Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 8

Umambo hwa Mwari Icinyi?

Umambo hwa Mwari Icinyi?
  • Bhaibheri rinotibvunjenyi ngo pamusoro po Umambo hwa Mwari?

  • Cicinyi cinozoita Umambo hwa Mwari?

  • Umambo uhu hunozoita rini kuda ka Mwari pasi pano?

1. Mukumbiro wapi unozivika maningi watinoda kupopora wari?

ZVIURI zvo vandhu mu nyika yese vano ziva mukumbiro wiya unodaninjwaya ngo vazinji kuti Baba Wedu, kana kuti Mukumbiro wa Tenji. Mazina ese o maviri, anonangira mukumbiro wo kuezanisira unozivika maningi, wakapekejwa ndi Jesu Kristu pacake. Iwona mukumbiro uno revo maningi, zve kuvona zvikumbiro zvawo zvitatu zvo kutanga, zvinozomubesera kuti mujije zvizinji ngo pamusoro po zvinojijisa Bhaibheri kamare.

2. Zvainga zviro zvitatu zvapi Jesu zvaakajijisa kuti vajiji vake vakumbire?

2 Panotangira mukumbiro wokuezanisira uwu, Jesu wakajijisa vapurutani vake kuti: “Munozokumbira kudari: ‘Baba wedu muri nyezuru, zina renyu ngarikojeswe, Umambo hwenyu ngahuze kwedu, kuda kwenyu ngakuitwe pasi pano inga nyezuru.’” (Mateu 6:9-13) Zvinorevenyi zvikumbiro zvitatu izvi?

3. Zvicinyi zvatinodikana kuziva ngo pamusoro po Umambo hwa Mwari?

3 Mbera wari tatojija zvizinji ngo pamusoro po zina ra Mwari, Jehovha. Tatozama kubhuisana ngo pamusoro po zvinodiwa na Mwari—zvaakaita no zvaanozoitira vandhu vese. Jesu wainangirenyi paakatibvunja kuti tikumbire kuti: “Umambo hwenyu ngahuze”? Umambo hwa Mwari i cinyi?  Kuviya kwaho kunoitisa kudini kuti kucenese zina ra Mwari, kana kuriita rakacena? Kuviya ko Umambo uhu, kunozwirana kudini no kuithwa ko zvinoda Mwari?

UMAMBO HWA MWARI I CINYI?

4. Umambo hwa Mwari i cinyi, zve ndiyani Mambo waho?

4 Umambo hwa Mwari, hutongi hwakagajwa ndi Jehovha Mwari, huna mambo wakasanwa ndi Mwari. Ndiyani Mambo wo Umambo hwa Mwari? Ndi Jesu Kristu. Jesu inga Mambo, wakakurisisa kupinda majimambo ese o vandhu zve anodaninjwa kuti ndi “Mambo wo majimambo no Tenji wo majitenji.” (1 Timoti 6:15) Iyena ano simba ro kuita zvakanaka maningi kupinda mutongi ariwese wo vandhu, pikija wakatonaka maningi pakati pavo.

5. Umambo hwa Mwari, hunozotonga huri kwapi, zve hunozotonga cinyi?

5 Umambo hwa Mwari, hunozotonga huri kwapi? Jesu ari kwapi? Zvokadi muri kuceukija pamakajija kuti iyena wakauraiwa pa danda ro kutambujikira, perapo womuswa. Naamuswa, aazivi kutora nguva yakareba, iyena wakaenda kudenga. (Maitiro o Vapostori 2:33) Ngokudaro, kondhoyo ndikona kuno Umambo hwa Mwari—mugore. Ngo zvinoitisa kuti Bhaibheri riudaninje kuti “Umambo . . . hwo mu gore.” (2 Timoti 4:18) Pikija Umambo hwa Mwari huri mugore, ihwona hunozotonga pasi pano.Verenganyi Apokalipsi 11:15.

6, 7. Cicinyi cinoitisa kuti Jesu ave mambo anoshamaisa?

6 Cicinyi cinoitisa kuti Jesu ave mambo anoshamaisa? Thangwe rimwe ngo rokuti, iyena aazombofizve. Bhaibheri reciezanisa Jesu no majimambo o vandhu rinonanga kuti, ndiyena “ano uhomi hucikaperi basi.” (1 Timoti 6:16) Izvi zvinoreva kuti, zviro zvese zvakanaka zvinoithwa ndi Jesu zvinoramba zviripo. Zve iyena anozoita zviro zvakawanda zvinozobesera vandhu vake.

7 Ambovonanyi uporofita hwo Bhaibheri uhu ngo pamusoro pa Jesu: ‘Panyezuru pake panozomata mujimu wa  Jehovha, mujimu wo uzivi no wo kuzwisisa, mujimu wo kupangira no wo simba, mujimu wo kuziva no kuthya Jehovha. Zve anozodakara ngo kuthya Jehovha. Zve aazotongi vandhu inga mavonekere avo pameso ake, aazopangiri ngokuteveja zvaanozwa ngo njeve jake. Anozotonga ngo kururama vano magariro akaderera, anozoita matongero akarungama ku vashuphwi vo nyika, anozotaka nyika ngo mushakwe wo muromo wake; ku vakashata, anozovaendesa ku rufu ngo mujimu wo muromo wake.’ (Isaia 11:2-4, NM) Masoko aya anovonesa kuti Jesu waizova mururami zve Mambo ano usizi no vandhu vo pasi pano. Amucaidakarirepi kuva na mambo wakadari here?

8. Ndiyani anozotonga na Jesu?

8 Vonanyi cokwadi cimwenizve ngo pamusoro po Umambo hwa Mwari: Jesu aazotongi ari Ega. Anozova no vamweni vaacazotonga navo. Inga muezaniso, mu postori Pauro wakabvunja Timoti kuti: “Tikatamba nyatwa na yena [kana tikacungirira], tinozoita majimambo na yena.” (2 Timoti 2:12) Hina, Pauro, Timoti no vagondeki vamweni vakasanwa ndi Mwari vanozotonga pamwepo na Jesu mu Umambo hwo kudenga. Vangana vano mukana uwu?

9. Vangana vanozotonga na Jesu, zve Mwari wakatanga kuvasana rini?

9 Inga zvakanangwa mu Cipauko 7 co bhuku rino, mupostori Johani wakavoneswa ‘Bvuta [Jesu Kristu] rakaima pa dunthu ro Sioni [cigaro cake co umambo kudenga]. Pamwepo na irona vakavonekavo 144.000 bzo vandhu, vainga no zina ro bvuta no zina ra Baba waro rakatahwa pa huma.’ 144.000 ndivanaani? Johani pacake anotibvunja kuti: “Ndivona vaya vacikazivi [kun’gora] ngo vanakaji, vanoita inga mbhandwe. Ndivona vanotevera Bvuta, kwese korinoenda. Vakaripihwa inga matangwe o vandhu kuna Mwari no kuno Bvuta.” (Apokalipsi 14:1, 4) Hina, ivona vateveri vanosisira vakagondeka va Jesu Kristu vakasanwa kuti vatonge na iyena ku mugore. Pasure po kumuswa kubva mu rufu kuenda ku upenyu hwo kudenga, ivona “vanozotonga pasi pese”  pamwepo na Jesu. (Apokalipsi 5:10) Kubvira mu njiku jo vapostori, Mwari ari kusana maKristu akagondeka kuti azajise mutengo unokwana 144.000.

10. Ngenyi nasiriro yokuti Jesu no vanokwana 144.000 vatonge vandhu vese ngo yo rudo maningi?

10 Nasiriro yo kuti Jesu no 144.000 vatonge vandhu vese, ngo yo rudo maningi. Cokutanga, Jesu anoziva kuti kuva mundhu kudini, zve kutambujika kudini. Pauro wakananga kudari ngo pamusoro pa Jesu: “Anokwanisa kuzwira unyaxa kurembejeka kwedu, ngokuti yena kamare wakaejwa ko bzese, kudari inga itisu, bziciripi bzixaixi.” (Vaheberi 4:15; 5:8) Vatongi doni vake vakatambujikavo zve vakacungirira inga vandhu. Mukuengejera, ivona vakahwisana no kutama kukwana zve vocungirira mushovo wese wo ndhendha. Zvokadi, ivona vanozozwisisa zvineso matambujiko anosotana no vandhu!

CICINYI CINOZOITA UMAMBO HWA MWARI?

11. Ngenyi Jesu wakananga kuti vajiji vake vaidikana kukumbirira kuti kuda ka Mwari kuitike kudenga?

11 Jesu paakananga kuti vajiji vake vaidikana kukumbirira Umambo hwa Mwari kuti huvie, wakanangavo kuti vaidikana kukumbirira kuda ka Mwari kuitike “pasi pano inga nyezuru.” Mwari ari kudenga, zve kuda kwake kwainga kwecindoithwa kondhoyo ngo ngirozi jakagondeka. Mu Cipauko 3 co bhuku rino, takajija kuti ngirozi yakashata yakakamisa kuithwa ko kuda ka Mwari yoitisa kuti Adhamu na Evha vashaishe. Mu Cipauko 10, tinozojija zvizinji ngo pamusoro po zvinojijisa Bhaibheri ngo pamusoro po ngirozi yokushata iyi, watinodaninjaya kuti Sathana Dhiabhu. Sathana no ngirozi jiya jakasanwa kumutevera—jinodaninjwaya kuti madhimoni—jakatendehwa kuramba jiri mugore pa cinguva cakatikuti. Ngo kudaro, asipi vese vainga kudenga vaiita kuda ka Mwari. Izvi zvaizocinja paizotonga Umambo hwa Mwari. Mambo wainga acabva kugajwa, Jesu Kristu, waidikana kuhwa hondo na Sathana.Verenganyi Apokalipsi 12:7-9.

12. Zviitiko zvapi zviviri zvinonangwa pa Apokalipsi 12:10?

 12 Masoko o uporofita ari kutevera, anosanangura zvaizoitika. “Mu denga, makazika izwi guru rakati: ‘Hwaguma unyisi, simba no kutonga kwa Mwari wedu, pamwepo no utongi hwo Wokuzojwa wake. Ngokuti wawiswa pasi murevi wo hama jedu, waijireva ka Mwari wedu, usiku no masikati.’” (Apokalipsi 12:10) Mavona here zviitiko zviviri zvinosisira maningi zvanangwa pa vhesi yo Bhaibheiri iyi? Cokutanga, kutanga kutonga ko Umambo hwa Mwari hwecitungamirihwa ndi Jesu Kristu. Cocipiri, kukandihwa ka Sathana pasi pano kubva mudenga.

13. Ngo wapi wakava mugumisiro wo kukandihwa ka Sathana kubva kudenga?

13 Ngo wapi wakava mugumisiro no kuda ko zviitiko zviviri izvi? Ngo pamusoro po zvakaitika kudenga, tinoverenga kuti. “Ngo ndava yabzo, dakaranyi gore no mwese munogaremo.” (Apokalipsi 12:12) Hina, ngirozi jakagondeka kudenga jiri kudakara ngo kuti, Sathana no madhimoni ake wari aaciko, umwe nga umwe ari kuva wakagondeka kuna Jehovha Mwari. Hwatopera kuithwa, runyararo no kuzwirana hucingaparajikizve. Wari uno kuda ka Mwari kuri kuithwa kudenga.

Kukandihwa ka Sathana no madhimoni ake kubva kudenga kwakativiisira ndhamo pasi pano. Nyathwa yondhoyo inopera mbaimbai

14. Cicinyi cakaitika pasi pano ngo kukandihwa ka Sathana?

14 Tingati kudinivo no pasi pano? Bhaibheri rinoti: “Khombo pasi pano no mu jombe, ngo kuti Sathana wakaderuka pasi, wakazara ngo runya, anoziva kuti nguva yaanayo i doko.” (Apokalipsi 12:12) Sathana wakanyangajwa ngo kukandihwa kubva mudenga zve wasarihwa ngo cinguva cidoko basi. Mu ushungu hwakadari iyena ari kubara nyathwa kana kuti “khombo” pasi pano. Tinozojija zvizinji ngo pamusoro po “khombo” iri mu cipauko cinotevera. Tecirangarira nyathwa iyi kangaije tingajibvunjisa kuti: Zvingaitikisa kudini kuti Umambo huite kuda ka Mwari pasi pano?

15. Ngo kwapi kuda ka Mwari ngo ndava yo pasi?

15 Hina, amborangariranyi kuda ka Mwari ngo ndava yo pasi pano. Makazvijija mu Cipauko 3. Mu Edheni, Mwari wakavonesa  kuti kuda kwake kwainga kokuti pasi pano pave munda wo paradhiso yakazara ngo vandhu vacingafi zve vakarungama. Sathana wakaitisa kuti Adhamu na Evha vashaishe, zve izvi zvakapingaija kukwanirisika ko zvinoda Mwari ngo ndava yo pasi asi azvizivi kucinja. Jehovha acindori no cidisiso cokuti “varurami vanozoita veno vo nyika, vanozogaremo mbhera narini.” (Nduyo 37:29) Umambo hwa Mwari hunozozvikwanirisa. Kuitisa kudini?

16, 17. Danieli 2:44, inotibvunjenyi ngo pamusoro po Umambo hwa Mwari?

16 Vonanyi uporofita hunowanika pana Danieli 2:44. Iyona inoti: “Mu mukuvo wo majimambo aya, Mwari wo mugore anozozisa umambo hucikazopejwi, umambo hucikazotohwi ngo vandhu vamweni. Hunozokwiya-kwiya no kupeja humambo humweni hwese; asi ihwona hunozogara mbhera narini.” Izvi zvinorevenyi kwatiri ngo pamusoro po Umambo hwa Mwari?

17 Cokutanga, izvi zvinotibvunja kuti Umambo hwa Mwari waizogajwa “Mu mukuvo wo majimambo aya,” kana kuti majimambo amweni paanonga aciripo. Cocipiri, izvi zvinotibvunja kuti Umambo uhu unozogara mbhera narini. Cocitatu, tavona kuti kunozova no hondo pakati po Umambo hwa Mwari no majimambo o nyika ino. Umambo hwa Mwari unozowina. Pakupejisira kunozova basi no utongi umwe basi wo vandhu vese. Perapo vandhu vanozobusa utongi hwakanakisisa hwavacito vakambovonazve.

18. Ngorapi zina ro hondo yo kupejisira pakati po Umambo hwa Mwari no utongi hwo nyika ino?

18 Bhaibheri rino zvakawanda ngo pamusoro po hondo yo kupejisira pakati po Umambo hwa Mwari no utongi o nyika ino. Inga muezaniso, irona rinojijisa kuti mugumo paunonga wecikhwedera phedo, mujimu yakashata inozokusa manyepo kuti icengeje “majimambo o pasi pese.” No cidisiso cenyi? ‘Kuti imaunganije [majimambo] pa njiku huru yo hondo ya Mwari, mambo wo bzese.’ Majimambo o pasi pano anozounganijwa pamwepo pa “ndau inodanwa  Harmagedoni, mu ciheberi.” (Apokalipsi 16:14, 16) Ngo pamusoro po zvabhuiwari mu vhesi mbiri iji, kuhwisana ko kupejisira pakati po Umambo hwa Mwari no mautongi, kunodaninjwa kuti hondo yo Harmagedhoni.

19, 20.Ngenyi kuda ka Mwari nyamasi akuripi kuitika?

19 Cicinyi cinozopejwa ngo Umambo hwa Mwari wecishandisa Harmagedhoni? Amborangariranyizve basi ngo pamusoro po zvinoda Mwari ngo ndava yo pasi. Jehovha Mwari wakasunga cidisiso cokuti pasi pano pazajwe ngo vandhu vakarungama, vakakwana zve vanomushandira vari mu Paradhiso. Waro ngenyi nyamasi azviripi kuitika? Cokutanga, tiri vashaishi, zve tinohwaja, tofa. Kaveta takajija mu Cipauko 5, kuti Jesu wakatifira kuti tiraramezve mbhera na rini. Kangaije mungaceukija masoko akatahwa mu vhangeri ra Johani rinoti: “Mwari wakadisa nyika yo pasi, kokuti wakapa Mwana wake umwe ega, kuti vese vanomutenda vatame kufa, kaveta vave no uhomi hucingaperi.”Johani 3:16.

20 Ndava imweni ngo yokuti vandhu vazinji vanoita zviro zvakashata. Vanonyepa, vanocengeja, no mufambiro wakashata. Ivona avadi kuita zvinoda Mwari. Vandhu vanoita zviro zvakashata vanozoparajwa pa hondo ya Mwari Harmagedhoni. (Verenganyi Nduyo 37:10.) Thangwe rimweni rinoitisa kuti kuda ka Mwari kutame kuithwa pasi pano ngo ro kuti utongi uhu aukurumiji vandhu kuti vazviite. Utongi huzinji hunova hwakarembejeka, wakashata kana hwo uvori. Bhaibheri rinonanga pambhene kuti: “Vandhu vanotonga panyezuru po vamweni, kuti vavaxuphe.”Mucumaeri 8:9.

21. Umambo hwa Mwari hunozoitisa kudini kuti kuda ka Mwari kuitike pasi pano?

21 Pasure po Harmagedhoni vandhu vese vanozova pasi po utongi humwe basi, Umambo hwa Mwari. Umambo uhu unozoita kuda ka Mwari zve unozoviisa makomborero anoshamaisa. Inga muezaniso, unozobvisa Sathana no madhimoni ake. (Apokalipsi 20:1-3) Simba ro muripo wa Jesu rinozoshandiswa zvo kuti vandhu vakagondeka avacazombohwajizve no kufa. Asi mukutonga ko Umambo, vandhu  vanozorarama mbhera na rini. (Verenganyi Apokalipsi 22:1-3.) Pasi panozova paradhiso. Umambo uhu hunozoita kuda ka Mwari pasi pano zve hunozocenesa zina ra Mwari. Izvi zvinorevenyi? Zvinoreva kuti pakupejisira, pasi po Umambo hwa Mwari, mundhu ari wese anonga ecirarama anozokuja zina ra Jehovha.

UMAMBO HWA MWARI HUNOZOZVIITA RINI?

22. Ngenyi tinoziva kuti Umambo hwaMwari auzivi kuviya panguva yaainga ari pasi pano Jesu kana kuti paakandopera kumuswa kamare?

22 Jesu paakabvunja vateveri vake kuti vakumbire kuti, “Umambo hwenyu ngahuze,” zvainga zviri pambhene kuti Umambo uhu hwainga hucito hwa viya pa nguva yondhoi. Waro hwakazovia Jesu paakakhwira kudenga here? Haiwa! Ngo kuti, Pedhuru na Pauro vakananga kuti Jesu naapera kumuswa, uporofita uri pana Nduyo 110:1 wakakwanirisika muna Jesu wokuti: “Izwi ra [Jehovha] Mwari kuna tenji wangu: ‘Garai pa mukono wangu wo muho, mbhera ndidire vakorore vako inga citambarariro co soka jako.’” (Maitiro o Vapostori 2:32-35; Vaheberi 10:12, 13) Painga panocinguva caakambovetera.

Pasi po kutonga ko Umambo, kuda ka Mwari kunozoithwa pasi pano inga zvakunoithwa kudenga

23. (a) Umambo hwa Mwari hwakatanga kutonga rini? (b) Zvicinyi zvaticabhuya mu cipaiko cinotevera?

23 Ko mukuvo wakadini? Kubvira muzana ro ci19 no ci20 vajiji vo Bhaibheri vo mwoyo wese nga padoko-padoko vakaziva kuti mukuvo wo kuvetera uwu waizopera mu gore ro 1914. No kuda ko gore iri, vonanyi musoro wo Masoko o Kuengejera, unoti:  1914—Gore ro Revo Huru mu Uporofita hwo Bhaibheri.” Zviitiko zvo nyika zvakavoneka mu gore ro 1914 zvakathembesa kuti zwisiso yo vajiji vo Bhaibheri vo mwoyo wese yainga iri iyona kamare. Kukwanirisika ko uporofita hwo mu Bhaibheri kunokhombija kuti Kristu wakava Mambo mu gore ro 1914, zve Umambo hwa Mwari wo kudenga hwakatanga kutonga. Ngo kudaro, tiri kurarama mu nguva “doko” yasara ya Sathana. (Apokalipsi 12:12; Nduyo 110:2) Tingatovereketa no gonda kuti mbaimbai Umambo hwa Mwari hunoita kuti kuda ka Mwari kuithwe pasi pano. Munovona masoko aya ari anodakajisa here? Cipauko cinotevera cinozomubesera kuvona kuti Bhaibheri rinojijisadi kamare zviro zvondhozvo.