Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Karata Inobva ku Mukhumbi Unotonga

Karata Inobva ku Mukhumbi Unotonga

Hama jinodiwa:

Inga vanamati va Jehovha, tinodisisa Soko rake, Bhaibheri. Tina cokwadi cokuti rinovereketa ngo zviro zvokadi no zvakaitika kare, ngwanjo jaro jinogondeka zve rinokhombija rudo hukuru wa Jehovha kwatiri. (Nduyo 119:105; Luka 1:3; 1 Johani 4:19) Tinoda maningi kubesera vandhu vese kuti vazive cokwadi cinosisira cinobva mu Soko ra Mwari. Asi, tinodakara maningi ngo kubudisa bhuku iri, “Zvijijo Zvaungawana mu Bhaibheri.” Tinoda kumuverengera padoko ngo pamusoro paro.

Bhuku iri rakatahwa maningi-ningi kuitira vana vadoko. Asi, irona ringashandiswavo pa kubesera vakuru pa kujija zvizinji ngo pamusoro po Bhaibheri. Bhaibheri i bhuku ro mundhu ari wese, atina kukana-kana kuti tese tinobesereka ngo jijiso jinowanika mukatimo.

Bhuku iri rina ndhorovondho jinobva mu Bhaibheri jinobhuya ngo ndhorovondho jo vandhu kubvira po vakasikwa zvecienda mberi. Irona rinoverenga ndhorovondho jo mu Bhaibheri ngo manera akajeka zve ngo njira yakarongeka, kudari zvecikwanisika, ngo manera o zvakaitika.

Bhuku iri ariverengi ndhorovondho jo mu Bhaibheri basi. Mavhesi no mapikica, akanasirihwa kuitira kubesera vaverengi kuti vapone ndhorovondho jondhojo jo mu Bhaibheri no kuzwa mazwiro o vandhu vanonga vacivereketa.

Bhuku iri rinotibesera kuvona kuti Bhaibheri i bhuku rinobhuya ngo pamusoro po vandhu—vakazwira Jehovha no vacikazivi kuzwira. Rinotibeserazve kuvona kuti zvijijo zvapi zvatingabvisa kubva ngo zvavakaita. (VaRoma 15:4; 1 VaKorinto 10:6) Bhuku iri rakapauhwa ngo mativi marongomuna. Pa kutanga ko divi rimwe nga rimwe, panovereketa padoko ngo zviro zvatinozojija.

 Kudari muri mubari munodikana kuverenga cijijo ici no mwana wenyu zve bhuyanyi naye ngo pamusoro po pikica. Perapo, mungaverenga mwese vhesi jo mu Bhaibheri jakakhombijwa pakupera ko cijijo. Beseranyi mwana wenyu kuti avone kuzwirana ko zvaanonga waverenga mu Bhaibheri no zvo pa cijijo. Izvo zvinoshandavo pa kubesera mundhu mukuru kuti azwisise Bhaibheri.

Tinovetera kuti bhuku iri ricabesera vandhu vese—vana no vakuru—kujija Soko ra Mwari no kushandisa zvijijo zvaro mu upenyu hwavo. Inga muviyo, zvicaita kuti vanamate pamwepo no vandhu vake vaanoda.

Hama jenyu,

Mukhumbi Unotonga wo Zvapupu zva Jehovha