Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Karata Inobva ku Mukhumbi Unotonga

Karata Inobva ku Mukhumbi Unotonga

Vatendi doni vanodiwa:

Inga zvamunoziva, Bhaibheri i bhuku ro kuti kazinji rinobhuya ngo pamusoro po vandhu. Vazinji vainga vanarume no vanakaji vaigondeka vakasongana no zvineso zvizinji zvakadari inga zvatinosongana nazvo. Ivona vainga no mazwiro ‘akadari inga itusu.’ (Jakobo 5:17) Vamweni vaizarihwa ngo zvineso no kuthimwa-thimwa. Vamweni vainga vakashaishihwa ngo vo paukama pavo kana ngo vatendi doni. Mutengo wakatikuti wavo waitambujika ngo kujizwa vano ndava ngo pamusoro po kuposa kwavo.

Ivona vakasia Jehovha kamare here? Haiwa. Vazinji vavo vaidari inga mutari wo nduyo uwo wakaita mukumbiro eciti: “Ndinopauka inga bvuta rakapsejeka: vianyi kopsaka muranda wenyu! Hina, inini andikanganwi mupango yenyu.” (Nduyo 119:176) Muno mazwiro akadaro here?

Jehovha aazombokanganwizve vashandiri vake vakapauka kubva mu phandu. Mukusiana, iyena anovapsaka—kazinji anozviita ecishandisa vatendi doni. Inga muezaniso, vonanyi kuti Jehovha wakabesera kudini Jobe paakasongana no zvineso zvakasiana-siana—zvaibatanija kuruza upfumi, kuruza vadiwa zve kubatwa ngo ndhendha yaikura maningi. Jobe wakacungirira masoko anokhugunya aivereketwa ngo vaya vaidikana kumubesera. Asi, iyena aazivi kumbofuratira Jehovha, pikija wakambopauka mu murangariro pa nguva shomani. (Jobe 1:22; 2:10) Jehovha wakabesera kudini Jobe kuti ave anomusijirikazve?

Maitiro amwe akashandisa Jehovha kuti abesere Jobe ngo o kushandisa mutendi doni waidanijwa Eriu. Jobe paakananga zvineso zvake, Eriu wakamupurutana perapo wozodavira. Zvicinyi zvaakananga? Kureva kuti wakamuvereketera kana wakaeja kumumusazve ngo kuita kumupumbha kana kumupseruja here? Iyena wakajivona inga ari pamusoro kupinda Jobe here? Aazivi kuzviita nee padoko. Ecibesehwa ngo mujimu mucena wa Mwari, Eriu wakananga kudari: “Inini ndakaezana newe pambeji pa Mwari; ininivo ndakaruhwa ngo dongo.” Perepo wakavangisa Jobe eciti: ‘[“Kuthyisa,” NM] kwangu akuzokuthyisi, nyara yangu icadorema panyezuru pako.’ (Jobe 33:6, 7) Kusiapo kuengejera muthwaro kuna Jobe, Eriu no rudo hwese wakapa mbhangiro no vangiso yaida Jobe.

Tapota zivanyi kuti, mujimu umwewo ndiwona wakaita kuti tinasirire bhurushura iri. Cokutanga, takapurutana no kungwarira kwese mugariro no mazwiro o vaya vakapauka. (Mazwi Akangwara 18:13) Perapo takasota mu Matahwa, no mukumbiro takapopora mabesere akaita Jehovha kuno vashandiri vake vo kare pavaisotana no mugariro jakadari inga iji. Pakupejisira, takazwiranisa zviitiko izvo zvo mu Matahwa no zviitiko zvo mazuva ano tobudisa bhurushura iri. Ngo rudo hwese, tinomukoka kuti mupopore masoko ari mu bhurushura iri. Tapota ivanyi no gwinyiso rokuti, ngo mwoyo wese tinomuda maningi.

Mukhumbi Unotonga wo Zvapupu zva Jehovha