Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 16

Vangiriranyi mu Kunamata Kokadi-kadi

Vangiriranyi mu Kunamata Kokadi-kadi
  • Bhaibheri rinojijisenyi ngo ndava yo kushandisa zvithombe?

  • MaKristu anovona kudini ngo njiku jokureremejwa?

  • Mungasanangurisa kudini vamweni zvamunotenda mucikavakhugunyi?

1, 2. Ngo wapi mubvunjo unodikana kuithwa mapera kusia ciara co kunyepa, ngenyi munozvivona zvakasisira maningi?

NGATIMBOTI imwimwi mazwa masoko okuti mutundhu wenyu wese uno ndhendha. Umwe mundhu wava ecirasira mutombo wakashata ngo cifise-fise, zvokhombija ngozi ku upenyu. Maizoitenyi? Pacina kukakanija, maizothutha kudari maizvikwanisa. Asi pakupera kuita izvi, imwimwi maizomusa mubvunjo uwu: ‘Ndawanavo ndhendheyo here?’

2 Muezaniso uwu wakaezana no mugariro wo zviara zvokunyepa. Bhaibheri rinojijisa kuti kunamata kwakadaro kwakasvipiswa ngo jijiso icina kucena. (2 VaKorinto 6:17) Ngo ndava yabzo zvinosisira kubuda mu “Babilónia Guru” mutongi wo pasi pese wo ciara co manyepo. (Apokalipsi 18:2, 4) Makaita izvi here? Kana zvakadaro, imwimwi munofanea kusimbhwa. Asi azvikwani basi kuparajana kana kubuda mu ciara co kunyepa. Kundopera kuita izvi, munofanea kujibvunjisa kuti, ‘Ndicinozvitatijo zvimweni zvo ciara co kunyepa here?’ Vonanyi muezaniso.

 KUNAMATA MUFANANIJO NO MAJITETEGURU

3. (a) Bhaibheri rinoti kudini ngo kushandisa mufananijo, zve ngenyi vamweni vanovona ciri cineso kutendera mavonero a Mwari? (b) Zvicinyi zvamunodikana kuita ku zviro zviri zvese zvakabatana no kunamata ko kunyepa?

3 Kuno vandhu vamweni vano makore akawanda vecishadisa mufananijo no zvidandiro zvidoko mu nyumba javo. Munazvovo here? Kana zvakadaro, kangaije mugazvivona zvicikasisiri kana kushata kuita mukumbiro kuna Mwari pacina besero ro zviro zvinovoneka. Nguva jimweni mungatozvivona zvecinesa kuti musiyane no zvimweni zvakona. Asi Mwari ndiyena basi anonanga manamatiro aanofanea kuithwa, zve Bhaibheri rinojijisa kuti aadi kuti tishandise mufananijo. (Verenganyi Exodo 20:4, 5; Nduyo 115:4-8; Isaia 42:8; 1 Johani 5:21) Ngo kudaro imwimwi mungakwanisa kubesera kunamata ko kadi-kadi ngo kuphwanya zvithombe no zviro zvese zvamunazvo zvinobatanija kunamata ko kunyepa. Zvokadi kamare, zvivonenyi inga mavonero aanozviita Jehovha zviro izvi—inga “cinyangajiso.”Deuteronòmio 27:15.

4. (a) Tinozvizivisa kudini kuti kunamatira majiteteguru azvibeseri ciro? (b) Ngenyi Jehovha wakarambija vandhu vake kuita zviri zvese zvakabatana no zvomujimu?

 4 Kunamata majiteteguru, kwakazara maningi mu zviara zvo kunyepa. Vacito vakajija cokwadi co mu Bhaibheri, vamweni vaidavira kuti vakafa vano zvavanoziva. Vanogara kucikavoneki zve vanobesera kana kutambuja vanopona pasi pano. Kangaije maivangisira maningi kuti mudakajise majiteteguru enyu akafa.Asimakajija mu Cipauko 6 co bhuku rino, vakafaapana kwavari nokuti apana cavanoziva. Ngo kudaro kuzama kubhuya navo azvibeseri ciro. Masoko ari ese anoita inga ari kubva ku vakafa, zvokadi kamare, anobva ku madhimoni. Hino Jehovha wakarambija vaIziraeri kuzama kubhuya no vakafa kana kuita ciro ciri cese cakabatana no zvomujimu.—Verenganyi Deuteronòmio 18:10-12.

5. Zvicinyi zvamungaita kudari maishandisa mufananijo kana kunamata majiteteguru enyu?

5 Zvicinyi zvamungaita kudari maishandisa mufananijo kana kunamata majiteteguru enyu? Verenganyi no kurangarijisisa tsamba yo mu Bhaibheri inotatija mavonero a Mwari ngo ndava yo zviro izvi. Itanyi mukumbiro kuna Jehovha njiku ngo njiku kuti abesere cido cenyu cokunamata kokadi-kadi, zve mukumbirenyi kuti amubesere kurangarira inga marangaririre aanoita.Isaia 55:9.

KHISIMUSO—AICAIRANGARIHWEPI NGO MAKRISTU O KUTANGA

6, 7. (a) Pa khisimuso, vandhu vanonanga kuti vari kuceukija cinyi, zve vateveri va Jesu vo zana ro kutanga ro makore vairiceukijavo here? (b) Kuceukijihwa ko njiku okubahwa, kwainga kwakabatana no cinyi munguva yovajiji va Jesu vo pa kutanga?

6 Manamatiro o vandhu vamweni, angava akasvipiswa ngo ciara co kunyepa ngo pamusoro po njiku jinoreremejwa. Inga Muezaniso, vonanyi Khisimuso. Khisimuso inozwi, kurangarihwa ko kubahwa ka Jesu Kristu, zve zviara zvinokwedera kuita zvese zvinonanga kuti, ngo zvo ciKristu kurangarira njiku iyi. Pikija zvakadaro, apana cikhombijo cinopa ucapupu hwo kuti  vajiji va Jesu vo muzana ro makore ro kutanga vakacerekeja njiku iyi. Bhuku rinozwi Sacred Origins of Profound Things (Cine rinoreremejwa ro zviro zvakajika) rakananga kuti: “Mu mazana maviri o makore pasure po kubahwa kwa Kristu, apana aiziva kamare njiku yakabahwa Kristu, zve vainga vandhu vashoma basi vaida kuziva njiku iyi.”

7 Kunyage kudari vajiji va Jesu novainga veciziva njiku yo kubahwa kwake, ivona avacaidepi kuzoiceukija. Ngenyi? Ngo kuti, inga zvinonanga The World Book Encyclopedia, maKristu o pakutanga “aivona kuceukijwa ko kubahwa ko mundhu ari wese, inga zvirovejeso zvo cihedheni.” Kucerekejwa ko njiku yo kubahwa kunonangwa mu Bhaibheri nga kwiya basi ko vatongi vaviri vakanga vacinganamati Jehovha. (Genesi 40:20; Marco 6:21) Kuceukijwa ko njiku yo kubahwa kwaiitihwavo kureremeja zvimwari zvo cihedheni. Inga muezaniso, mu njiku 24 yo mweji wa Mauwe, vaRoma vaiceukijira njiku yo kubahwa ka mwarikaji Dhiana. Pa njiku yaitevera, vaiceukija njiku yo kubahwa ka mwari wavo wo zuva, Aporo. Ngokudaro, kuceukija njiku yo kubahwa, kwainga kwakabatana no cihedheni, kuciripi no ciKristu.

8. Sananguranyi kubatana kuripo pakati po kuceukijira njiku yo kubahwa no kutenda maninji?

8 Pano ndava imweni yakaitisa kuti maKristu o zana ro kutanga ro makore, atame kuceukijira njiku yo kubahwa ka Jesu. Kangaije vajiji vake vaiziva kuti kuceukijira njiku okubahwa kwainga kwakabatana no kutenda maninji. Ngo kudaro, vaGiriki vazinji no vaRoma vo kare, vaitenda kuti mujimu waivonerera kubahwa ko mundhu umwe nga umwe zve waivajivirira ku upenyu hwavo hwese. Bhuku rinozwi The Lore of Birthdays (Mutango Mutango jo Kucerekeja njiku yo kubahwa) rinonanga kuti: “Mujimu uwu, wainga no ushamwari hwo masaramuso na mwari wakabahwa mu njiku yondhoyo no yo kubahwa ko mundhu umwe nga umwe.” Zvakajeka kuti Jehovha aacaizodakarirepi kuceukijira kuri kwese kwaizobatanija Jesu no kutenda maninji. (Isaia 65:11, 12) Waro zvakaitisa kudini kuti Khisimuso riceukijihwe ngo vandhu vazinji?

 KWAKABVA KHISIMUSO

9. Zvakaitisa kudini kuti njiku 25 yo mweji wa Mbuji ive inga njiku yo kuceukija kubahwa ka Jesu?

9 Vandhu vakatanga kuceukijira kubahwa ka Jesu pa njiku 25 yo mweji wa Mbuji, pakupera ko mazana o makore pasure po kurarama kwake pasi pano. Asi iyi aicaingepi njiku yo kubahwa ka Jesu, nokuti zviri pambhene kuti wakabahwa mu mweji wa Gumi Guru. * Waro Ngenyi vakasana njiku 25 yo mweji wa Mbuji? Vamweni vakajiita maKristu mukufamba ko nguva, “vaida kuti njiku iyi iwirirane no mutambo jo njiku huru yo cihedheni co vaRoma, wokuceukijira njiku yo ‘kubahwa ko zuva ricinganyiswi.’” (The New Encyclopædia Britannica) Mu nguva yo mbhepo, zuva raibuda ricikapisi maningi, vahedheni vainasirira mutambo wo kuti zuva iri no kubveneka kwaro kuviye kubva ku hwendo hwo ndhambo. Vairangarija kuti njiku 25 yo mweji wa Mbuji yainga njiku yo kutanga kuviya ko zuva. Mu kuvangisira kucinja vahedheni, vatungamiriri vo zviara vakaeja kusana njiku huru iyi no kuiita inga yo “ciKristu.” *

10. Ngenyi mu nguva yo kare vandhu vamweni avacaiceukijepi Khisimuso?

10 Zvakazivika kare kuti Khisimuso yakacijikira ku cihedheni. Zvecivoneka kuti khisimuso aizivi kucijikira mu matahwa, iyona yakarambijwa mu Ingaratera no mu vapambi vamweni vo ku Amerika muzana ro ci17 ro makore. Wiyani waigara kumuzi otama kuenda kubasa pa njiku yo Khisimuso waidikana kuripiswa. Ngo kukasika zvirovejeso zvo kare zvainga  zvaviyazve, zve zvakaengejehwa zvipsa. Khisimuso yakavazve zororo guru, zve izvi zvakaitika mu nyika jakawada. Ngo ndava yokubatana ko Khisimuso no ciara co manyepo, vaya vanoda kudakajisa Mwari avaiceukiji kana kuceukija zuva ro mazororo anobva mu kunamata ko cihedheni. *

KWAKATANGIRA MAZORORO KUNOMBONYANYA KUSISIRA HERE?

11. Ngenyi vandhu vamweni vanoceukija njiku jo kureremejwa, asi ngo capi catinodikana kukaya-kaya ndicona?

11 Vamweni vanotendera kuti mazororo akadari o Khisimuso akabva kucihedheni asi vanovona kuti azvina kushata kuaceukija. Pamusoro po zvese, vandhu vazinji avarangariri ngo zvo kunamata ko kunyepa pavanonga veciceukija njiku jinoreremejwa. Nguva iyi inopekejavo mukana ku mbhuri kuti ive yakabatisisana pamwepo. Aya ndiwona mazwiro enyuvo here? Kana zvakadaro, kangaije i rudo ku mbhuri, kuciripi ku Ciara co kunyepa, hunomuitisa kuti muvone zvecinesa kubesera kunamata kokadi-kadi. Ivanyi no cokwadi co kuti Jehovha, ndiyena wakatanga no mbhuri, anoda kuti muve no ushamwari hwakanaka no vo paukama. (VaEfeso 3:14, 15) Asi imwimwi mungakwanisa kuvangisa ushamwari uhu mu njira inodakarira Mwari. Ngo pamusoro po shwiro yatinodikana ku kaya-kaya ndiyona, mupostori Pauro wakatara kuti: “Psanganyi kuziva ibzo bzinonakira Tenji.”VaEfeso 5:10.

Maizoha here suwithi rabva munobvirira kumwa yakasvipa?

12. Ezanisiranyi kuti ngenyi itisu tinodikana kuramba cirovejeso zve no kuceukijira zvakabva kwakashata.

12 Kangaije munovona kuti kwakabva njiku jinoreremejwa kunozwirana padoko no maceukijihwe ajinoithwa nyamasi uno. Kwaakabva kunombonyanya kusisira here? Hina! Kuezanisira: Ngatiti mavona suwithi iri munobvirira kumwa inosvina. Maizoboja suwithi iri moriha here? Zvokadi amucaizohepi! Ngokuti yakasvipa. Kufanana no suwithi rondhoro, njiku jo kureremejwa jakaita inga jakanaka, asi jakatohwa mu ndau yakasvipa.  Kuitira kubesera kunamata ko cokwadi, tinofanera kuva no mavonero akaita muphorofeti Isaia, iyena wakabvunja vanamati vokadi-kadi: “Mucadopsasa bziro bzakangora.”Isaia 52:11.

KUNGWARIRA MU KUTAJA VAMWENI

13. Zvineso zvapi zvingamuka ngo kutama kuva kwenyu pa njiku jinoreremejwa?

13 Kangaije pangamuka zvineso ngo kutama kwenyu kuva pa mabiko o njiku jo kureremeja. Inga muezaniso, mudoni wo kubasa kangaije angakahamara kuti ngenyi mucikaiti zvimweni zvinoithwa pa basa penyu zvakadari inga zvo njiku jinoreremejwa. Kudari mukapuwa cipo co Khisimuso keni? Zvaizova zvakashata kuciashira here? Zvakadini kudari wamakarovorana naye acikanamati na imwimwi keni? Mungaitisa kudini kuti vana venyu vatame kuzwa inga vari kunyimwa ngo kutama kucerekeja njiku jinoreremejwa?

14, 15. Mungaitenyi kudari mundhu umweni akamucungamija kuti mabofeshita kana kuti mundhu umweni ecida kumupa cipo?

14 Zvinodikana kungwarira maningi kuti murangarire madavirire amungaita cineso cimwe nga cimwe. Kudari mukapuwa mucungamijo wo kuti mabofeshita, munodikana kubonga henyu basi-munjira yakapfava. Asi ngatimboti muri kuhwisana no mundhu wamasongana naye kana kuti wamunoshanda naye nguva jese. Kangaije apa mungakheta kuengejera masoko akawanda. Mu ziitiko zvese, ngwariranyi. Bhaibheri rinomungwaja kuti: “Izwi renyu ngariite rakanaka nguva jese, rakarungwa ngo munyu, kuti muzive kupingura ariwese inga bzaanofanera.” (VaKolosi 4:6) Ngwariranyi kuti mukhombije nderemejo kuno vamweni. Kunja ka izvi, nasanyi kusanangura zvamuri ndizvona.

15 Zvakadini kana mundhu umweni akada kumupekeja cipo? Zvinofira maningi ngo maitihwe akona. Mupi angananga kuti: “Inini ndinoziva kuti iwewe aucerekeji njiku jinoreremejwa. Pikija inini ndecida kukupa izvi.” Kangaije mungasunga kuti kuashira cipo ici mu maitiro akadaro, azvizivi kuezana no kubatana pa njiku jinoreremejwa. Ndizvona, kudari mupi acikanasi kuziva zvamunotenda, mungamubvuja kuti imwimwi amuceukiji  njiku jinoreremejwa. Izvi zvaizomubesera kusanangura kuti ngenyi imwimwi munoashira cipo, asi amupekeji cipo pa nguva yakadaro. Ngo divi rimweni, zvaizova zvo ungwaru kutama kutendera cipo kana mukapekejwa no hwiru hwo kutatija kuti imwimwi amubatisisi zvamunotenda kana kuti maizophwanya zvamunotenda ngo ndava yo zviro zvokuyama.

TINGANANGENYI NGO ZVIHWA ZVO PA MBHURI

16. Mungaitisa kudini kuti mubhuye makangwarira pamunonga mecihwisana shwiro jo njiku inoreremejwa?

16 Tingati kudini, kudari zvihwa zvo mbhuri yenyu zvicingadaviri zvamunotenda? Ngwariranyizve. Azvidikani hazvo kurambija cirovejeso ciri cese haco kana kucerekejwa kwakasanwa ngo vo paukama hwenyu kuti vakuite. Kunja ka izvi, reremejai mavonero avo, inga zvaunoda kuti vareremeje maonero enyu. (Verenganyi Mateu 7:12.) Tizanyi ciito ciri cese cingatatija kuti munobudirira mu njiku jinoreremejwa. Rambanyi muno mavonero arinane pa shwiro jicizivi kubatana kamare no kuceukijira. Zvokadi, nguva jese munofanea kuita zviro zvinomusiya muno hana yakanaka.Verenganyi 1 Timoti 1:18, 19.

17. Mungabeseresa kudini vana venyu kuti vatame kuzwa inga vari kubzinyirihwa ngo kuti vanovona vamweni veciceukija njiku jinoreremejwa?

17 Zvicinyi zvamugaita kuti vana venyu vatame kuzwa kuti vari kuruza ngo kutama kuceukija njiku jo kureremejwa, zvicikabvi mu matahwa? Kazinji zvinofira maningi ku zvamunoita mu mukuvo umweni wo gore. Vabari vamweni vanogaja nguva kuitira kupekeja cipo vana vawo. Cimwe co cipo cakanakisisa caungapa vana vako i nguva yako no kuvapurutana no rudo.

IVANYI MU CIARA COKADI-KADI

Kunamata mu njira yo cokwadi kunoviisa mudakaro wokadi-kadi

18. Kwenda kumusongano jo ciKristu kungamubeseresa kudini kuti mubesere kunamata kokadi-kadi?

18 Kuti mudakajise Mwari, munodikana kuramba kunamata ko kunyepa zve mobesera kunamata kokadi-kadi. Izvo zvinobatanijenyi? Bhaibheri rinoti: “Ngatirindisane umwe no umweni, pa basa ro kudisana no kuita bziro bzakanaka. Ticaxwa kuenda ku musongano wedu, inga bzo vanoroveja kuita vamweni. Kaveta imwimwi vangisananyi mwoyo ngocenyu, meciziva  kuti njiku yo kuvia kwa Tenji yaaphedo.” (Vaheberi 10:24, 25) Musongano jo cikristu i nguva yo kudakara yo kuti munamate Mwari mu njira yaanotendera. (Nduyo 22:23; 122:1) Pa musongano jakadaro, ‘tinovangisana’ pakati po maKristu akagondeka’.VaRoma 1:12.

19. Ngenyi zvecisisira kubvunja vamweni zvamakajija mu Bhaibheri?

19 Njira jimweni jamungabesera ndijona kunamata kokadi-kadi ngo yo kubvunja vamweni zviya zvamakajija mu Bhaibheri no Zvapupu zva Jehovha. Zvokadi, vandhu vazinji vari “kugomera no kucema” ngo ndava yo zvakashata zviri kuitika mu nyika nyamasi uno. (Ezekieli 9:4) Kangaije munotoziva vandhu vari kuzwa kudaro. Makambovabvunja ngo pamusoro po vetero yenyu yo kumbeji yakacijikira mu Bhaibheri here? Pamunonga mecisonganirana pamwepo no maKristu okadi-kadi zve no kuvereketa ku vamweni zvokadi zvakadakaja zva makajija mu Bhaibheri, munozovona kuti cido ciri cese cakabatana no cirovejeso co kunamata ko manyepo cinonga cakasarira mu mwoyo menyu, cinozopera nga padoko-padoko. Ivanyi no cokwadi cokuti munozova makadakara zve munozoashira makomborero akawanda kudari mukavangirira kunamata ko cokwadi.Malakia 3:10.

^ ndim. 9 Vonanyi musoro wo Masoko o Kuengejera unoti: “Jesu Wakabahwa mu Mweji wa Mbuji Here?

^ ndim. 9 Mutambo unozwi Saturnaria wakabesera mukusana njiku 25 yo mweji wa Mbuji. Mutambo uwu waikuja mwari wokurima wo vaRoma. Izvi zvaiithwa mu njiku 17-24 jo mweji wa Mbuji. Kuita mabiko, kudakara, zve kupa cipo zvaiithwa pa mutambo wo Saturnaria.

^ ndim. 10 Kuitira kubhuisana, ngo pamusoro po mavonero o maKristu okadi-kadi ku mazororo o njiku jo kureremejwa, vonanyi musoro wo Masoko o Kuengejera unoti: “Tinodikana Kuceukija Mafiriado Here?