Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Kuti Mutevejere Jesu, Ivanyi . . .

Kuti Mutevejere Jesu, Ivanyi . . .

ANOZWIRA PENA

Inga mundhu wakakwana, Jesu aazivi kuwanana no zvineso no kukaya-kaya kwakawanda inga zvinoita vandhu vamweni. Pikija zvakadaro, waizwira maningi pena ku vandhu. Iyena wainga no cido co kuita zvese zvaanokwanisa kuti abesere vandhu, zve waitoita zviro zvingavoneka kuti acaifanera kuzviita. Kuzwira pena kwaimukwevejera kuti abesere vamweni. Vonanyi muezaniso jiri mu Zvipauko 32, 37, 57, 99.

ANOKHWEDEREREKA

Vandhu vo mupira wese—vana vadoko no madhodha—avacaithya kukhwederera Jesu ngokuti acaiita kuti zvivoneke inga wakabatikana maningi kana kuti anosisira maningi. Ngo kuvona haraka yainga na Jesu kovari, vandhu vaijizwa vakasujunuka pamberi pake. Kuti muzvivone, sotanyi mu Zvipauko 25, 27, 95.

ANOITA MUKUMBIRO

Jesu waiita mukumbiro kuna Babake ngo mwoyo wese, paainga ega no paainga no vanamati vamweni vo cokwadi. Iyena waiita mukumbiro pa zviitiko zvakawanda, kuciripi pa mukuvo wokuha basi. Waiita mukumbiro kuna Babake kuti avabonge, kuvasimba no kukumbira ndhungamiriro yavo acito atema zvivaringo zvikuru. Vonanyi muezaniso jinowanika mu Zvipauko 24, 34, 91, 122, 123.

MUCIKARANGARIRI ZVENYU BASI

Pa mukuvo umweni waaida kuzorora no kupeperehwa, Jesu waidira pamutivi zvinodiwa zvake kuti abesere vamweni. Iyena aacainga no mugariro wo kujidira pa kutanga. Ngo kuita kwake kudaro, wakatigajira muezaniso wotingatevejera. Jijanyi kuti muezaniso uu unonangiswa kudini mu Zvipauko 19, 41, 52.

ANOREGERERA

Jesu wakaita zvinopinda kujijisa ngo pamusoro po kuregerera—wakakhombija kuregerera pa matajiro aakaita vajiji vake no vandhu vamweni. Rangariranyi ngo pamusoro po muezaniso jinowanika mu Zvipauko 26, 40, 64, 85, 131.

ANOVANGISIRA

Uporofeti hwakananga kuti vaJudha vazinji vanozoramba kuashira Mesia zve vakorore vake vanozomuuraya. Ngokudaro, zvaizoreruka kuti Jesu aite nungo jo kubesera vandhu. Kusiyapo izvo, waivangisira kuti amusijire kunamata ko cokwadi. Iyena wakagaja muezaniso ku vateveri vake vese vaciripi kudakarihwa ngo vandhu kana kuti vari kutoteverehwa. Vonanyi Zvipauko 16, 72, 103.

ANOJIDODOKESA

Jesu waisiyana no vandhu vacizivi kukwana ngo njira jakawanda, jakadari inga uzivi no ungwaru. Pacina kukana-kana, kukwana kwake kwaimupa zvikwaniriso zvo mumuviri no mu murangariro zvinopinda zvo ariwese hake pakati po vandhu vaimutendeneja. Asi iyena waishandira vamweni ngo kujidodokesa. Munowana zvijijo ngo pamusoro pazvo mu Zvipauko 10, 62, 66, 94, 116.

ANOSENGERERA

Jesu waindova anosengerera ku vapostori vake no vandhu vamweni povaikonehwa kutevejera muezaniso wake kana kushandisa zvaainanga. Ngo kusengerera, Jesu waiphinda zvijijo zvovaida kuti vakwanise kukhwedera kuna Jehovha. Rangariranyi ngo muezaniso jo kusengerera ja Jesu jiri mu Zvipauko 74, 98, 118, 135.