Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MASOKO O KUENGEJERA

Zina ra Mwari—Mashandisihwe aro no Zvarinoreva

Zina ra Mwari—Mashandisihwe aro no Zvarinoreva

NDUYO 83:18 yakasandujiswa kudini mu Bhaibheri renyu? Mu Tradução do Novo Mundo da Bíblia Sagrada, vhesi iyi yakasandujiswa kudari: ‘Kuti vandhu vazive kuti imwimwi muno zina rinozwi Jehovha, imwimwi mega ndimwi wo Panyezuru-zuru po pasi pano pese.’ Sandujo nganani jimweni jo ma Bhaibheri, jakasandujwavo munjira yakafanana. Asi, sandujo zinji jakabvisa zina ra Jehovha, pandau paro vodira mazina o kureremeja akadari inga “Tenji” kana “Acingaperi.” Cicinyi caidikana kushandiswa pa vhesi iyi? I zina ro kureremejwa kana zina kamare rokuti Jehovha?

Zina ra Mwari mu karata jo CiHebheru

Vhesi iyi inobhuya ngo pamusoro po zina. Mu ciHebheru co kutanga, makatorehwa masoko mazinji akatahwa mu Bhaibheri, mainga muno zina kamare. Raitariswa kudari יהוה (YHWH) mu karata jo ciHebheru. Mu Cindau, kazinji zina iri rinozwi “Jehovha.” Zina iri, rinowanika mu vhesi imwe basi mu Bhaibheri here? Haiwa. Mu Matahwa o kutanga o ciHebheru rinowanika mu ndau jinokhwedera 7.000!

Zina ra Mwari rinosisira maningi here? Ambovonanyi mukumbiro wo kuezanisira wakaithwa ndi Jesu Kristu. Unotangisa kudari: “Baba wedu muri nyezuru, zina renyu ngarikojeswe.” (Mateu 6:9) Tevere, Jesu wakaita mukumbiro kuna Mwari eciti: “Baba reremejanyi zina renyu.” Mwari wakamupingura ari kudenga eciti: “Ndakarireremeja, ndozorireremejabze.” (Johani 12:28) Zviri pambhene kuti zina ra Mwari rinosisira maningi. Waro ngenyi vasanduji vamweni vakabvisa zina iri ku sandujo javo jo Bhaibheri pandau paro vodira mazina o kureremejwa?

Zvinoita inga pano mathangwe makuru anokwana kuita maviri. Ro kutanga nga iri, vazinji vanonanga kuti zina iri aridikani kushandiswa ngo kuti manangire araiithwa parakatangira apana anomaziva nyamasi uno. VaHebheru vo kare vairitara vacikashandisi mavhogari. Ngo kudaro, apana anokwanisa kubhuya ngo gwinyiso kuti vandhu vo munguva jo Bhaibheri vaiverengesa kudini zina iri YHWH. Asi izvi zvingatirambija kuti titame  kushandisa zina ra Mwari here? Munguva jo Bhaibheri, zina ro kuti Jesu rainangwa kuti Yeshua kana kangaije Yehoshua—apana ano gunyiso razvo. Asi vandhu mu nyika yese nyamasi, vanoshandisa zina ra Jesu mu njira jakasiana-siana, vecirinanga mu kuzwirana no manangihwe arinoithwa mu ndumi yavo. Ivona avathyi kushandisa zina iri ngo ndava basi yo kuti avazivi manangiro araiithwa mu zana ro makore ro kutanga. Mukufananavo, kudari mukaita hwendo ku nyikanja, kangaije maizokhanda zina renyu kamare recinangwa mu njira jakasiaya mu ndumi imweni. Ngo kudaro, kutama kunasa kuziva manangihwe aiithwa zina ra Mwari kareko asipi thangwe ringatiitisa kuti titame kurishandisa.

Thangwe ro cipiri rinoitisa kuti vandhu vabvise zina ra Mwari mu Bhaibheri rinobatanija cirovejeso cokare co vaJudha. Vazinji vavo vaidavira kuti zina ra Mwari aridikani kumbonangwazve. Zviri pambhene kuti zvitendhwa izvi, zvakacijikira mukushaisha kushandiswa ko mutemo wo Bhaibheri unonanga kuti: “Ucazopika biresi zina ra [Jehovha] Mwari wako, ngokuti [Jehovha] Mwari aazoregeri acina ndava wiya anozopika biresi zina rake.”Exodo 20:7.

Mutemo uwu unorambisa kushaisha kushandisa zina ra Mwari. Asi izvi zvinorambijavo kushandisa zina rake no nderemejo here? Haiwa. Vatari vo Bhaibheri ro ciHebheru (“Testamento yo Kare”) vese vainga vandhu vakagondeka, vairarama pasi po mutemo wakapekeja Mwari ku vaIziraeri vo kare. Asi, ivona vakashandisa kazinji zina ra Mwari. Ngo kudaro, ivona vakatoridiravo mu nduyo zinji jaiimbhwa ngo izwi guru ro mbungano yo vanamati. Jehovha Mwari wakatobvunja vanamati vake kuti vadanije zina rake, zve vaigondeka vakapurutana. (Joeli 2:32; Maitiro o Vapostori 2:21) Ngo kudaro, maKristu nyamasi uno aathyi kushandisa zina ra Mwari no nderemejo, inga zvakaita Jesu kamare.Johani 17:26.

Ngo kufakeya ngo mazina o kureremejwa pa ndau yo zina ra mwari, vasanduji vo Bhaibheri vakaposa maningi. Ivona vakaita kuti Mwari aite inga ari ndhambo zve asipi mundhu kamare, kasike Bhaibheri rinotikonokeja kuti tisakurire “citenderano” kana ushamwari na Mwari. (Nduyo 25:14) Amborangariranyi shamwari yenyu yo phedo. Maizovadi no ushamwari hwo phedo kamare, kudari mucikambozivi no zina ro shamwari yenyu here? Mukufananavo, kudari vandhu vacikazivi zina ra Mwari, Jehovha, zvaizoitika kuti vave no ushamwari hwo phedo na Mwari here? Cimwenizve nga ici, vandhu pavanotama kushandisa zina ra Mwari,  ivona avazozivi revo inoshamaisa yo zina iri. Ngoyapi revo yo zina ra Mwari?

Mwari pacake wakadurujira revo yo zina rake ku mushandiri wake wakagondeka, Mosi. Mosi paakabvunjisa zina ra Mwari, Jehovha wakapingura kuti: ‘Ndinozova zviyani zvandiri.(Exodo 3:14, NM) Sandujo yo Rotherham (mu Cingezi) inomanangisa kudari magama aya: “Ndinozova wo wandinoda kuti zvindidakajise.” Ngo kudaro Jehovha angaita kuti cese cinodiwa kuti akwanirise cidisiso cake.

Ngatimboti imwimwi munokwanisa kuita ciri cese camunoda kuti ciitike. Cicinyi camaizoitira shamwari jenyu? Kudari umwe wavo akahwaja kamare, maizova dhokodheya wakanaka zve momurapa. Kudari umweni akaperehwa ngo mare keni, maizova mupfumi zve mo mubesera. Asi cokwadi nga ici, simba renyu rino parinogumira mu zvamungaita. Tese takadarovo. Pamunonga mecijija Bhaibheri, munozoshamaiswa ngo kuvona maitire a Jehovha ciri cese caanoda kuti akwanirise cidisiso cake. Zve anodakajihwa ngo kushandisa simba rake kuti abesere vaya vanomuda. (2 Kronike 16:9) Divi iri rinodakajisari ro undhu hwa Jehovha riri kuruzika kuna vayani vacikazivi zina rake.

Ngo zvokadi kuti zina ra Jehovha ngo ro mu Bhaibheri. Kuziva revo yaro no kurishandisa takasujunuka mu kumunamata kwedu zvinotibesera maningi kuti tikhwedere phedo na Baba vedu vo kudenga, Jehovha. *

^ ndim. 12 Kuti muwane masoko mazinji o zina ra Mwari, revo yaro, no thangwe rinoitisa kuti rishandiswe mu kunamata, vonanyi bhurushura O Nome Divino Que Durará Para Sempre rakabudiswa ngo Zvapupu zva Jehovha. Vonanyi masoko o kuengejera mu Tradução do Novo Mundo das Escrituras Sagradas, 2013, cipauko A4.