Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 55

Ngirozi ya Jehovha Inojivirira Ezekia

Ngirozi ya Jehovha Inojivirira Ezekia

Umambo hwo vaSiriya wainga wakanyisa 10 ro majinja wo vaIziraeri. Pa nguva yondhoyo Senakeribhe, mambo wo Asiriya waidazve kutora majinja maviri wo umambo o Judha. Wakatanga kutora madhorobha wo Judha, rimwe nga rimwe. Asi Jerusarema ndi dhorobha raida maningi kutora. Senakeribhe aacaivetera ciro cimwe cokuti Jehovha waijivirira Jerusarema.

Ezekia, mambo wo Judha, wakapa Senakeribhe mare yakawanda kuti atame kutora Jerusarema. Pikija kuti Senakeribhe wakatora mare yakona, wakatumira masoca ake ano simba kuti aende koohwisa Jerusarema. Vandhu vainga mu dhorobhemo, vakatanga kuthya ngokuti vaSiriya vaikhwedera. Ezekia wakavabvunja kuti: ‘Mucathya. VaSiriya vakavanga, asi Jehovha anozotivangisa kupinda ivona.’

Senakeribhe wakatumira Rabhishaki kuti aende kothyisijira vandhu ngo kumimira pa mupfimbiji. Rabhishaki wakaima kunja ko dhorobha wotanga kumimira eciti: ‘Jehovha aangamubeseri. Mucasia kuti Ezekia amuungise. Akuna Mwari angakwanisa kumujivirira kwatiri.’

Ezekia wakabvunjisa Jehovha kuti zvicinyi zvaidikana kuita. Jehovha wakapingura kuti: ‘Ucathyisijihwa ngo zvakanangwa ndi Rabhishaki. Senakeribhe aazotori Jerusarema.’ Perapo, Ezekia wakaashira tsamba jaibva kuna Senakeribhe. Tsamba ijo jainanga kuti: ‘Ramwai. Jehovha aazokuponesi.’ Ezekia wakakumbira eciti: ‘Ndapota, Jehovha, tiponesei kuti vese vazive kuti ndimwi basi Mwari wokadi-kadi.’ Jehovha wakamubvunja kuti: ‘Mambo wo Asiriya aanghwini ku Jerusarema. Ndinozojivirira doromba rangu.’

Senakeribhe wairangarira kuti ngo kukasika Jerusarema raizova rake. Asi usiku umweni, Jehovha wakatumira ngirozi yake, kuti iyende kwainga no tenda jo masoca o Asiriya. Perapo ngirozi yakauraya masoca anokwana kuita 185.000!  Mambo Senakeribhe wakaruza masoca ese ainga akavanga. Apana caidikanazve kuita kunja ko kuenda kanyi. Jehovha wakajivirira Ezekia no dhorobha rake ro ku Jerusarema, kudari inga zvainga wakagondesa. Kudari wainga uri kondhoyo ku Jerusarema, kureva kuti iwewe waizogondavo Jehovha here?

“Ngirozi ya Tenji Mwari inogara phedo pa vaya vanomuthya, inovaponesa.”—Nduyo 34:8