Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 16

Jesu Anotatija Kuvangisira no Kunamata ko Cokwadi

Jesu Anotatija Kuvangisira no Kunamata ko Cokwadi

JOHANI 2:12-22

  • JESU ANOCENESA THEMBERI

Pasure po mucadho ku Kanaa, Jesu anoenda ku Kafarnaume. Anoenda na make pomwe no hama jake Jakobo, Jasefa, Simoni na Judha.

Manji ngenyi Jesu ari kwenda ku Kafarnaume? Kunja ko kuva no nduma, dhorobha iri rainga rakakura kupinda Nazareta no Kanaa. Kunja kwa izvi, pakati po vajiji vapsa va Jesu, vazinji vavo vaigara mu dhorobha iri kana kuti vaigara ngo phedopo. Ngo kudaro Jesu waizovarovejera kunyika yo vakabarihwa kamare.

Nguva yaanotora ari ku Kafaraume, Jesu anoitazve mabasa anoshamaisa, zve vandhu vazinji vo mudhorobhemo no ndharaundha vozvizwa kuti ngo zvaari kuita Jesu. Asi Jesu no vateveri vake vo vaJudha vakajipira, voda kwenda ku Jerusarema mu gore ro 30 N.V.Y. ku Phasika.

Pavanonga vari mu themberi ku Jerusarema, vajiji vovona ciro cinoshamaisa maningi kuna Jesu, ciro cavainga vacizivi kumbovonazve cingozvo.

Mutemo wa Mwari unokumbira kuti vaIziraeri vaite mupiro wo zvinyama mu themberi, zve vaibva ndhambo vaidikana kuwana cokuha kuti vahe pa nguva yese yavaipeja vari mu dhorobhemo. Ngo kudaro Mutemo waitendera kuti vaibva ndhambo no Jerusarema vaviise mare kuti vatenge “n’ombe, mabvuta,” mbuji no zvimweni zvavangashandisa pavanonga vari mudhorobha. (Deuteronòmio 14:24-26) Ngo kudaro vanyashavo vaitengesa zvinyama no shiri ngo divi rimweni ro themberi. Vamweni vaibira vandhu ngo kudhurisa zvavaitengesa.

Jesu wakanyangajwa zvokuti izanyi muzovona. Wondhandhanisa macereni avaicinjanisaro, wovinduja meza javo zve ogogomera vatengesi vese. Perepo iyena wonanga kuti: “Bvisanyi ibzi pano! Mucaita nyumba ya Baba wangu nyumba yo kutengesera.”—Johani 2:16.

Pavakavona izvi, vajiji va Jesu vakaceukija ciporofita cainanga ngo pamusoro po Mwana wa Mwari caiti: “Rudo [kana kuvangisira] ku Nyumba yenyu hunondipeja.” Asi vaJudha vakabvunjisa kuti: “Civonisonyi co unotipa kuti unokwanisa kuita ibzo?” Jesu wodavira kuti: “Phwanyanyi nyumba ii, inini ndinozoivakabze mu njiku ndhatu.”—Johani 2:17-19; Nduyo 69:10.

VaJudha vairangarira kuti Jesu wainanga nyumba yo themberiyo kamare, ngo zvakaitisa kuti vanange kudari: ‘Nyumba ii yakavakwa pa makumarongomuna na matatu o makore, iwewe unozoivaka pa njiku ndhatu, here?’ (Johani 2:20) Kasike Jesu wainga ecinangira muviri wake inga themberi. Sure ko makore matatu, vajiji vake vakazoceuja magama aya Jesu paakamuswa.