Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 95

Jesu Anojijisa ngo Shwiro yo Kurambana no Kuda Vana

Jesu Anojijisa ngo Shwiro yo Kurambana no Kuda Vana

MATEU 19:1-15 MARCO 10:1-16 LUKA 18:15-17

  • JESU ANOVONESA MAVONERO A MWARI NGO PAMUSORO PO KURAMBANA

  • CIPO CO KUTAMA KUCADHA

  • KUVA INGA VANA VADOKO KUNOSISIRA

Jesu no vajiji vake vanobuda mu Garireya, voambuka Murambo wa Jordhani vecienda kakusi, vanopinda ngo ku Pereya. Hwendo hwo kupejisira hwaainga ku Pereya, Jesu wakabvunja vaFarisi ngo pamusoro po mavonero a Mwari pa shwiro yo kurambana. (Luka 16:18) Wari uno vaFarisi vanomusa shwiro iyi kuti vaeje Jesu.

Mosi wakatara kuti mukaji angarambhwa kudari mwamunake akavona “kwaari ciro cakaxata.” (Deuteronòmio 24:1) Vandhu vano mavonero akasiana-siana ngo pamusoro po thangwe ringaitisa kuti pave no kurambana. Vamweni vanodavira kuti nee cindhango cidoko cingava thangwe ro kuti vandhu varambane. Ngo kudaro vaFarisi vanobvunjisa kuti: “Bzinotendehwa kani murume kupindisa mukaji wake ngo ndava iriyese?”—Mateu 19:3.

Kunja ko kushandisa zvinorangarira vandhu, Jesu ngo ungwaru anoshandisa mavonero a Mwari ngo pamusoro po mucadho eciti: “Amuzivi kujija kuti Marure, pakutungamira, wakavarura mwanarume no mwanakaji eciti: ‘Ndibzo mwanarume anozosia baba na mai, wozobatana no mukaji wake, vovaviri vanozoita muviri umwe basi?’ Ngokudaro avaciripibze vaviri, kaveta muviri umwe. Mundhu acadoparaja bzakabatanijwa ndi Mwari.” (Mateu 19:4-6) Pa kubatanija Adhamu na Evha mu mucadho, Mwari aazivi kumbonanga kuti ciripo caizotendera kuti varambane.

VaFarisi avawirirani no zvinonanga Jesu, ivona vanoti: “Waro, ngenyi Mosi wakatonga kupa tsamba yo rurambano pakupindisa mukaji?” (Mateu 19:7) Jesu anovapingura kuti: “Ngo ndava yo kucunga mwoyo kwenyu Mosi wakamutendera kurambana no vakaji venyu; kaveta, pakutungamira, abzicaitikepi kudaro.” (Mateu 19:8) Jesu paanoti “pakutungamira,” iyena aaripi kunangira mu njiku ja Mosi, asi ari kunangira pakatangiraya Mwari kuumba mucadho mu munda wo Edheni.

Ngo kudaro Jesu anovatatija cokwadi cimweni cinosisira maningi eciti: “Anorambana no mukaji wake (pacina ndava yo upombo), [kana kuti por·neiʹa, mu ciGiriki] wocada umwebze, anopombora.” (Mateu 19:9) Ngo kudaro upombo ndihwona basi hunotendehwa ngo Bhaibheri kuti vandhu varambane.

Vajiji vanoguma pa kunanga kuti: “Kuti bzakadaro, bziri nane kutama kucada.” (Mateu 19:10) Ngo kudaro mundhu ari kurangarira kucadha anodikana kuziva kuti mucadho ngo wokwenda no kwenda.

Ngo pamusoro po kutama kucadha, Jesu anodurujira kuti vamweni vanobahwa vari ngomwa, vacikakwanisi kuita vatano. Vamweni vakaithwa ngomwa voguma pa kukonehwa kuita vatano. Asi kuna vayani vanosunga kucijikira zvido zvavo zvo vatano. Vanoita kudaro kuti vanase kubatikana maningi mu basa ro Umambo. Jesu anovangisa vapurutani vake kuti: “Ndiani anokwanisa kubzizwa, ngaabzizwe.”—Mateu 19:12.

Wari vandhu votanga kuzisa vana vavo kuna Jesu. Asi vajiji vanovagogomera, kangaije vajiji vainga vecirambisa kuti vatame kupingaija Jesu. Paakazvivona, Jesu aazivi kuzvidakarira, wovabvunja kuti: “Regeranyi bzivana bzize kondiri: mucabzirambisa ngokuti Umambo hwa Mwari ngo hwavo. Ndinomubvunja bzokadi kuti ndiani anotama kuaxira Umambo hwa Mwari kudari inga mwana mudoko, aazonghwinimo.”—Marco 10:14, 15; Luka 18:15.

Ici cijijo cikuru maningi! Kuti tinghwine mu Umambo hwa Mwari, tinodikana kujidodokesa tova tinocido co kujija, inga zvinoita vana vadoko. Ngo kudaro Jesu anotatija madire aanoita vana vadoko ngo kuvabata munyara jake no kuvakomborera. Vaya vanoashira “Umambo hwa Mwari inga mwana mudoko,” Jesu anovadavo ngo njira yondhoyo.—Luka 18:17.