Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 92

Anorapa Gumi ro Vanyamapere, asi Anobonga ndi Umwe

Anorapa Gumi ro Vanyamapere, asi Anobonga ndi Umwe

LUKA 17:11-19

  • JESU ANORAPA GUMI RO VANYAMAPERE

Acimbzenga zano ro banje ro Sinedriyo ro kuda kumuuraya, Jesu anoenda ku dhorobha ro Efraimi, rinowanika ku pharamande ra njikazi ko Jerusarema. Anogara kondhoyo no vajiji vake ngokuti kuri ndhambo no vavengi vake. (Johani 11:54) Asi, mukuvo wo Phasika yo mu gore ro 33 N.V.Y. uri kukhwedera, ngokudaro, Jesu anoitazve hwendo ngo kukasika. Iyena anoringa kanjikazi, wopinda ngo Samaria zve anoguma Garireya. Uhu i hwendo hwo kupijisira kuguma mu ndharaundha iyi naacito afa.

Paanondotanga kuita hwendo, Jesu anonghwina mu mutundhu umwe na umwe, zve anowanana no gumi ro vanarume vano mapere. Ndhendha iyi nguva jimweni, inoita kuti muviri uhike-hike, maningi-ningi munjeve, muzvikunwe zvo nyara no zvosoka. (Bziverengo 12:10-12) Mutemo wa Mwari unonanga kuti nyamapere anodikana kugara kundau yake yaega zve paanosongana no mundhu, anodikana kumimira, ecizivisa kuti: “Ndakangora! Ndakangora!”—VaLevi 13:45, 46.

Mukuzwirana no mutemo uu, gumi ro vanyamapere ava vanoima ndhambo na Jesu. Asi, ivona vanomimira ngo izwi guru vaciti: “Jesu, Mujijisi, tiitirenyi unyaxa!” Jesu paavavona, anovabvunja kudari: “Endanyi mojitatija ku vapiri.” (Luka 17:13, 14) Ngo kuita kudaro, anokhombija kureremeja Mutemo wa Mwari, unonanga kuti vapiri ngovanotendehwa kunanga kuti mundhu wainga no mapere, wari waceneswa. Perepo vanoendazve kogara no vandhu vano uhomi hwaushoni.—VaLevi 13:9-17.

Gumi ro vanyamapere ava vanothemba kuti Jesu anaro simba ro kuita mushamaiso. Ivona vanoenda kowanana no vapiri, pikija vacito varapika. Povanonga vari mu gwanja, vanovona kuti kugonda kovaita kuna Jesu kwavabesera. Vanotanga kujivona no kujizwa kuti varapika.

Vanyamapere vapfumbamwe vanoenderera mberi no hwendo. Umwe wavo aaiti kudaro. Mwanarume uu i muSamaria, iyena anohwirira kopsaka Jesu. Anomupsakirenyi? Ari kuda komubonga ngo kurapwa kwaaitwa. Iyena anokuja “Mwari ngo izwi guru,” eciziva kuti ndi Mwari waita kuti arapike. (Luka 17:15) Paanowana Jesu, anogwadama pamberi pake ecimubonga.

Jesu anobvunjisa vakamutendeneja kudari: “Avazivi kurapwa gumi, kani? Vapfumbamwe vamweni vaenda kwapi? Akuwaniki vamweni kuti vavie kokuja Mwari, kuciripi munyikanja uu basi?” Perepo Jesu anobvunja muSamaria uu kudari: “Mukai, utore gwanja rako. Kutenda kwako ngo kwakuponesa.”—Luka 17:17-19.

Ngo kurapa gumi ro vanyamapere, Jesu anokhombija kuti ari kubesehwa ndi Jehovha Mwari. Kusiyapo kurapwa basi ndi Jesu, zvinoita inga kuti iyena wawana gwanja rinoenda ku upenyu hucikaperi. Mazuva ano, Mwari aaripi kushandisa Jesu kuitira kurapa vandhu. Asi, kudari tikagonda Jesu, tinowana gwanja rinoenda ku upenyu—upenyu hucikaperi. Waro tinobongavo Jesu ngo zvaakatiitira, inga zvakaitaya muSamaria here?