Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 40

Dhavhidhi na Goriati

Dhavhidhi na Goriati

Jehovha wakabvunja Samueri kudari: ‘Endai ku nyumba ya Jese. Umwe wo vana vake anozova mambo wo Iziraeri.’ Ngokudaro samueri wakaenda ku nyumba ka Jese. Paakavona mwana wake wodangwe, wakarangarira kudari: ‘Ndiena mujaha anodikana kuva mambo.’ Asi Jehovha wakabvunja Samueri kuti andiepi anozova mambo. Jehovha wakati: ‘Ndinosota zviya zvaari mundhu ngo mu mwoyo, haiwa basi mavonekero o kunja.’

Jese wakaviisazve vana vake vatandhatu kuna Samueri. Asi Samueri wakati: ‘Jehovha aazivi kusana na umwe wavo. Iwewe una vana vamwenizve?’ Jese wakati: ‘Ndinae umwe, wo mufana pa vese, anozwi Dhavhidhi. Iyena ari kungwarira mabvuta angu.’ Dhavhidhi paakahwirira, Jehovha wakabvunja Samueri kudari: ‘Uwu ndiena!’ Samueri wakazoja musoro wa Dhavhidhi, womugaja inga mambo wo Iziraeri.

No papera nguva yakati kuti, vaIziraeri vaihwisana no vaFiristi, avo vainga no musoca mukuru waidanwa Goriati waihwaro pa ndau yavo. Njiku jese, Goriati waishora vaIziraeri. Iyena wakamima eciti: ‘Tumanyi mundhu anozoda kuhwa neni! Kudari iyena wakawina, tinozova varanda venyu. Kudari inini ndikawina, munozova varanda vedu.’

Dhavhidhi wakaenda kwaiungana masoca o vaIziraeri koopa zvokuha hama jake. Iyena wakazwa zvainanga Goriati zve wakati: ‘Ndinoenda korhwa naye!’ Mambo Sauri wakati: ‘Asi iwewe uri cimujaha maningi.’ Dhavhidhi wakadavira kudari: ‘Jehovha acandibesera.’

 Sauri wakaeja kusia kuti Dhavidhi ashandise zvombo zvo hondo, asi Dhavhidhi wakati: ‘Andingahwisani no zvombo izvi.’ Dhavhidhi wakatora bvungamurara rake zve wakaenda ku murambo. Iyena wakasana mapuwe mashanu aitisetete womadira mu cikhwama. Perapo Dhavhidhi wakagogoma kwenda kuna Goriati. Gakanyara riya rakamima riciti: ‘Viai kuno, cimufanewe. Ndinozoita kuti uve zvokuha zvo shiri jo mugore no zvokuha zvo zvinyama zvo musora.’ Dhavhidhi acaithyepi. Iyena wakamimazve eciti: ‘Iwewe unovia kwandiri no banga no mukhondo, asi inini ndinoza kwaauri ngo zina ra Jehovha. Iwewe auripi kuhwisana nesu, uri kuhwisana na Mwari. Vandhu vese vacavona kuti Jehovha ano simba guru kupinda banga no mukhondo. Iyena anozotipekeja munyara jedu.’

Dhavhidhi wakabvisa buwe mu cikhwama cake woridira pa bvungamurara zve worikhandira ngo simba rake rese. Ngo besero ra Jehovha, Buwe rakaenda kofura pa musoro wa Goriati. Gakanyara riya rakawa rofa. Perapo vaFiristi vese vakatiza kuti vaponese upenyu hwavo. Unothemba Jehovha, inga zvakaitari Dhavhidhi?

“Abzikwanisiki ku vandhu kuna Mwari bzinokwanisika; ngokuti yena anokwanisa bzese.”—Marco 10:27