Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 47

Jehovha Wakavangisa Eria

Jehovha Wakavangisa Eria

Jezabheri wakazwa zvakaitika no vaporofita va Bhaari zve wakacamwa maningi. Wakatumira masoko kuna Eria eciti: ‘Mangwana, ucafavo inga zvowakaita no vaporofita va Bhaari.’ Eria wakatanga kuthya zve wotiza woenda mu bani ro zvipare. Wakaita mukumbiro eciti: ‘Jehovha andicazvikwanisi. Zviri nani ndife hangu.’ Ngo kuremba, Eria wakavata pasi po muti.

Ngirozi yakamumusa zve yovereketa naye ngo rudo yeciti: ‘Mukai uhe.’ Eria wakamuka wofunungura majiso wovona phedo po musoro wake pau yakabikwa yainga panyezuru po mapuwe yecipisa, no juvi ro kumwa. Iyena wakaha no kumwa zve wovatazve. Ngirozi yakamumusazve yoti: ‘Mukai, uhe, unofanera kuwana simba rokufamba ngokuti mumango wakanyanya kukukurira.’ Eria wakamuka wohazve. Perapo wakafamba mazuva anokwana 40 wo njiku no 40 wo usiku, mbhera pa dundhu Horebhi. Paakaguma wakakhwina mu bako kuti avate. Asi Jehovha wakavereketa naye. Eciti: ‘Eria, uri kuitenyi pano?’ Eria wakapingura eciti: ‘VaIziraeri avazivi kuita zvovakamupikira. Ivona vakaphwanya-phwanya dandiro renyu zve vakauraya maporofita enyu. Waro ivona vari kueja kudiurayavo.’

Jehovha wakati kwaari: ‘Budai zve garai pa dundhu.’ Ngokudaro Jehovha wakatatija simba rake. Pakutanga pakaita mbhepo rakavanga maningi, rakabvunguza ngo pa bako. Perapo pakava no kuzungunyika ko nyika perapo muriro wakazobhwaka. Mu kupejisira Eria wakazwa izwi rakareruka. Wakafukija hope yake, perapo wobuda mu bako. Jehovha wakabvunjisa kuti ngenyi wainga watiza. Eria wakati: ‘Ndini ndega ndasara.’ Asi Jehovha wakamubvunja kuti: ‘Auripi wega. Mu Iziraeri kuna vamweni vanokwana kuita 7.000 vaciri kudinamata. Endai unozogaja Erija kuti ave muporofita pa mbuto yako.’ Ngo kukasika, Eria wakaenda koita zvaakabvunjwa ndi Jehovha. Unorangarira kuti Jehovha anozokubeseravo here kudari ukaita zvaanokubvunja? Hina, anozokubesera. Ngativonenyi zvimweni zvakaitika pa mukuvo wondhowo wo nvura.

“Mucathimwa-thimwa ngo ndava iriyese. Kaveta, ngo njio yese, mutatijenyi Mwari bzomunotama, mecipota no kukumbira pamwepo no kubonga.”—VaFilipi 4:6