Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 19

Rambanyi Muri mu rudo hwa Mwari

Rambanyi Muri mu rudo hwa Mwari
  • Kuda Mwari zvinonangenyi?

  • Zvingaitikisa kudini kuti tirambe tiri mu rudo hwa Mwari?

  • Jehovha acapa kudini mupocero vayani vanoramba vari mu rudo hwake?

Munozoita kuti Jehovha ave citiziro cenyu mu nguva jino jo bepo here?

1, 2. Ngakwapi kwatingawana citiziro cakangwaririka nyamasi uno?

AMBORANGARIRANYI mecifamba mu gwanja pa njiku yo dutu kana bepo. Makore osvipa. Mbheni yo tanga kurazva no kupaja, wari nvura yo tanga kuna. Imwimwi mogogoma ngo kukasika, mecipsaka po kutizira mucina vetero. Movona civako co kutizira ngo pamuti po citaka, mukati maco makaoma, zve munodakajisa. Amucaizoreremejepi ndau iyi here?

2 Itusu tiri kurarama mu nguva jakaita inga jo madutu. Mugariro wo nyika ino, uri kubva mu kushata wecienda mukushatisisa. Asi kuno civako cakangwaririka, citiziro catingafindarira kuti titame kuhwajihwa kwenda no kwenda. Cimbori cinyi? Vonanyi zvinojijisa Bhaibheri basi: “Bvunjai Tenji kuti: ‘Ndimwi citiziro cangu, rusingo hwangu, Mwari wangu wondinogonda!’”Nduyo 91:2.

3. Tingaitisa kudini kuti Jehovha ave citiziro cedu?

3 Amborangariranyi basi! Jehovha, Musiki zve Mukuru-kuru wo mudenga no pasi, anokwanisa kuva muponesi wedu. Iyena anokwanisa  kutingwarira, ngo kuti ano simba maningi kupinda ari wese angada kutikhuvaza. Pikija kudari itusu tikakhuvazwa, Jehovha anokwanisa kubvisa zvese zvakashata zvingabudirira. Tingaitisa kudini kuti Jehovha ave citiziro cedu? Itusu tinodikana kuthemba. Kunja ka izvi Soko ra Mwari rinovangisa: “Vanganyi mu rudo hwa Mwari.” (Juda 21) Hina, itusu tinodikana kuramba tiri mu rudo wa Mwari, ngo kuendererera mberi takabatanijwa mu rudo wa Baba wedu vo mudenga. Perapo tingava no cokwadi cokuti iyena i citiziro cedu. Asi tingava kudini no kubatana kondhoko?

KUZIVA NO KUDAVIRA RUDO HWA MWARI

4, 5. Ngo api amwe o maitiro a Jehovha o kukhombijira rudo kwatiri?

4 Kuitira kuramba mu rudo hwa Mwari, itusu tinodikana kuzwisisa makhombijire anoita Jehovha rudo hwake kwatiri. Amborangariranyi jijiso nganani jo Bhaibheri jamakajija ngo besero ro bhuku rino. Inga Marure, Jehovha wakatipa pasi pano kuti pave muzi wedu unodakajisa. Iyena wakaizaja ngo zvokuha no kumwa yakawanda, upfumi hwo mu nyika, zvinyama zvino upenyu unoshamaisa zve ndau jino mavonekero akaseja. Inga Mune o Bhaibheri, Mwari wakatikhombijira zina rake zve no mugariro jake. Kunja ka izvi, Soko rake rinokhombija kuti iyena wakatuma Mwana wake anodiwa kuti aviye pasi pano, wotendera kuti Jesu atambujike no kufira itusu. (Johani 3:16) Cipo conaco cinonangenyi kwatiri? Icona cinotipa vetero yo kumbeji kunoshamaisa.

5 Vetero yedu yo kumbeji inofiravo pa ciro cimwenizve cakaitwa ndi Mwari. Jehovha wakagaja utongi wo kudenga, Umambo hwa Mesiya. Sambi-sambi iwona ucaita kuti matambujiko ese apere zve no kuita kuti pasi pano pave paradhiso. Rangariranyi basi! Itusu tingazokwanisa kurarama no runyararo zve no mudakaro, kwenda no kwenda. (Nduyo 37:29) Zvicito zvaitika, Mwari ari kutipekeja ndhungamiro yokuti tingakwanisa kurarama kudini mu njira jakanaka wari uno. Iyena wakatipekejavo cipo co mukumbiro, njira yakafununguka kuitira kubhuya naye. Aya ndi amwe o maitiro a Jehovha o kukhombijira rudo kuno mushovo wese wo vandhu zve kwamuri inga mundhu pacake.

6. Zvingaitikisa kudini kuti tihwirijire rudo wakavoneswa ndi Jehovha kwatiri?

 6 Mubvunjo unosisira maningi wamunodikana kuita nga uwu: Ndinodavirisa kudini rudo hwa Jehovha? Vazinji vanoti: “Ndinodikana kuda Jehovha mukuhwirijira.” Imwimwi munozwavo kudaro here? Jesu wakananga kuti mupango mukuru kupinda jese nga uwu: “Unozodisa [Jehovha] Mwari wako, ngo mwoyo wako wese, ngo mwiha wako wese, ngo hwiru hwako hwese.” (Mateu 22:37) Cokwadi, imwimwi muno thangwe guru kuti muve no rudo kuna Jehovha Mwari. Asi indava yo kuzwa kudaro zvinomuitisa kuti muve no rudo kuna Jehovha no mwoyo wenyu wese mwiha no murangariro.

7. Kuva no rudo kuna Mwari, kunobatanija basi mazwiro here? Sananguranyi.

7 Inga zvinosanangura Bhaibheri, kuva no rudo na Mwari zvinoreva zvizinji kupinda mazwiro. Zvokadi, pikija hazvo kuzwa kuti muno rudo na Jehovha zveciasisira, kuzwa uku kunoreva maambo o rudo hwokadi-kadi kwaari. Mbeu yo mucero inosisira maningi kuti pamere muti wo mucerowo. Kudari maida mucero, maizodakara here kudari mundhu akamuashija mbeu yo mucerowo? Zvokadi haiwa! Mukuezana, kuzwa kuti muno rudo kuna Jehovha kungava kutanga. Bhaibheri rinojijisa: “Kudisa Mwari ndikona kuteveja mupango jake mupango jake airemi.” (1 Johani 5:3) Rudo kuna Mwari, kuti uve wokadi kamare unodikana kubara mucero wakanaka. Kunodikanazve kutatijwa ngo zviito.Verenganyi Mateu 7:16-20.

8, 9. Zvingaitikisa kudini kuti titatije rudo no kubongeseya kuna Mwari?

8 Itusu tinotatija rudo kuna Mwari ngo kuzwira mupango jake zve no kushandisa zviambi zvake. Kuita zvonazvo azvinesi maningi. Kunja ko kuva jakarema, mutemo ja Jehovha jakaizwa kuitira kutibesera kurarama ushoni, takadakara, no upenyu unodakajisa. (Isaia 48:17, 18) Ngo kurarama mu kuzwirana  no ndhungamiro ja Jehovha, tinotatija Baba vedu vari mu denga kuti tiri kubongeseya ngo zvese zvavakatiitira. Zvinosuruvarisa kuziva kuti mu nyika muno nyamasi uno, vashoma vanotatija kubongeseya kwakadaro. Itusu atidi kuva vandhu vacikabongi, inga vamweni vakararama pa nguva yokuti Jesu wainga pasi pano. Jesu wakarapa 10 ro vandhu vainga no mapere, asi umwe basi wakahwirira kuzomubonga. (Luka 17:12-17) Zvokadi itusu taizoda kuva inga wiyani wakabonga, kuciripi vapfumbamwe vacizivi kubonga!

9 Ngo japi ndhugamiro ja Jehovha jatinodikana kuceukijira? Itusu takabhuya ngo pamusoro po ndhungamiro nganani mu bhuku rino, asi ngatimbojihwirijira padoko basi. Kuceukijira ndhugamiro ja Jehovha kunotibesera kuti tirambe tiri mu rudo hwa Mwari.

RAMBANYI MECIKHWEDERA PHEDO NA JEHOVHA

10. Sananguranyi kuti ngenyi zvecisisira kuramba meciva no zivo ya Jehovha Mwari.

10 Kujija ngo zva Jehovha, mudanyu wakanaka maningi kuti tikwederere phedo naye. Kujija uku, i basa ricikadikani kuima. Kudari muri kunja no usiku,  kwecitodhora maningi, mecikota muriro, maizoregera murazvu wo muriro wecipunguka mbhera koojima here? Haiwa. Imwimwi maizoramba meciengejera huni kuti muriro urambe wakanasa kubwaka no kujiya. Mukatama kudaro upenyu hwenyu kamare waizova pangozi! Zvecivoneka kuti huni jinoitisa kuti muriro urambe wecibwaka, ngo kudarovo “kumuziva Mwari” kunozovangisavo rudo hwedu na Jehovha.Mazwi Akangwara 2:1-5.

Mukufanana no muriro, kuda kwako Jehovha kunoda huni kuti kurambe kwecibwaka

11. Ngowapi wakava muviyo wo jijiso ya Jesu?

11 Jesu waida kuti vateveri vake varambe veciita kuti kuda kwavo Jehovha no Soko rake rinosisira rokadi-kadi, kurambe kwecivanga maningi. Pakupera ko kumuswa, Jesu wakajijisa vajiji vake vaviri ngo pamusoro po ciphorofita cimweni ciri mu Matahwa o vaHeberu cakakwanirisika maari. Ngowapi wakava muviyo wakona? Ivona vakazonanga kuti: “Mwoyo wedu aucaibwakepi, kani, mu gwanja, powaibuya nesu, ecitidurujira Matahwa.”Luka 24:32.

12, 13. (a) Zvicinyi zvinoitika no vandhu vazinji nyamasi uno ngo ndava yo kuda Mwari zve no Bhaibheri? (b) Zvingaitikisa kudini kuti tikwanise kujivirira rudo hwedu kuti utame kutondhora?

12 Pamakatanga kujija zvinojijiswa ngo Bhaibheri, makavona here kuti mwoyo wenyu wakatanga kubwaka ngo mudakaro, ngo kuvangirira, zve ngo rudo na Mwari? Tinozviziva kuti makazwa kudaro. Vakawanda vakazwavo kudaro. Wari cineso ngo cokuita kuti rudo hwakakura uhu hurambe huripo no kuita kuti hurambe hweciengejereka. Atidi kutevera zvinoizwa ngo vo nyika nyamasi uno. Jesu wakananga kuti: “Ngo kuwanda ko uxaixi hunozopera rudo hwo vazinji.” (Mateu 24:12) Mungaitisa kudini kuti kuda kwenyu Jehovha no kuda cokwadi ciri mu Bhaibheri kutame kutondhora?

13 Rambanyi meciwana zivo ya Jehovha zve no ya Jesu Kristu. (Johani 17:3) Kurangarijisisa, zvamunojija mu Soko ra Mwari, mecijibvunjisa kuti: ‘Izvi zvinondijijisenyi ngo zva Jehovha Mwari? Zvicinyi zvinoitisa kuti ndimude no mwoyo wangu wese, hwiru, zve no mwiha?’ (Verenganyi 1 Timoti 4:15.) Kurangarijisisa kwakadaro kucaita kuti kuda kwamunoita Jehovha kurambe kwecimunikira.

14. Mukumbiro jingatibeseresa kudini kuti rudo hwedu kuna Jehovha hurambe huripo?

 14 Njira imweni yokuti murambe muno rudo hunomonikira kuna Jehovha, ngo yo kugara weciita mukumbiro. (1 VaTesalònika 5:17) Mu Cipauko 17 co bhuku rino, takajija kuti mukumbiro cipo cikuru cinobva kuna Mwari. Inga ushamwari hwo vandhu unoramba mecibudirira pavanobhuisana vakasununguka nguva jese, ushamwari hwedu na Jehovha unoramba hwakanaka zve wakavanga patinogara teciita mukumbiro kwaari nguva jese. Zvinosisira maningi kuti mukumbiro jedu jitame kuva jo kutevejera—kuvereketa magama amwewo tecindophinda-phinda zvicina revo. Tinodikana kuvereketa na Jehovha inga zvinoita cimwana cinovereketa na baba waco. Itusu tinodikana kuvereketa pamwepo no kureremeja, asi takasununguka, no kutendeseka, nokuti zvecibva mu mwoyo. (Nduyo 62:9) Hina, jijo yo Bhaibheri yo mundhu ega zve no kuita mukumbiro zvecibva mu mwoyo mativi anosisira maningi o kunamata kwedu zve zvinotibesera kuti tirambe tiri mu rudo hwa Mwari.

WANANYI MUDAKARO MU KUNAMATA KWENYU

15, 16. Ngenyi kucumaera masoko o Umambo kungasisira kuvoniwa inga cidakajiso zve pfuma?

15 Kujija Bhaibheri zve no kuita mukumbiro mabasa o kunamata atingaita tiri tega. Kaveta wari, imanyi tivone divi ro kunamata kwedu kwatinoita pambhene: kuvereketa no vamweni ngo zvatinotenda. Imwimwi makambovereketa no vamweni ngo pamusoro po cokwadi ciri mu Bhaibheri here? Kana zvakadaro, makabusa zvidakajiso zvinoshamaisa. (Luka 1:74) Patinonga tecivereketa ku vamweni zvatakajija ngo pamusoro pa Jehovha Mwari, tinonga teciita basa rinosisira maningi rakagajwa maKristu ese okadi-kadi rokucumaera masoko akanaka o Umambo hwa Mwari.Verenganyi Mateu 24:14; 28:19, 20.

16 Mupostori Pauro waivona mushando wake inga unosisira maningi eciudanija kuti upfumi. (2 VaKorinto 4:7) Kubvunja vandhu ngo pamusoro pa Jehovha Mwari zve no cidisiso cake i basa rakanaka ratingakwanisa kuita. Irona i basa  ro Mujijisi mukuru, zve ringaviisa besero rakakura. Ngo kuita basa iri, imwimwi munonga mecibesa vandhu vakanaka mwoyo kuti vakhwederere phedo na Jehovha ari mudenga zve no kuwana citaka co kwenda ku upenyu ucina magumo! Pano basa rimweni ringadakajisa rinopinda iri here? Kunja kwa izvi, kupa ucapupu hwa Jehovha zve no Soko rake zvinoegejera  rutendo hweyu no kuvangisa rudo hweyu kwaari. Zve Jehovha anodisisa kuvangirira kweyu. (Vaheberi 6:10) Kuramba makabatikana mu basa iri kunomubesera kuti murambe muri mu rudo hwa Mwari.Verenganyi 1 VaKorinto 15:58.

17. Ngenyi mushando wo ciKristu ngo wo kukasikira nyamasi uno?

17 Zvinosisira kurangarira kuti kucumaera masoko o Umambo i basa ro kukasika. Bhaibheri rinoti: “Tokotesai Izwi; vangirirai pa ngari yokudikana no icikazivi kudikana.” (2 Timoti 4:2) Ngenyi kuita izvi ngo kukasika nyamasi uno? Soko ra Mwari rinoti: “Njiku huru ya Jehovha yaa phedo, yaa phedo, inovia ngo kukasika.” (Sofonia 1:14) Hina, mukuvo wa Jehovha waanozopeja mugariro uno wo zviro uri kuza ngo kukasika. Vandhu vanodikana kungwajwa! Vanodikana kuziva kuti wari I nguva yo kusana Jehovha inga Mukuru-kuru wavo. Mugumo ‘auzononoki.’Habakuki 2:3.

18. Ngenyi tinodikana kunamata Jehovha pa mberi po vazinji mu ushamwari no maKristu okadi-kadi?

18 Jehovha anoda kuti timunamate pambhene takabatana no maKristu okadi-kadi. Ngo ndava yazvo Soko rake rinoti: “Ngatirindisane umwe no umweni, pa basa ro kudisana no kuita bziro bzakanaka. Ticaxwa kuenda ku musongano wedu, inga bzo vanoroveja kuita vamweni. Kaveta imwimwi vangisananyi mwoyo ngocenyu, meciziva kuti njiku yo kuvia kwa Tenji yaaphedo.” (Vaheberi 10:24, 25) Patinoungana no vamweni vatinonamata navo mu musongano yo ciKristu, tinowana mukana unoshamaisa wo kusimba no kunamata Mwari wedu anodiwa. Itusu tinovakana no kuvangisana.

19. Tingaitisa kudini kuti tivangise kubatana kwedu ko rudo mu ungano yo ciKristu?

19 Inga zvatinosonganirana no vanamati vamweni va Jehovha, tinovangisa kubatana kwatinako kwo rudo no ushamwari mu ungano. Zvinosisira maningi kuvona divi rakanaka ro vamweni, inga Jehovha mapsangire aanoita divi redu rakanaka. Mucavetera kuti vamweni vamunonamata navo vave vakakwana. Mucakanganwa kuti vese vari pamudanyu jakasiana-siana jo kukura pakunamata no kutizve tese tinoposa. (Verenganyi VaKolosi 3:13.) Psakanyi kuvaka ushamwari na vayani vano rudo wakakura na Jehovha, zve imwimwi  munozovona kukura kwenyu mu kunamata. Hina, kunamata pamwepo no hama no hambzaji kunozomubesera kuti murambe muri mu rudo hwa Mwari. Jehovha anopekejesa kudini mupocero kuna vaya vanomunamata vakagondeka, zve ngo kudaro, voramba vari murudo hwake?

PSAKANYI UPENYU “HWOKADI-KADI”

20, 21. Cimbori cicinyi upenyu “hwokadi-kadi,” zve ngenyi i vetero yakanaka?

20 Jehovha anopa vashandiri vake vakagondeka mupocero wo upenyu, asi upenyu womushovonyi? Hina, imwimwi muri kuraramadi kamare wari uno here? Vakawanda vaizodavira kuti hina. Pamusoro po zvese, itusu tinofema, tinoha zve tinomwa. Zvokadi itusu tinodikana kurarama. Zve mu nguva jatinodakara, itusu kangaije tingati, “zvokwadi uku ndikona kamare kurarama!” Asi, Bhaibheri rinotatija kuti, munjira yakatikuti, apana na umwe ari kurarama kamare nyamasi uno.

Jehovha anoda kuti muve no upenyu “hwokadi-kadi.” Munozouwana here?

21 Soko ra Mwari rinokohomeja kuti tibatisise upenyu “hwokadi-kadi.” (1 Timoti 6:19) Masoko aya anotatija kuti upenyu “hwokadi-kadi” i zviro zvatinovetera kuwana kumbejiyo. Hina, patinonga tava vakakwana, tinozova tecirarama mu kuzwirana no revo ro gama iri, ngo kuti tinozorarama mukuzwirana no urongwa hwo kutanga hwa Mwari kwatiri. Patinozorarama mu paradhiso pasi pano, no uhomi hwakakwana, runyararo, zve rudakaro, ngo patinozobusa upenyu “hwokadi-kadi”—upenyu ucingaperi. (1 Timoti 6:12) Iyi asipi vetero yakanaka here?

22. Zvingaitikisa kudini kuti mubatisise upenyu hwokadi-kadi?

22 Zvingaitikisa kudini kuti itusu tibatisise upenyu “hwokadi-kadi” uhwu? Mu shwiro yakatojana na iyi, Pauro wakapangira maKristu kuti “ngavaite bzauxoni” zve “vakhupuke ngo mabasa akanaka.” (1 Timoti 6:18) Hino, Zvakajeka, kuti zvizinji zvinofira ku mashandisire atinoita cokwadi catakajija mu Bhaibheri. Asi Pauro waireva here kuti tinozowana upenyu “hwokadi-kadi” ngo kuita mabasa akanaka? Haiwa, kuti tiwane vetero inoshamaisa iyi, zvinofira kamare mu maashirire atinoita “unyaxa hwa Mwari” hucikatifanei. (VaRoma  5:15) Kaveta, Jehovha anodakarira kupa mupocero vayani vanoshadira iyena vakagondeka. Iyena anoda kumuvona mecirarama upenyu “hwokadi-kadi.” Vayani vanoramba vari mu rudo hwa Mwari ndivona vanovetera kuzorarama upenyu ucikaperi uhwu hwo mudakaro no runyararo.

23. Ngenyi zvakasisira kuramba tiri mu rudo hwa Mwari?

23 Zvaizova zvakanaka kuti umwe na umwe wedu ajibvunjise pacake kuti, ‘ndiri kunamata Mwari mu njira yaakagaja mu Bhaibheri here? Kudari itusu tikava no cokwadi, njiku ngo njiku kuti mupinguro wakona ngo wo kuti, tiri kunamata Mwari mu njira yaakagaja, waro tiri mugwanja rakanaka. Itusu tinothemba kuna Jehovha kuti ndiyena citiziro cedu. Iyena anoda kuramba ecingwarira vandhu vake vakagondeka mu njiku jokupejisira jo mugariro wo zviro zvo pasi pano. Jehovha anozotiponesa no kutinghwinisa mu mugariro mupsa wo zviro uri kuviyariuno rukujo hukuru. Kudakara kwakadini kwatinozova nako pa njiku iyi! Mudakaro wakadini watinozova nawo ngo kukheta gwanja rakanaka mu njiku jino jo kupejisira! Kudari mukakheta gwanja iri nyamasi uno, munozobusa upenyu “hwokadi-kadi,” inga maidakarihwa ndi Jehovha kuti huve, upenyu ucikaperi!