Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 17

Iyena Wojijisa Nikodhemo co Usiku

Iyena Wojijisa Nikodhemo co Usiku

JOHANI 2:23–3:21

  • JESU ANOBHUYA NA NIKODHEMO

  • ZVINOREVENYI ‘KUBAHWA NGAPAPSA’

Paainga ku Jerusarema ku Phasika mu gore ro 30 N.V.Y., Jesu waiita zviro zvinoshamaisa maningi. Ngo pamusoro pazvo vandhu vazinji vano gonda Jesu. Mufarisi umweni waidaninjwa kuti Nikodhemo wo mubanje guru ro ciJudha raizwi Sinedhrio, anoshamaiswa. Ngo kuda kujija zvizinji, Nikodhemo anoenda kuna Jesu co usiku kangaije ngo kuthya kuti waizopera vharori kuvoneka ngo vatungamiriri vamweni vo ciJudha ecienda kuna Jesu.

Nikodhemo wakati: “Rabi, tinobziziva kuti makabva ka Mwari inga mujijisi, ngokuti apana anokwanisa kuita muxamaiso inoitwa ndimwi, acina Mwari.” Ecipingura, Jesu wobvunja Nikodhemo kuti, kuti mundhu anghwine mu Umambo hwa Mwari zvinodikana kuti ‘abahwezve ngapapsa.’—Johani 3:2, 3.

Manji zvinoitika here kuti mundhu abahwezve ngapapsa? Waro Nikodhemo wobvunjisa kuti: “[Harahwa] ingahwirirabze mu ndani ma mai wayo, yobahwabze?”—Johani 3:4.

Haiwa, kubahwazve ngapapsa azvirevi kudaro. Jesu wodurujira kuti: “Apana angakwanisa kunghwina mu Umambo hwo mugore acizivi kubahwabze ngo kumwa no Mujimu.” (Johani 3:5) Ngo kudaro, paakabhabhatijwa zve mujimu mucena wobzuka panyezuru pake, Jesu wakabahwa “ngo kumwa no Mujimu.” Panguva iyi pakazika izwi raibva ngo kudenga recinanga kuti: “Nga uu mwana wangu anodikana, wiya anondidakajisa.” (Mateu 3:16, 17) Ngo njira iyi, Mwari wakazivisa kuti Jesu wainga atova mwana wake wo kumujimu no vetero yo kuzonghwina mu Umambo hwo kudenga. Tevere, pa Pentekoste ya 33 N.V.Y., vandhu vamweni vakabhabhatijwa vakaashira mujimu mucena, vandhu ava vakabahwazve ngapapsa inga vana vo kumujimu va Mwari.—Maitiro o Vapostori 2:1-4.

Nikodhemo aacaikwanisepi kuzwisisa zvaaijijiswa ndi Jesu ngo pamusoro po Umambo. Waro Jesu wobhuya ngo pamusoro po basa rake rinosisira inga Mwana wo kunyama wa Mwari. Iyena anoti: “Kudari ndi Mosi wakakhwija nyoka mu bani, ndibzonavo bzimwebzo bzinodikana kuti Mwana wo mundhu akwijwevo, kuti uwo anomutenda ave no uhomi hucingaperi.”—Johani 3:14, 15.

Kare hako, vaIziraeri pavairumwa ngo nyoka inombvenene, vaidikana kusota nyoka yo utare kuti vatame kufa. (Bzviverengo 21:9) Ngo kudarovo, vandhu vese vanodikana kuva vanodira gonda kuno Mwana wa Mwari kuti vapokonyoke mu rufu vowana upenyu ucikaperi. Ecida kugogomejera rudo huna Jehovha, Jesu wakabvunja Nikodhemo kuti: “Mwari wakadisa nyika yo pasi, kokuti wakapa Mwana wake umwe ega, kuti vese vanomutenda vatame kufa, kaveta vave no uhomi hucingaperi.” (Johani 3:16) Ngo kudaro, mukati mo mweji mutandhatu Jesu naatanga mushando wake, zvakava zvakanasa kujeka ku Jerusarema kuti Jesu ndiyena muponesi wo vandhu.

Jesu wakabvunja Nikodhemo kuti: “Mwari aazivi kutumira Mwana wake mu nyika koipa ndava.” Izvi zvinoreva kuti Jesu aazivi kuviya kuzotonga vandhu kuti vaparajwe. Asi Jesu wakananga kuti iyena wakatumwa “kuti nyika iponeswe ngo njio yake.”—Johani 3:17.

Ngo pamusoro po kuthya, Nikodhemo anopsaka Jesu cousiku. Zvinodakajisa ngo zvokuti Jesu anopejisa ngo kunanga kudari: “Kutongehwa ndava nga uku: Ruveneko [zvinoti, Jesu ngo  njiyo yo zvaaijijisa no upenyu hwake] hwakaza pasi; vandhu vakadisa cidima kupinda ruveneko, ngokuti maitiro avo ainga akaxata. Ndiani anoxaixa anonyenya ruveneko, aazogumi phedo no ruveneko, kuti maitiro ake atame kuzivika. Kaveta ndiani anoita bzokadi anokhwedera ku ruveneko; kuti bzizivike kuti mabasa ake anoteveja Mwari.”—Johani 3:19-21.

Wari Nikodhemo, mufarisi zve mujijisi ku Iziraeri, woda kurangarijisisa ngo pamusoro po zvaapera kuzwa ngo cigaro ca Jesu pa cidisiso ca Mwari.