Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 49

Mambo Wokaji Wakashata Anopanicwa

Mambo Wokaji Wakashata Anopanicwa

Mambo Akabhi paanonga eciringira pa jhanera yo pa muzi pake ku Jezreeri, waikwanisa kuvona minda wo mwanarume waidaninjwa Nabhoti. Akabhi waida maningi mindewo zve wakaeja kuita kuti Nabhoti amutengesere minda wiya. Asi Nabhoti wakaramba kumutengesera ngo kuti Mutemo wa Jehovha wairambisa kutengesa minda wiya wo utaka. Akabhi wakareremeja Nabhoti ngo kuita kwake zvakanaka? Azivi. Akabhi wakacamwa maningi. Wakanyangajwa maningi zvokuti wakaramba kubuda munyumba maivata, zve wakaramba no kuha.

Mambo wo kaji, Jezabheri, wiya waita zvakashata wakati kuna mwamuna wake Akabhi: ‘Iwewe uri mambo wo Iziraeri. Iwewe unokwanisa kuwana cese caunoda. Inini ndicaita kuti uwane minda wiya.’ Wakatarira karata vanarume vakuru vomudhorobhemo, yainanga kuti vanyepe kuti Nabhoti wakatuka Mwari zve kuti vamufure ngo mapuwe. Vakuru vakaita zvovakabvunja kuti vaite ndi Jezabheri, zve Jezabheri wakati kuna Akabhi: ‘Nabhoti wafa. Minda wiya wa wako.’

Nabhoti aacaingepi mundhu wo kutanga acina ndava wakaurawa ndi Jezabheri. Iyena wakauraya vandhu vakawanda vaishandira Jehovha. Jezabheri wainamata zvithombi no kuita zviro zvimweni zvakashata. Jehovha wakavona zviro zvese zvakashata zvaiitwa ndi Jezabheri. Jehovha waizoitenyi na iyena?

Akabhi paakazofa, mwana wake Jerobhowamu ndiyena wakazova mambo. Jehovha wakatuma mwanarume waidaninjwa Jehu kuti apanice Jezabheri no mbhuri yake.

Jehu wakapakira ngoro yake yo hondo kuti aende Jezreeri, kwaaigara Jezebheri. Jerobhowamu wakapakiravo ngoro yake yo hondo kuti aende kosongana na Jehu zve wakavhunjisa kuti: ‘kuna unyararo?’ Jehu wakati: ‘Akuna runyararo ngokuti mai wako, Jezabheri, vari kuita zvakashata.’  Jerobhowamu wakasikisa ngoro yake yo hondo kuti atize. Jehu wakamufura ngo mu pasha zve Jerobhowamu wakafa.

Ngo kudaro Jehu wakaenda kumuzi kwa mambo wo kaji Jezabheri. Jezabheri paakazwa kuti Jehu ari kuviya, iyena wakazvinasirira-nasirira vhuji rake, wozvipenda penda zve wakaenda komuvetera naari pa jhanera yo nyezuru. Jehu paakaguma, Jezabheri wakamucungamija ngo njira icikazivi kunaka. Jehu wakamimira vashandiri vake vainga ku divi rake eciti: “Mukhandirenyi pasi!” Ngo kudaro vashandi vake vakamukhandira ngo pajhanera, wakawa pasi zve wofirepo.

Ngo kudaro Jehu wakauraya 70 wo vana vaAkabhi zve wakapeja no manamatiro a Bhaari mu nyikemo. Mavona kani kuti Jehovha anoziva zvese zvinonga zviciitika zve pa nguva kwayo, iyena anoparaja vese vanoita zvakashata?

‘Upfumi wakaunganijwa pokutungamira ngo kukasika, pokupejisira ahuzokomborehwi.’—Mazwi Akangwara 20:21