Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MASOKO O KUENGEJERA

1914—Gore ro Revo Huru mu Uporofita hwo Bhaibheri

1914—Gore ro Revo Huru mu Uporofita hwo Bhaibheri

PACINO makumi o makore aizotevera, vajiji vo Bhaibheri vakazivisa kuti kwaizova no zviitiko zvizinji mu gore ro 1914. Zvainga zvenyi, zve cicinyi cakavonesa kuti 1914 ndirona rainga ro zviitiko zvinosisira maningi?

Inga zvakatahwa pana Luka 21:24, Jesu wakati: “Jerusalema rinozocikwa ngo vonyikanja, [“nguva yevemadzinza,” BMAA] mbhera ngo kukwana mukuvo wo vonyikanjevo.” Jerusarema rainga riri dhorobha ro jinja ro vaJudha—cigaro co utongi co  mutevejwana wo majimambo o kunyumba ya Mambo Dhavhidhi. (Nduyo 48:1, 2) Asi majimambo aya, ainga akasiyana no vatungamiriri vamweni vo majinja. Iwona ainga pa cigaro co “dendemaro ra [Jehovha]” inga vaimiriri va Mwari pacake. (1 Kronike 29:23) Hino, Jerusarema rainga reciimirira kutonga ka Jehovha.

Waro ndirini, zve utongi hwa Mwari hunozotanga rini kuva ‘unocikwa ngo vonyikanja’? Izvi zvakaitika mu gore ro 607 N.V.I.Y. Jerusarema parakanyiswa ngo vaBhabhironi. Apana waingazve pa “dendemaro ra [Jehovha],” zve mutevejwana wo umambo hwainga mubarihwana wa Dhavhidhi wainga wakakamiswa. (2 Majimambo 25:1-26) ‘Kucika’ uku kwaizogara kwakadaro here? Haiwa, uporofita hwa Ezekieri wakananga kudari ngo pamusoro pa Zedhekia, mambo wo kupejisira wo Jerusarema: “Mubvisirenyi cinemeso, bvisanyi junguja ro  umambo; . . . ibzi bzinozoitika akavia wiya wondakasana kuti atambuje gutero. Ndiena wondinozopa gutero.” (Ezekieli 21:26, 27) ‘Wakasanwa’ kuva no junguja ra Dhavhidhi ndi Jesu Kristu. (Luka 1:32, 33) Ngo kudaro ‘kucikwa’ kwaizopera Jesu paaizova Mambo.

Ciitiko cikuru ici cinozoitika rini? Jesu wakavonesa kuti vandhu vo majinja vaizotonga mukati mo nguva yakagajwa. Masoko ari pana cipauko 4 ca Danieli ano khiya yo kuziva marebere angaita nguva iyi. Anonanga hope jo ciporofita jakarothwa ndi Nebhukadhinezari Mambo wo ku Bhabhironi. Iyena wakavona zimuti ziguru rakatemwa rowa. Ciki rawo arizivi kupfikitirazve ngo kuti rainga rakasungwa ngo bhande ro simbi no ro utare. Kuno ngirozi yakananga kuti: ‘Mukuvo munomwe inozopinda panyezuru pake.’Danieli 4:7-13.

Nguva jimweni Bhaibheri rinoshandisa muti recinangira utongi. (Ezekieli 17:22-24; 31:2-5) Ngo kudaro, kuwiswa ko zimuti ro kufananijira iri, zvainangira mawisihwe aizoithwa kutonga ka Mwari, inga zvakaitika ku majimambo o Jerusarema. Kaveta, civoniso ici cakakhombija kuti ‘kucikwa ko Jerusarema’ kwaizova ko nguva shoma—‘mukuvo munomwe.’ Iyi yainga nguva yakarebesa kudini?

Apokalipsi 12:6, 14 yakavonesa kuti nguva ndhatu no bindikati, jinoezana no “ciuru cimwe no mazana maviri na makumatandhatu (1.260) o njiku.” Kaveta, ‘mukubomunomwe’ iyi, yaizopera pa kupera ko kupethwa kaviri ko civerengero ici co njiku, 1.260, kana kuti 2.520 o njiku. Asi vo majinja avazivi kuima ‘kucika’ kutonga ka Mwari mu zvinjiku 2.520 basi sure ko kuwa ko Jerusarema. Waro zviri pambhene kuti ciporofita ici, caizotora mukuvo wakareba maningi wo nguva. Kubva mu bhuku ra Bziverengo 14:34 na Ezekieli 4:6, jinobhuya ngo pamusoro po “njiku imwe ngo gore rimwe,” ‘mukubomunomwe’ iji jaizotora 2.520 o makore.

Makore 2.520, akatanga mu mweji wa Gumi Guru gore ro 607 N.V.I.Y., Jerusarema parakawiswa ngo vaBhabhironi zve pakatohwa cigaro co umambo ca Dhavhidhi. Nguva iyi, yakapera mu mweji wa Gumi Guru wo gore ro 1914. Panguva iyi, ndipona pakagumira “mukuvo [“wakagajwa,” NM] wo  vonyikanjevo” zve Jesu Kristu wogajwa inga Mambo wo kudenga wa Mwari. *Nduyo 2:1-6; Danieli 7:13, 14.

Inga zvakananga Jesu, “kuvia” kwake inga Mambo wo kudenga kunozovoneka ngo zviitiko zvikuru zvo nyika—hondo, njara, mudhuma ngo pasi no ndhendha. (Mateu 24:3-8; Luka 21:11) Zviitiko izvi, zvinopa ucapupu hwakakwana hwo kuti 1914, zvokadi kamare igore rakabahwa Umambo hwa Mwari hwo kudenga zve no kutanga ko “njiku jokupejisira,” jo mugariro uno wakashata wo zviro.2 Timoti 3:1-5.

^ ndim. 9 Kubvira mu mweji wa Gumi Guru wo gore ro 607 N.V.I.Y. mbhera mu mweji wa Gumi Guru wo gore ro 1 N.V.I.Y. pano makore anokwana 606. Zvecivoneka kuti akuna gore ra zero, kubvira mu mweji wa Gumi Guru wo gore ro 1 N.V.I.Y. mbhera mu mweji wa Gumi Guru wo gore ro 1914 N.V.Y., pano makore anokwana 1914. Kubvenganija makore 606 no 1914, anoenda kookwana makore 2.520. Kuti muwane masoko o kuwa ko Jerusarema mu gore ro 607 N.V.I.Y., vonanyi cijijo cinoti “Cronologia (mutevejwana wo makore)mu bhuku Estudo Perspicaz das Escrituras, rakabudiswa ngo Zvapupu zva Jehovha.