Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MASOKO O KUENGEJERA

Kuziva ‘Bhabhironi Guru’

Kuziva ‘Bhabhironi Guru’

BHUKU ra Apokalipsi rino masoko o kuti anodikana kusanangura kuti anase kuzika ushoni. (Apokalipsi 1:1) Inga muezaniso, irona rinobhuya ngo mwanakaji umweni ano zina rokuti ‘Bhabhironi Guru’ rakatahwa pa huma pake. Mwanakaji wondhowo anonangwa kuti wakagara pa “mabvumbo no vandhu.” (Apokalipsi 17:1, 5, 15) Zvecivoneka kuti mwanakaji kamare aacaizoitepi izvi, Bhabhironi Guru i muezaniso. Ngo kudaro, hure iyi yo kuezanisira inoimirirenyi?

 Pana Apokalipsi 17:18, mwanakaji umwewo wo kuezanisira anosananguhwa kuva “guta guru riri kutonga panyezuru po majimambo o pasi pano.” Gama rokuti “guta” rinokhombija cikwata cakarongeka co vandhu. Zvecivoneka kuti “guta guru” raitonga “majimambo o pasi,” mwanakaji anodanijwa Bhabhironi Guru i sangano rinobatanija nyika zinji. Irona rinofanera kudanijwa utongi hwo mu nyika. Utongi hwo mushovonyi? Wo Ciara. Vonanyi mativi amweni anozwirana no bhuku ra Apokalipsi anotibeseresa kudini kuguma pa mbhejiso yondhoyo.

Utongi ungava o nyika, o zvo kutengeserana, kana wo ciara. Mwanakaji anodanijwa Bhabhironi guru, asipi wo zvo matongehwe o nyika ngo kuti Soko ra Mwari rinonanga kuti “majimambo o nyika” kana kuti mativi o zvomatongehwe o nyika, “akahura” naiyena. Kuhura kwake kunonangira kubatana kwake no vatongi vo pasi pano zve kunovonesa kuti ngenyi anodaniwa kuti “hure huru.”Apokalipsi 17:1, 2; Jakobo 4:4.

Bhabhironi Guru aringavi Utongi wo zvokutengeserena ngo kuti “vatengesi” vo pasi pano, avo vanoimirira mativi o zvo kutengeserana, vacazomucema pa nguva yokuparajwa kwake. Hina, majimambo pomwe no vatengesi vanosananguhwa inga vari kusota Bhabhironi Guru ngo “ndhambo.” (Apokalipsi 18:3, 9, 10, 15-17) Ngo kudaro, zvinosisira kuguma pa mbhejiso yokuti Bhabhironi Guru, asipi utongi hwo zvo matongehwe o nyika kana o zvokutengeserana asi utongi wo ciara.

Kuzivika ko Bhabhironi Guru, kunodavihwazve ngo magama o kuti iyena ari kupausa majinja ese ecishandisa “masaramuso” ake. (Apokalipsi 18:23) Zvecivoneka kuti zvomujimu yakashata zvinobatanija manamatiro zve no kufemehwa ngo madhimoni, azvishamaisi kuti Bhaibheri ridanije Bhabhironi Guru kuva “muzi” wo madhimoni. (Apokalipsi 18:2; Deutornòmio 18:10-12) Utongi uhwu unosananguhwavo kuva wakavanga mukuhwisa Ciara cokadi-kadi, hweciteverera “vaporofeti” no “vacena mwoyo.” (Apokalipsi 18:24) Zvokadi, Bhabhironi Guru rino cizondo cikuru kamare kuno Ciara co kadi-kadi zvokuti irona no ushungu rinociteverera pikija kuuraya “vafakazi va Jesu.” (Apokalipsi 17:6) Ngokudaro, zvakajeka kuti mwanakaji uwu anodaniwari Bhabhironi Guru anoimirira matongero o Ciara cokunyepa, cinobatanija zviara zvese zvo kunyepa zvinohwisa Jehovha Mwari.