Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 53

Jehoyadha Wakava no Cicunge

Jehoyadha Wakava no Cicunge

Jezabheri wainga no mwana anodaninjwa Atariya, iyena waiitavo zvakashata inga mai wake. Atariya wainga wakarovohwa ndi mambo wo ku Judha. Mwamunake paakafa, mwana wake ndiyena wakava mambo. Mwana wake paakafa, Atariya wakazviita pacake mambo wo vaJudha. Iyena wakaeja kuparaja vana vese vainga no mukana wo kuva mambo, eciuraya mundhu wese waida kutora cigaro cake, pikija no vazukuru vake. Vandhu vese vaimuthya.

Mupiri mukuru Jehoyadha no mukaji wake, Jehoshebha, vaizviziva kuti zvaiitwa ndi Atariya zvainga zvakashata maningi. Ivona vakadira upenyu hwavo pa ngozi ngo kuviga umwe wo muzukuru wa Atariya, cimwaneco caidanwa Jehowashi. Vakamurera mu temberi.

Jehowashi painga no makore manomwe, Jehoshebha wakaunganija vanarume vakuru zve no vaRevhi wakavabvunja kuti: ‘Ngwariranyi musuvo jo temberi zve mucasiya ariwese aghwine.’ Perapo Jehoshebha wakagaja Jehowashi kuti ave mambo wo vaJudha zve wakadira junguja mumusoro mwake. Vandhu vo ku Judha vakatanga kukhuwa veciti: ‘Ngaararame mambo!’

Vahosi Atariya vakazwa bungano ricikhuwa, ngo kudaro, vakagogoma vecienda ku temberi. Paakavona mambo mupsa, iyena wakatanga kumima eciti: “Ndakacengejwa! Ndakacengenjwa!” Pondhopo vanarume vamweni vakatora Vahosi, vovabudisa kunja ko temberi zve vovauraraya. Vandhu vo Iziraeri vainga vakasujunuka pa zviro zvakashata zvaitwa ndi Atariya. Waro zvicinyi zvaizoitwa ndi Jehoyadha?

Jehoyadha wakaita kuti vaIziraeri vaite citenderano na Jehovha zve vakagondisa kuti vaizonamata Jehovha basi. Jehoyadha wakaphwanya-phwanya  temberi ya Bhaari pomwe no zvithombe. Wakagaja vapiri no vaRevi kuti vashande mu temberi kuitira kuti vandhu vanamatire mondhomo. Wakadira vangwariri pa musuvo kuti kutame kunghwina mundhu acikazivi kucena. Perapo Jehoyadha pomwe no vamweni vakatora Jehowashi kuti aende ku nyumba ya mambo. Vandhu vo Judha vakadakara maningi. Waro, ivona vaikwanisa kushandira Jehovha vacikatapaijwi ngo manamatiro a Bhaari pomwe no ushati wa Atariya. Munokwanisa kuvona kuti cicunge ca Jehoyadha cakabeseresa kudini vandhu?

“Mucathya vanouraya muviri vacingakwanisi kuuraya mwiha. Ithyanyi wiya anokwanisa kuendesa mu Gehena mwiha no muviri.”—Mateu 10:28