Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 99

Jesu Anorapa Mapofu Maviri zve Anobesera Zakeu

Jesu Anorapa Mapofu Maviri zve Anobesera Zakeu

MATEU 20:29-34 MARCO 10:46-52 LUKA 18:35–19:10

  • JESU ANORAPA MAPOFU MAVIRI O KU JERIKO

  • ZAKEU MUSHABISI ANOKHAUYA

Jesu no vandhu vaari kufamba navo vanoguma ku Jeriko, zvecireva kuti vasarihwa ngo mumango wo dhiya imwe basi kuti vagume ku Jerusarema. Jeriko rakaumbhwa ngo mativi maviri; dhorobha rokare rinowanika pa mumango wo makirometro 1,6 no dhorobha ibza. Dhorobha ibza iri, rakavakwa ngo vaRoma. Jesu no vandhu vaari kufamba navo pavanobuda mu rimwe ro madhorobha aya, vecikhwedera phedo no rimweni, mapofu maviri ari kupembha, anozwa joweyowe. Umwe wavo waidaninjwa Bhatoromeu.

Pavanozwa kuti Jesu ari kudarika ngo phedopo, Bhatoromeu no shamwari jake vanotanga kukhuwa veciti: “Tenji, mwana wa Davidi, tiitirenyi unyaxa!” (Mateu 20:30) Vamweni mu mbungano iyi vaivarambija, asi vaviri ava vaiengejera izwi ravo vecidaninja. Ecizwa musindo uwu, Jesu anoima. Wobvunja vaari kufamba navo kuti vadaninje vari kudeketeraro. Ivona vanoenda kuno vapembhi ava perepo vovabvunja kuti: “Itai simba! Mukai: uri kudanijwa ndiyena.” (Marco 10:49) Bofu rinobvisa nguva yaro yo kunja ngo kudakara, roikandira inoo, roenda kuna Jesu.

Jesu anobvunjisa kuti: “Munoda kuti ndimuitirenyi?” Mapofu ese omaviri akadavira kuti: “Tenji, kuti majiso edu afununguke.” (Mateu 20:32, 33) Ecizwira urombo, Jesu anopsasa majiso avo wobvunja umwe wavo kuti: “Endai, kutenda kwako kwakuponesa.” (Marco 10:52) Mapofu ese o maviri anotanga kuvona, zve otanga kukuja Mwari. Pavanovona zvaithwari ndi Jesu, vandhu vanotanga kukuja Mwari. Vandhu vaingaya mapofu vanotanga kutevera Jesu.

Jesu anozenengehwa ngo vandhu vakawanda maningi paanonga ecidarika ngo ku Jeriko. Vese vari kuda kuvona mundhu warapaya mapofu. Vandhu vanozenengera Jesu, nee vamweni avatokwanisi kumuvona. Umwe wo vaikonehwa kuvona ndi Zakeu. Ndiyena mutungamiriri wo vashabisi ku mutundhu wo Jeriko. Iyena aacaikwanisepi kuvona zvainga zveciitika ngo kuti wainga akafupika maningi. Ngo kudaro anogogoma ecienda nyezuru, perepo wokhwira mu zimuti ro mukhowani, Jesu paaida kupinda ndipona. Ari mudenga mondhomo, iyena anokwanisa kuvona zvese zviri kuitika. Jesu paanokhwedera wovona Zakeu ari panyezuru po zimuti, iyena anoti: “Zakeu! kasikai [kubzuka], ngokuti nyamasi wari ndinoda kugara pa muzi pako.” (Luka 19:5) Iyena anobzuka ecida kwenda kooashira murendo wake anosisira maningi.

Vandhu pavanovona zviri kuitika, vanotanga kun’gun’guta. Vanozvivona zvicizivi kurungama kuti Jesu angava murendo wo mundhu wavanovona inga mushaishi. Zakeu wakakhupuka ngo kubira vandhu vaaishabisa.

Jesu paanonghwina mu nyumba ma Zakeu, vandhu vanokhara veciti: “Yena anoenda kogara mu muzi wo muxaixi.”. Asi Jesu anovona kuti Zakeu  angakhauya. Asi izvo azvimusuruvarisi. Zakeu anomuka wobvunja Jesu kuti: “Tenji, ndinopa vamasikini bindikati ro upfumi hwangu. Kudarivo ndakaxaixa ciricese ku mundhu, ndinomuhwirijira rurongomuna.”—Luka 19:7, 8.

Iyi injira yakanaka maningi yokukhombija kuti kukhauya kwake ngo kokadi-kadi. Zvingaita kuti angakwanisa kuziva mutengo waakaashira ku vaJudha ecishandisa maphepha aaitarira o kushabisa. Wari anogondesa kuhwirijira mutengo wakapetwa karongomuna. Zvaari kugondesa zvinopinda zviro zvinokumbihwa ngo mutemo. (Exodo 22:1; VaLevi 6:2-5) Kunja kwa izvi, Zakeu ari kugondesa kupungura ngo pakati upfumi hwake wopekeja varombo.

Jesu anodakara ngo kuti Zakeu wakhombija kamare kuti wakhauya zve anoti: “Nyamasi waguma ruponeso mu muzi umu, ngokuti uuvo mwana wa Abrahama. Ngokuti Mwana wo mundhu waza kopsanga no kuponesa bzainga bzakapsejeka.”—Luka 19:9, 10.

Panguva shomani yapera, Jesu wainga abhuya ngo pamusoro po mugariro wo vandhu ‘vakasvejeka,’ ecishandisa muezaniso wo mwana wakapanduka. (Luka 15:11-24) Wari iyena anoshandisa muezaniso wo zviro zvakaitika kamare no mundhu wainga akarasika perepo wowanikazve. Vatungamiriri vo zviara no vateveri vavo, vanokhara ngo pamusoro pa Jesu, zve vanomushora ngo kutaja ushoni mundhu wakadari inga ndi Zakeu. Asi Jesu anoenderera mberi ecipsaka no kumusijira vana va Abhirahama vakarasika.