Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 DIVI RO CITATU

Mazwiro o Kuhwajihwa—Patinonga tino “Ciricese no Mudoni Wedu”

Mazwiro o Kuhwajihwa—Patinonga tino “Ciricese no Mudoni Wedu”

“Imwe hambzaji yo pa ungano yangu yakandipumbha kuti ndakaba mare yayo. Vamweni pa ungano vakazvizwa, votanga kundinyenya. Pakupejisira, hambzaji iyana yakandibvunja kuti yakazwa masoko amweni aikhombija kuti inini andicainga no ndava. Pikija iyona yakakumbira kuregerehwa, mu mwoyo mwangu andicaikwanisa kuiregerera ngo ndava yo zvakaitika.”—Linda.

MAKAMBOITIKIHWAVO ngo zvakaitikirari Linda, uwo wakahwajihwa maningi ngo zviito zvo mutendi doni here? Zvinosuruvarisa ngo zvo kuti vazinji vari kubviringijwa murangariro ngo mufambiro wo vamweni vogumira pa kupsasa mabasa avo o kumujimu. Zvakaitikavo kwamuri here?

Aripo Angakwanisa “Kutiparajanisa ku Rudo hwa Mwari” Here?

Ngo zvokadi kuti, nguva jimweni cingava cineso kuregerera mutendi doni watinyangaja. Pamusoro pa zvese, maKristu vanodikana kuva no rudo umwe kuno umweni. (Johani 13:34, 35) Tikanyangajiswa ngo mutendi doni, tingava tinonyiswa ngo kutama mudakaro no kuhwajihwa.Nduyo 55:12.

I zvokadi kuti, Bhaibheri rinozvitenderavo kuti nguva jimweni maKristu angava no “ciricese” umwe kuno umweni. (VaKolosi 3:13) Kunyazi zvakadaro, tingazvivona kunesa kuhwisana nazvo, zvikaitika kwatiri. Waro, kuno ciri cese cingatibesera here? Vonanyi zviambi zvitatu zvo mu Matahwa.

Baba wedu vo mugore vanoziva zvese. Jehovha anovona zvese zvinoitika, kubatanija kushaishihwa kuri kwese kwatinosongana nako pomwe no dambujiko rinoviiswa ndikona. (Vaheberi 4:13) Kusiapo izvo, Jehovha anotizwira urombo patinotambujika. (Isaia 63:9) Iyena aatenderi kuti “dambujiko” kana kuneseka kana kuti ciri cese haco—nee umwe wo vashandiri vake—‘atiparajanise ku rudo hwa Mwari.’ (VaRoma 8:35, 38, 39) Ngo kudaro, atidikanivo kutendera kuti ciri cese kana kuti ari wese atiparajanise na Jehovha.

Kuregerera Asipi Kutendera Cishaishi. Patinoregerera vayani vanotishaishira, atiripi kurerusa, kupembeja, kana kutendera zviito zvavo zvakashata. Ceujanyi kuti, Jehovha aazombotenderi cishaishi, asi anoregerera kudari pano thangwe ro kuzviita. (Nduyo 103:12, 13; Habakuki 1:13) Jehovha paanotivangisa kuti tiregerere vamweni, iyena anonga ecitikumbira kuti timutevejere. “Cikorore cake acindogari kucikaperi.”Nduyo 103:9; Mateu 6:14.

Tikatama kuviga bundu, tinobesereka pacedu. Kuitisa kudini? Rangariranyi ciitiko ici. Maboja buwe, moribata motambanuja mukono, kangaije ricikaremi maningi haro. Izvi azvicaizomunesa kuramba makaribata pa nguva shomani. Asi tingati kudini kudari mukaeja kuramba makaribata pa mukuvo wakareba padoko? Maizokwanisa kuzviita pa mukuvo wakadini?—museswa umwe? Nguva imwe? Kana kupindirija? Atikakaniji kuti, mukono wenyu waizoguma pakuyoya maningi! I zvokadi kuti, buwe riana ariengejeri kurema. Asi pamunoramba makaribata, munorambavo meciengejera kuzwa kuremehwa. Ndizvona zvinoitikavo no kuviga bundu. Patinoramba takaviga bundu—pikija ngo ndava yo ciro cidoko—tinoengejeravo kuhwajihwa. Ngo iyo ndava, Jehovha anotikurumijira kuti titame kuviga bundu.  Hina, kutama kuviga bundu zvinobeserazve itusu.Mazwi Akangwara 11:17.

Tikatama kuviga bundu, tinobesereka pacedu

“Ndakajizwa inga kuti Jehovha pacake waibhuya na inini”

Cicinyi cakabesera Linda kuti atame kuviga bundu pasure po zvese zvaakaitihwa ngo mutendi doni? Cimwe co zvaakaita, cakava co kurangarijisisa mathangwe anowanika mu Matahwa anokhombija kuti ngenyi tinodikana kuregerera. (Nduyo 130:3, 4) Linda wakandundihwa maningi ngo kuziva kuti tikaregerera, mukuhwirijira, Jehovha anozotiregereravo. (VaEfeso 4:32–5:2) Ecibhuya ngo pamusoro po mapsasihwe aakaizwa ngo mazwiro awo, Linda wakati: “Ndakajizwa inga kuti Jehovha pacake waibhuya na inini.”

Ngo kufamba ko nguva, Linda wakakwanisa kubvisa bundu rake. Iyena wakaregerera kamare hambzaji iya, zve wari iyona i shamwari yake inodiwa. Linda ari kuenderera mberi mu basa ra Jehovha. Imwimwivo, ivanyi no gwinyiso ro kuti Jehovha anoda kumubesera kuti muite zvimwezvo.