva, kudari akapsejekehwa ngo umwe wao, acingabwakiji cibani, wopsaira ecisotesesa, mbhera kuuwana? Kudari akauwana, anodana xamwari no vocigarirano vake, wovabvunja kuti: ‘Dakaranyi na inini, ngokuti mukuruzado wangu wainga wapsejeka, ndauwana.’”—Luka 15:8, 9.

Jesu anoshandisa muezaniso uwu ngo manera akatojana no muezaniso wo bvuta rakarasika eciti: “Ndinomubvunja kuti: Ku ngirozi ja Mwari, kuno rudakaro ruzinji, ngo ndava yo muxaixi umwe basi wakatenderuka.”—Luka 15:10.

Rangariranyi basi! Ngirozi kudenga jinoda maningi kuti vashaishi vakhauye. Izvi zvinosisira maningi ngo kuti vayani vanokhauya vowana ndau mu Umambo hwo kudenga, vanozova no cigaro cakakura kupinda cigaro co ngirozi. (1 VaKorinto 6:2, 3) Asi ngirozi ajigari no ushanje ngo ndava yazvo. Waro tinodikana kuzwa kudini kudari mushaishi akakhauya wohwirirazve kuna Mwari?