Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

I Gwanja, I Cokwadi no Upenyu

I Gwanja, I Cokwadi no Upenyu

Kangaije munodakarira kuashira masoko aushoni. Ariyo masoko akanaka maningi kuitira imwimwi, ukama hwenyu no shamwari jenyu.

Masoko akanaka aya anowanika mu Bhaibheri, bhuku rakatahwa ngo vandhu vakatungamirihwa ndi Musiki wo mugore no pasi, Jehovha Mwari. Mu bhuku iri, tinozopopora mabhuku marongomuna o Bhaibheri, ano masoko akanaka maningi kuitira itusu tese. Mabhuku aya anozivika ngo mazina o vandhu vakashandiswa ndi Mwari kuti vamatare—Mateu, Marko, Ruka, na Johani.

Vazinji vanodana mabhuku marongomuna aya kuti i Mavhangeri. Ese o marongomuna anosumura vhangeri kana masoko akanaka, ngo pamusoro pa Jesu. Anotatija kuti Jesu anoshandiswa ndi Mwari kuti aponese vandhu zve inga Mambo wo Umambo hwa Mwari, Jesu anozoviisa makomborero acikaperi ku vandhu vese vanomugonda.—Marco 10:17, 30; 13:13.

NGENYI KWAKATAHWA MAVHANGERI MARONGOMUNA?

Kangaije mungajibvunjisa kuti ngenyi Mwari wakaita kuti kutahwe mabhuku marongomuna anobhuya ngo pamusoro po upenyu no jijiso ja Jesu.

Tinobesereka ngo kuva no mabhuku akasiyana o zvakananga Jesu no zvaakaita. Kuti tifananijire, rangariranyi kuti vanarume varongomuna vakaima phedo no mujijisi ano nduma. Mwanarume ari ngo kumbeji ko mujiji i mushabisi. Ari ngo kumukono muho i murapi. Mwanarume ari ngo kumukono boshwe i mutandi zve i shamwari yo pamwoyo yo mujijisi. Zve mwanarume wocirongomuna, ari ngo sure, i mudoko pa vese. Vanarume vese vo varongomuna vakagondeka zve umwe na umwe wavo ano caanopopora pa mujijisi, cakasiyana no covamweni. Kudari umwe na umwe akatara ndhorondho ngo pamusoro po zvinonanga mujijisi no zvaanoita, zvovanotara zvinobhuya masoko no zviitiko zvakasiyana-siyana. Tikapopora ndhorondho jo murongomuna, ticirangarira kusiyana ko mavonero no zvinangwa zvavo, tinokwanisa kunasa kuzwisisa zvakananga mujijisi no zvaakaita. Mufananijo uu unovonesa mabesekero otinoita ngo kuva no mabhuku marongomuna anobhuya ngo upenyu hwo Mujijisi Mukuru, Jesu.

Tikaenderera mberi no mufananijo wiya, mushabisi anoda kuti zvaanotara zvidakajise vandhu vano makuriro o ciJudha. Ngokudaro, anoronga jijiso no  zviitiko zva Jesu ngo njira inovabesera. Murapi anosotesesa pa kurapa vanohwaja no vakaremara, ngokudaro, aatari zvinotahwaya ngo mushabisi kana kuti anozvitara ngo njira yakasiyana. Shamwari yo phedo iya inosotesesa maningi mazwiro no mugariro jo mujijisi. Mujaha wiya anotara ndhorondho yakafupika, ecigurisira-gurisira. Pikija zvakadaro, umwe na umwe wavo anotara izvona kamare. Izvi zvinonasa kufananijira kuti kuva kwedu no ndhorondho murongomuna jo upenyu hwa Jesu, zvinoengejera kuzwisisa kotinoita mabasa ake, jijiso jake no undhu hwake.

Vandhu vangabhuya ngo ‘Vhangeri ra Mateu’ kana kuti ‘Vhangeri ra Johani.’ Izvo azvizivi kushata, ngokuti rimwe na rimwe rao rino masoko akanaka ngo pamusoro pa “Jesu Kristu.” (Marco 1:1) Asi, tingananga kuti tino vhangeri rimwe basi, kana masoko akanaka ngo pamusoro pa Jesu—anowanika mu ndhorondho murongomuna.

Vajiji vazinji vo Soko ra Mwari vanoezanisa no kuzwiranisa masoko anowanika mu bhuku ra Mateu, Marko, Ruka na Johani. Mu gore ro 170 N.V.Y. umwe mutari wo Siria anozwi Tatiani wakavangisira maningi pa kuita kudaro. Iyena wakavona kuti mabhuku marongomuna aya anonanga izvona kamare zve akafemehwa. Iyena wakazwiranisazve masoko ao, kakutara bhuku rinozwi Diatessaron, ro ndhorondho yo upenyu no mushando wa Jesu.

Bhuku iri rinozwi, Jesu—I Gwanja, I Cokwadi no Upenyu rinoitavo kudaro, asi rinonanga izvona kamare zve apana co rinosiya. Izvo zvinokwanisika ngokuti wari tiri kunasa kuzwisisa kukwanirisika ko zviporofeti zvizinji zva Jesu no kukwanirisika ko mufananijo jake. Kuzwisisa uku kunonasa kujekesa zvaakananga no zvaakaita. Kunojekesazve kuti i ciitiko capi cakatanga kuitika. Zvokufumbhuhwa mu mathere zvinobeseravo kuzwisisa masoko amweni no zvaisoteseswa ngo vatari. Kunasa kunanga, apana anokwanisa kuziva ushoni zviitiko zvese zvo muupenyu hwa Jesu. Asi, bhuku iri rinozvibhuya ngo njira yakaezanana no yakajeka.

I GWANJA, I COKWADI NO UPENYU

Pomunoverenga bhuku iri, psakanyi kudira mu musoro masoko makuru o rinobvunja imwimwi no vandhu vamunoda. Mucakanganwa kuti Jesu Kristu ambhwine wakabvunja mupostori Tomasi kuti: “Ndini gwanja, bzokadi no uhomi. Apana anokwanisa kuenda kuna Baba acikapindi ndini.”—Johani 14:6.

Jesu—I Gwanja, i Cokwadi no Upenyu, i bhuku rinozomubesera kuzwisisa kuti ngenyi kamare Jesu i “gwanja.” Ndiena basi gwanja rinotigumisa kuna Jehovha Mwari tikada kuita mukumbiro. Kusiyapo izvo, Jesu i gwanja rinotiitisa kuti tiviirane na Mwari. (Johani 16:23; VaRoma 5:8) Ngokudaro, tinokwanisa kunamata Mwari ngo njira inomudakajisa pacishandiswa Jesu basi.

Jesu i ‘cokwadi.’ Iyena wakavereketa no kupona mukuzwirana no cokwadi, zvoita inga kuti cokwadi cakona ndiena. Kuno uporofeti hwakawanda hwaakakwanirisa, hwova “‘hina’ mwa Jesu.” (2 VaKorinto 1:20; Johani 1:14) Uporofeti uhu hunotibesera kuzwisisa basa guru ra Jesu mu kukwanirisika ko cidisiso ca Mwari.—Apokalipsi 19:10.

Zve Jesu Kristu i “uhomi.” Ngo muripo, kupira kwaakaita muviri wake wakakwana no ngazi yake, wakaita kuti tikwanise kuwana “uhomi hwokadi-kadi,” kuda kureva “uhomi hucikaperi.” (1 Timoti 6:12, 19; VaEfeso 1:7; 1 Johani 1:7) Iyena anozokhombijazve kuva “uhomi” ku zviuru no zviuru zvo vakafa povanozomuswa no vetero yo kupona kwenda no kwenda mu Paradhiso.—Johani 5:28, 29.

Tese tinodikana kuzwisisa no kureremeja basa ra Jesu mu kukwanirisika ko cidisiso ca Mwari. Dakajihwanyi ngo kujija zvakawanda ngo pamusoro pa Jesu—“gwanja, bzokadi no uhomi.”